Read Q'anjob'al Dt 19 Bible Online

Dt 19 - Q'anjob'al bible

Dt 19

¹A yet maxax yak' lajwok el Jehová co Diosal masanil juntzan nación, axa e yioncan is tx'otx' eb tu', ayexxa ok ex cajay bay is conob eb, c'al bay yatut eb.

²Ok e sic'can el oxebok conob bay tx'otx' tx'otx' ok yak' Jehová co Diosal ayex tu'.

³Oxeb makan ok yun e pojon ay tx'otx'. A bay nan yul junjun makan tx'otx' tx'otx' tu', a tu' chi cancan junjunok juntzan conob tu'. Ok e watx'nej c'apax beal yin juntzan conob tu', yuj tu' xan tzanc'al mactxel chi mak'cam junok yet animail, chi je' toj colon ba bay junok juntzan conob tu'.

⁴A mac chi mak'cam junok anima, chi je' toj colon ba bay tu', yet watx' c'am chi cami, ta man yinok c'ul max tita, c'am pax ajc'ulal nan xol eb.

⁵K'inalok ta ay cawanok chi toj bay xolak te' tzoc'oj si', ta ay junok eb c'uxan chi eltek ch'en echej tu' yul is yochal yet lanan tzoc'wi si' tu', cax chi low ch'en yin nak ajun yetok tu', cax chi cami; a nak tu' chi je' yeli, cax chi toj colon ba bay junok juntzan conob tu'.

⁶Tatol junnej conob, najat mi toj beal, ay is may chi tzakloj junok yican nak max cam tu' yintak yet chi paktzen bay, yetok yowal c'ul. K'inalok ta chi michchaj yuj, cax chi mak'on camok, palta man is mojok chi cami, yujtol a yet yalantok, c'am bay tol yajc'ul ba eb.

⁷Yuj tu' xan chi wal ayex xin, tol che pojcan el oxebok conob bay chi je' colon ba anima.

⁸Ta ok e beybalnej juntzan chekbanilej chi wal ayex ti' tinani', yujtol che camc'ulnej Jehová co Diosal, cax chex tojc'al yintak, ok yak' Cham masanil tx'otx' ayex, axca wal max yun yak'on is ti' bay eb jichmam. A yet ok bic'oj e tx'otx'al tu' yuj Jehová co Diosal, ok e yaon oc oxebokxa conob tz'akilok oxeb txequelxa yayji tu', a ton bay chi je' e colon e ba.

¹⁰Caywal tu' ok yunej, yet watx' man comonokc'al ok pul chiq'uil eb anima c'am is mul bay tx'otx' tx'otx' ok yak' Jehová co Diosal ayex, axa chi yunej, chi titcan e yiban yuj junok mac chi cam tu'.

¹¹Palta ta ay mactxel tol yajc'ul ba xin, a junok tu' chi makon junxa tu', axa chi yunej, chi mak'onxac'al camok, cax chi toj colon ba bay junok juntzan conob tu',

¹²a eb cham yicham winakil conob bay cajanta'a chi chekon mitx'lay bay chi col ba tu', cax chi ilaytok bay is conob yet chi alay oc yul k'ab junok yican jun mayal cam tu', yet chi ak'lay c'apax camok.

¹³C'amc'al mimanc'ulalil yin, yet watx' man comonc'alok chi mak'lay cam eb anima c'am is mul bay xol eb jet conob. Axca tu xin, watx'c'al ok yun e yelocok.

¹⁴A bay tx'otx' tx'otx' ok yak' Jehová co Diosal ayex tu', yowalil ay yelapnok mojonail is satak junjun eb e vecino yul e sat, axca wal max yuncan is mojonal yet yalantok.

¹⁵Ta asan jun testigo yin jun anima yuj is mul chi oqui, c'am chi je' low yin. Masantac'al ay cawan ma oxwan testigo, catatu' chi low yin.

¹⁶Ta ay junok mac yob is nabal cax chi yaon oc ba yin lek'ti' testigoal yin junok mactxel, cax chi tec'ban ba yaloni tol ay is mul jun anima tu',

¹⁷ta axca tu', yowalil chi ilaytok eb cawan tu' bay satak Jehová, c'al bay satak eb sacerdote, c'al bay satak eb juez, a ton eb ayoc yin yopiso.

¹⁸A eb ayoc yin yajawil tu', a eb ok cam wal yiloni ta yel jun k'anej tu'. Ta lek'tial chi yak' jun testigo tu xin,

¹⁹a yiban chi tojcan tzet max k'an yin jun anima tu'. Caytu' chi yun lajwi jun ak'oj lek'tial e xol.

²⁰A yet ok yaben eb anima axca tu' cax ok xiwaj eb, axca tu' manxa ok yun eb jun yobtakil tu'.

²¹Manchak cus e c'ul yin junok caytu' chi yunej. Axca wal tzet chi k'an jun lek'ti' testigo tu' yin junok anima, ac'ala' caytu' ok utlayok. Ta chi k'ana' tol chi mak'lay camok, ma chi ilay eltek bak' sat, ma chi mak'lay eltek junok ye, ma chi tzoc'lay el is k'ab, ma yakan, ac'ala' axca wal tzet max k'an tu', caytu' chi yun lowcan yin mac chi k'anon tu'.