Read Q'anjob'al Dt 21 Bible Online

Dt 21 - Q'anjob'al bible

Dt 21

¹Ta a xolak mulnajil bay tx'otx' tx'otx' ok yak' Jehová co Diosal e sataknej tu', chi ilchaj e yuj mimanil anima tol mak'bil camok, palta c'am mac yojtak mactxel max mak'on camok,

²a eb cham yicham winakil conob, yetokc'al eb juez bay juntzan conoblak cawil ay, a chi beyc'ulneni, c'al yecheni mactet junok conob tu' cawil ay, bay max cam jun anima tu'.

³Chi lajwi tu xin, a eb cham yicham winakil conob ay bay cawilal tu', a eb chi iontok junok no k'opoj wacax tol c'amtoc'al chi oc yugo yin,

⁴cax chi yion aytok eb bay jobeal junok aej c'am chi tani, bay c'amc'alta' mac chi mulnaj bay. A bay tu' chi mak'lay k'aj is nuk' no wacax tu'.

⁵A eb cham sacerdote, is yinatil Leví ok oc eb testigoal yin, yujtol asanxanej eb chi watx'nen el masanil owal, c'al caklejbail xol conob, a ton eb sic'bil el yuj Jehová co Diosal, ayoc eb yin yak'wi serbil, c'al yalon eb watx' k'anej q'uexelok Cham.

⁶Chi lajwi tu', masanil eb yicham winakil conob tu' chi tx'aj eb k'ab yiban no k'opoj wacax camnakxa tu',

⁷cax chi yalon el eb juntzan k'anej axca ti': Ayon ti', mayonnak max co mak'cam jun anima ti', man jojtakok mactxel max mak'on camok,

⁸xan c'amokab chaoc is camichal jun anima c'am is mul ti' jiban on. Ak' mimanc'ulal jiban Mamin, ayon israel a conob on ti', tutun ach max a col jun a conob ti', ẍi eb. Caytu' chi yun lajwican ay is camichal jun camnak tu'.

⁹Ta caytu' chi yun eb, c'amxac'al yalon yet eb yin jun camnak tu', yujtol max yikej eb tzet max yal Jehová.

¹⁰A yet chex oc yin owal yin eb ajc'ul, a Jehová co Diosal ok ak'on ayc'ay eb yul e k'ab, cax ok e yiontek eb preso.

¹¹Ta ay junok e xol ok yiloc junok ix ix xol eb tu' tol caw wal watx' yili, chi yilonxac'al oc is c'ul yin ix, cax chi yionxac'altok bay yatut.

¹²A bay tu', chi tzuklay el xil ix, c'al lot'lay el yisk'ak,

¹³chi q'uexlay el is pichil ix ayocok, yet max michchaj ix yin presoal tu', cax chi cajay can ec' ix bay yatut nak winak tu'. Jun wal xajaw chi ok' ix yuj is mam, c'al yuj is txutx. Chi lajwi tu', catatu' chi yionxac'al nak jet israelal tu' ix ix tu', axa ton yocxac'al nak yichamilok ix tu', c'al yoc ix yistzilok nak.

¹⁴Ta axa chi yun xin, c'am pax chi cha' c'ul nak ix, chi je' beklaycan ix yuj nak. Palta c'am chi je' txonlay el ix yin tuminal, tamwal yoc ix yin mosejal, yujtol mayal etnelay ix yuj nak.

¹⁵Ta ay junok winak ay cawanok yistzil, caw wal ay is camc'ulal yin junok ix, axa yin junxa ix xin, c'am wal is camc'ulal, ta chi jay yune' eb cawanil, palta a jun chi babji jay yune', a ton ix c'am wal chi camc'ulnelay tu',

¹⁶a yet chi apni oc c'ual yet chi pojon ec' junok winak tu' is satak xol eb is yuninal, tokwal chi je' yoc yune' ix camc'ulnebil tu' yin babel uninal. Yujtol ta chi yut axca babel unin, yobxac'al mi chi yun yin nak babel unin yet ix man wal ochebilok tu', yujtol a nak tu' babel unin yayji.

¹⁷Yowalil tol a nak tu' babel uninc'alta' ok yun yuj. A nak ok chaon ca makan satakej, yujtol a ton nak is babel c'ajol, xan yet nak yayji satakej yet babel winakil.

¹⁸Ta ay junok mac ay junok is c'ajol puch tenomtak, ma pit, c'amxa chi cha yab tzet chi yal is mam, c'al is txutx, tamwal chito yikej yet chi ak'lay cuenta,

¹⁹a eb mamej txutxej tu', yowalil chi yitok eb satak is despacho eb cham yicham winakil conob,

²⁰cax chi yalon eb axca ti': A wal jun juninal on ti', caw wal pit, tenomtak. C'amxa jabok chi yikej ayon, junelnej yobxac'al tzet chi yunej, asan uq'uej an chi yunej, ẍi eb.

²¹Catatu xin, masanil eb winak bay jun conob tu' chi k'okon camok. Caytu' chi yun yak'lay lajwok jantak yobtakil ay bay yul e conobal tu'. A yet ok yojtaknen el eb jet israelal jun tu', ok xiwaj eb.

²²Ta ay junok winak chi mak'lay cam yuj is yobtakil, tol chi aj locan yin junok te te',

²³a is mimanil tu', c'am chi cancan bay tu' masanil ak'bal, palta tol yowalil chi muklay yet jun c'ual tu', yet watx' man ok yetnejtok tx'otx' tx'otx' ok yak' Jehová co Diosal ayex tu', yujtol ayoc catab Dios yiban mactxel chi aj locan yin junok te te' tu'.