Read Q'anjob'al Dt 16 Bible Online

Dt 16 - Q'anjob'al bible

Dt 16

¹A yet chi apni oc jun xajaw chi yik Abib, a yet tu' che cha' k'in Pascua, yuj e yion aj can bi Jehová co Diosal, yujtol a yet jun ak'bal yet jun xajaw tu' max on yican eltek Cham bay Egipto.

²A yul k'in Pascua tu' che yak' no wacax c'al no calnel yin xajanbalil bay Jehová co Diosal, a ton bay jun lugar sic'bilcan el yuj Cham bay chi oc ayilal bay.

³A no no' ok e yak' yin xajanbalil tu', ok e chi' no' yetok ixim pan c'am yich, a ton ixim chi tx'oxontek yuj yailal, yujtol yinxac'al aymanil max yun e yel bay Egipto. A yuj tu xin, masanil tiempo ok e nac'altek jun c'ual yet max on el bay Egipto tu'.

⁴A yin ukeb c'ual tu', c'amc'al bay ay jabok yich pan bay yul e tx'otx'al tu'. Yetok c'apax no chibej ok e yak' yin xajanbalil yet yayc'ualil yet babel c'ual, c'am jabokxa no' chi cancan yet k'inibalil yet junxa c'ual.

⁵A e xajanbal yet Pascua tu', c'am chi je' e mak'on cam bay tzanc'al tzet conobal ok yak' Jehová co Diosal ayex.

⁶Palta asan bay jun lugar ok siq'uil Cham bay ok oc ayilal bay, a tu' ok e mak'cam no' yet yayc'ualil yet lananxa toj c'u, a ton yet jun hora tu' max con el bay Egipto.

⁷A no chibej tu', ok e bol no' xol tza' k'ak', cax ok e chion no' bay jun lugar sic'bilcan el yuj Jehová co Diosal. Axa yet junxa k'inibalil xin, cax chex meltzoj bay cajan ex.

⁸A yin wakeb c'ual tu', ac'al ixim pan c'am yich che lo'. Axa yet is suk c'ual xin, che wajban oc e ba yin mimek tzalojc'ulal yuj e yion aj can Jehová co Diosal. A wal yet jun c'ual tu', c'am junok mac chi yil jabok is mulnajil.

⁹A yet chi oc ch'en jobalej yin ixim trigo, a yet tu' chi chalay el yich bislay ukeb semana.

¹⁰A yet chi lajwi ukeb semana tu', cax chi chalay pax k'in yet chi lajwi jooj trigo, yuj yilay aj can Jehová, cax che yak'on ofrenda tol chi el yin e c'ul, atac'ala' jantak chi yun yak'on Jehová co Diosal yaxilal e yiban.

¹¹Che cha' k'in tu' satak Cham bay jun lugar sic'bilcan el yuj, yet chi oc ayilal bay. A bay tu' che wajbaj e ba yetok eb e yuninal, c'al yetok eb e chekbej, yetok eb levita cajan e xol, yetok eb tx'ok conobal, yetok eb c'amxa mam, c'amxa txutx, c'al yetok eb xal camnakxa yichamil cajan ec' bay yul e conobal tu'.

¹²Naek c'apaxtek ayex ti', tol yin mosejal max yun jec' bay Egipto. Yuj tu' che yil wal tzet chi yun e beybalnen masanil tzet chi yal juntzan ley ti'.

¹³A yet mayal lajwi e jooj trigo tu xin, c'al yet mayal lajwi e pitz'on el yal an uva, cax che chaon ukeb c'ual k'in yet chinama.

¹⁴Tzalojanek yin k'in tu' yetok e yuninal, yetok eb e chekbej, yetok eb levita, yetok eb tx'ok conobal, yetok eb unin c'amxa is mam, c'amxa is txutx, yetokc'al eb xal camnakxa yichamil cajan ec' yul e conobal.

¹⁵A jun k'in tu', ukeb c'ual che cha' yuj e yion aj can Jehová co Diosal, a ton bay jun lugar sic'bilcan el yuj. Yuj tu' a Cham ok yak' yaxilal yiban sat e yawoj, c'al yiban e mulnajil. Caywal tu' ok yun e yayji ec' yin tzalojc'ulalil.

¹⁶Masanil eb winak, yowalil chi oc eb satak Jehová co Diosal yin oxel yul abil, a ton bay is lugar max sic'can el tu', yin oxeb k'in ti': a ton k'in yet ixim pan c'am yich, k'in yet chi lajwi jooj trigo, c'al k'in yet chinama. C'amc'al junok chi apni oc satak Jehová, yin tol c'am ofrenda ibil oc yuj,

¹⁷palta tol junjunc'al chi yitok is yofrenda, atac'ala' jantak yaxilal chi yak' Jehová co Diosal bay.

¹⁸Ocokab eb juez c'al eb yajaw bay masanil conoblak ok yak' Jehová co Diosal bay masanil tribu, yet chi beyc'ulnelay el eb conob yuj yin tojolal.

¹⁹Manchak q'uex eb tojolal yin man tojolalok. C'amokab q'uexanil anima yul sat eb, tamwal ok cha eb montebal tumin, yujtol a montebal tumin tu', chi etax el nabal eb aj nabal yuj. Ac'al ton oc yuj ch'en tumin tu' chi q'uexontok k'anej eb tojol yayji is nabal.

²⁰Asanokabc'al tojolal che yunej, yet ok ex ayjok ec' bay tx'otx' tx'otx' ok yak' Jehová co Diosal ayex.

²¹A yet che watx'nej yaltar Jehová co Diosal, manchak e watx'nej ay junok te' yuj yilay aj can xal dios Asera bay c'atan tu'.

²²Manchak e watx'nej aj junok ch'en axca pilaliẍ, yet chi oc ayilal bay, yujtol caw wal chi yaj Jehová co Diosal juntzan tu'.