Read Q'anjob'al Dt 22 Bible Online

Dt 22 - Q'anjob'al bible

Dt 22

¹Ta ay junok ex che yila', tol chi c'aytok is wacax, ma is calnel junok e yet conob, man toc'alok che yilcan oc no', palta tol che yitok no' bay e yet conob tu'.

²Palta ta a jun ay yet no' tu' man e vecinook, man pax e yojtakok mac ay yet no', che yitok no no' tu' bay e yatut, chi canc'al can no' bay e yatut tu' masantac'al chi k'anlej ec' jun e yet conob tu', cax che yak'on meltzoj no' bay.

³Cay c'apax tu' che yun yetok junok no burro, ma junok an k'apej, ma junokxa tzanc'al tzet yetal chi c'aytok. Ta ay junok ex che yil paxok, man toc'alok che yilcan ocok.

⁴Ta ay junok ex che yila' tol chi ayc'ay is burro, ma is wacax junok e yet conob bay yulak be, man toc'alok che yiloc eb, palta tol chex colwaj e yion aj wan no' yetok eb.

⁵A eb ix ix, c'am chi je' k'anon eb is pichil eb winak, tamwal eb winak chi je' k'anon eb is pichil eb ix ix, yujtol chi yajlay mactxel chi yun axca tu' yuj Jehová co Diosal.

⁶Ta ay junok mactxel chi ilchaj junok wayub tz'iquin yuj, tol ayajtok bay chon junok te', ma sat tx'otx' ayay xin, cax ayoctok no' txutxej tu' yiban yune', ma yiban jos, c'am che yitok no' txutxej tu' yetok yune'.

⁷Chi je' e yiontok no' yune', axa no' txutxej che bekcantok, axca tu xin watx' ok ex elocok, ok najatilbok e k'inal.

⁸Ta ay junok ex che watx'nej aj junok e na, watx'nejek c'apax aj muro bay tilak bay yiban tu', yet watx' c'am chi titcan e yiban ayex aj na ex tu', ta ay junok mactxel chi elc'ay bay yiban tu', cax chi cami.

⁹Manchak e yaw juntzanokxa awoj xol e yawoj uva, talaj chi ak'lay yowalil, nabaxac'al e yinat tu', c'amxa che lo' pax sat e yuva tu'.

¹⁰A yet chex k'uwi tx'otx' yetok arado, c'am che yaoc junok no wacax yetok junok no burro yin mulnajil tu'.

¹¹Manchak e yaoc pichilej chembil yetok lana c'al yetok lino.

¹²Ok e watx'nej tx'anil caneb txiquin e k'util yelbubok.

¹³Ta ay junok winak chi yi' junok ix ix yetbiok, axa chi yunajok, c'amxa is camc'ulal yin ix,

¹⁴cax chi yaloni tol ayxa is mul ix, chi naonc'al aj k'anej yin, chi yaloni: Max wi' jun ix ti', axa yet max in way yetok, max wiloni tol manxa k'opojok ix, ta ẍi.

¹⁵Axa is mam c'al is txutx ix k'opoj tu' chi iontok yechel yet k'opojal ix bay satak is despacho eb cham yicham winakil conob,

¹⁶cax chi yalon is mam ix k'opoj tu' bay eb cham yicham winakil conob tu' axca ti': Ayin ti' max wak' in cutz'in yetbiok jun winak ti'. Axa tinani', c'amxa chi yochej,

¹⁷yuj tu', xiwil tzet chi yal nak. Tolab ayxa is mul ix. Chi yaloni tol manxa k'opojok ix, palta tix wal is tx'oxbanil is k'opojal ti', ẍi is mam tu'. A wal yet lanan yalon axca tu', cax chi jenbantok jun sábana satak eb cham yicham winakil conob tu'.

¹⁸Axa mitx'lay nak winak tu' yuj eb cham tu', cax chi alay oc yailal yiban.

¹⁹Chi lajwi tu' cax chi cheklay yak' nak 100 siclo ch'en plata yin multaok, yujtol chi yalaj nak yin ix k'opoj aj Israel, tol ayxa is mul. A jun tumin tu' chi ak'lay bay is mam ix k'opoj tu'. Man yujok tu' majxa yi' nak ix, palta ok ilayc'alta' ix yuj nak, masantac'al camich.

²⁰Palta tatol yel, a junok ix ix tu', manxa k'opojok yet max nupayi, c'am tx'oxbanilej yin ix,

²¹chi ilay eltok ix bay puertail yatut is mam, cax chi k'oklay cam yuj masanil eb winak aj conob tu', yujtol max yaoc jun miman mulej bay yul conobal, c'al yuj yion c'apax el q'uixwil is mam. Caytu' chi yun lajwi yobtakil xol co conob.

²²Ta ay junok winak chi yun mul yetok junok ix ix tol ay yichamil, cax chi ilchaj el eb, chi cam eb cawanil, caytu' chi yun c'ayil yobtakil xol co conob.

²³Ta ay junok ix k'opoj mayal yak' is ti', tol ok nupay yetok junok winak, tx'okxa pax junokxa winak chi yun mul yetok ix bay yul conobal tu',

²⁴chi ilaytok eb cawanil bay satak despacho bay conob tu'. A bay tu' chi k'oklay cam eb cawanil, yujtol yul wal conob ayic' ix k'opoj tu', maj pax el yaw ix, ac'ala' c'apax jun winak tu', yuj max mitx'oc yistzil is yet winakil. Caytu' chi yun c'ayil yobtakil ay e xol.

²⁵Palta ta ay junok winak chi chalej ba bay c'am anima yetok ix ix mayal yak' is ti' bay junok winak, cax chi etnelay ix yuj nak tu', ta axca tu xin, asan nak winak max ak'on pural ix tu' chi cami.

²⁶Axa ix k'opoj tu', c'am tzet yetal chi utlay ix, yujtol c'am is mul ix max yaocok, tol moj chi cam yuj. A jun max yun nak tu' lajan axca junok winak chi mak'cam junokxa yet animail;

²⁷yujtol tx'oklil ix k'opoj tu' chi ec' bay c'am anima. Caxc'al max el yaw ix, palta c'am mactxel max coloni.

²⁸Ta ay junok winak chi chalej el ba yetok junok ix k'opoj tol c'am bay maxax yak' ti' nupayi, cax chi yak'on pural yetneni, cax chi ilchajtek eb,

²⁹a nak winak tu' yowalil chi yak' nak 50 siclo ch'en plata bay is mam ix yujtol mayal ak'lay pural ix yuj. Yowalil chi yi'xac'alta' yetbiok, c'amxa chi pojlej ba yetok, masantac'al camich.

³⁰C'am mactxel chi yun mul yetok yistzil is mam. Ta ay mac chi yun axca tu' c'am yelapnok is mam yul sat chi yal tu'.