Read Q'anjob'al Dt 23 Bible Online

Dt 23 - Q'anjob'al bible

Dt 23

¹Ta ay mactxel mak'bil poj yetbeyom is winakil, ma ibil eltek is winakil, c'am chi je' yoc xol is conob Jehová yet chi wajban ba eb yin ayilal.

²A junok mitz'unin,*fn* c'am chi je' yoc xol is conob Jehová, tamwal is yinatil yin tojbalk'inal.

³A eb amonita, yetokc'al eb moabita, c'am oxlajon bak'in chi je' yoc eb xol is conob Jehová, tamwal yinatil eb yin tojbalk'inal.

⁴Yujtol a yet max ex ec'tek bay is tx'otx'al eb, yet max ex eltek bay Egipto, tokwal max yak' eb e yuc'a', c'al e lobej. A ti' yet eb, tol max tojlanej eb Balaam, is c'ajol Beor, max tittac'al bay Petor yul yet Mesopotamia, yet chi ul yalcan el catab k'anej e yiban ayex ti'.

⁵Palta axa Jehová co Diosal, maj tak'wok bay Balaam tu', xan a catab k'anej t'inan yaloni, yinxa aloj watx' k'anej max yuncan ajok, yujtol caw wal ay is camc'ulalil Jehová co Diosal jin.

⁶Yuj tu' xan c'am che say tzet chi yun yaj can eb, tamwal chex colwaj bay eb yin tojbalk'inal.

⁷Palta xin, c'am che yintaknej can el eb edomita, yujtol e yican e ba yetok eb. Tamwal che yintaknej c'apax el eb egipcio, yujtol max quex ec' cajan jun tiempoal bay yul is tx'otx'al eb.

⁸Axa yet is yox makan yinatil eb ok jay xin, chixa je' yoc eb tu' co xol ayon conob on Jehová ti'.

⁹A yet chex toj yin owal yin eb ajc'ul oc e yin, yet chex ayji ec' xolak ac'un, manchak e yun tzet yetal tol man watx'ok atac'ala' yalon ley.

¹⁰Ta ay junok winak chi el is yinatil yet ipan wayi, yowalil chi elcantok bay yinlak campamento masanil c'u.

¹¹Axa yet yayc'ualil, watx' chi yut tx'ajon el ba, axa yet mayal tojcan c'u xin, cax chi ocpaxcantok bay yul campamento junelxa.

¹²Yowalil che watx'nej junok lugar bay yinel campamento bay chex toj txuljok.

¹³Yowalil che yitok junok te te' bay yul e maleta, tol patxan yayji is txam, xan a yet chex toj txuljok tu', yin babelal che jot junok olan, cax chex txulji aytok yul. Axa yet chi lajwi tu xin, cax che mukoncantok tx'otx' yiban.

¹⁴Yujtol a Jehová ajun e yetok bay chex eq'ui, a Cham chi colwaj e yetok yet chi ayc'ay eb ajc'ul oc e yin, yet Cham yayji jun campamento tu'. Yuj tu' xan c'am chi je' ta ay tzet yetal tol tz'iltak ay e xol tu', talaj chi el Cham e xol yuj jun tu'.

¹⁵Ta ay junok mosejal chi elaj bay is patrón, cax chi k'anon tol chi ayji e yetok, manchak e yak' meltzoj bay is patronben tu'.

¹⁶Canokabc'al bay e xol tu'. Bekanokab sic'len junok conob bay chi yal c'ul chi ayji. A jun lugar chi siq'uil tu', a tu' chi ayji. C'am mac chi tenon bay tu'.

¹⁷C'am junok winak ma junok ix tol jet israelal chi yaoc ba yin ajmulal yujc'al yoc yin ayilal bay comon dios.

¹⁸A ch'en tumin is tojol junok ix ix ma junok winak*fn* chi cha yin yajmulal, c'am chi je' yak'on ch'en yuj yiken bay maxax yak' is ti' yak'on bay Jehová. Yujtol a jun beybalej tu' caw yajbil yuj Cham.

¹⁹A yet che yak'on ch'en tumin yin majanil bay junok jet conob, manchak e k'an yuca' ch'en, ma junokxa tzet tol chi loji, c'al junokxa tzet tol chi je' yak'lay is majanbalil.

²⁰A bay junok tx'ok conobal ayic' e xol chi je' che k'an yuca' junok tzet yetal che yak' majanil. A pax bay junok jet conob xin, c'am che k'ana', Yet watx' ok yak' Jehová yaxilal e yiban bay sat tx'otx' tx'otx' tol ok oc e yetok tu'.

²¹A yet che yak'on e ti' yin junok tzet yetal bay Jehová co Diosal, yin aymanil che yak' yunej, yujtol ta c'amak, ok k'an Cham ayex, ta axca tu' ok oc e mul bay.

²²Ta c'am tzet bay che yak' e ti' bay Cham xin, c'am bay chi je' yoc e mul chi yal tu',

²³palta ta ay tzet che yak' e ti' e yak'on xin, yowalil che yak'a' axca wal bay chi el yin e c'ul.

²⁴A yet chex oc xol is yawoj junok eb jet conob, chi je' e loon an uva masantac'al chi noj e c'ul, palta c'am wal jabok chi je' e yiontok yul e pa.

²⁵Ta chex oc xol is trigo junok eb jet conob, chi je' e yion el janic'ok ixim yet che c'uxu', palta c'am chi je' e joonxac'al aj ixim yetok e jobal.