Read Q'anjob'al Dt 25 Bible Online

Dt 25 - Q'anjob'al bible

Dt 25

¹Ta ay cawanok anima chi yak' owal, yowalil chi toj eb bay satak yajaw yet chi watx'ji ay is yowal eb tu'. A mac c'am is mul chi colchajcan elok, axa mac ay is mul, chi lowcan yin.

²Ta a nak ay is mul tu' is moj tol chi mak'layi, a cham juez chi aloni cax chi ay telan bay sat tx'otx' satak cham, cax chi mak'layi atac'ala' jantak is mul.

³A yet chi mak'lay junok winak, c'am chi ec'tok cawinak el chi oc tz'um yin, yujtol ta chi ec' yiban, c'amxa yelapnok nak yul sat anima chi yabej.

⁴Manchak e yaoc pa yin ti' no no' yet chi tec'wi trigo.

⁵Ta ay cawanok winak tol yuẍtak ba, junnej nail bay cajan eb, axa chi yunej chi cam junok nak, c'amto yuninal yetok yistzil, c'am chi je' yion ix junokxa tx'ok winakil. Palta a nak yuẍtak yichamil ix max cam tu', a chi yi' paxcan ix. Axca tu' chi yun yiken nak is leyalil yuj is mu'.

⁶A is babel unin eb chi jayi, a is bi nak yichamil ix camnakxa tu' chi oc yin jun unin tu, yet watx' c'am chi c'ayil is bi nak xol co conob.

⁷Palta ta c'am chi je' c'ul nak chi yi' ix is mu' tu', chi je' toj ix bay satak eb juez c'al bay satak eb yicham winakil conob, cax chi yalon ix axca ti': A nak in mu' ti' c'am chi yal c'ul nak chi binajcan yuẍtak xol co conob. C'am chi yochej nak chi mojay wetok axca is leyalil yin muejal, ẍi ix.

⁸Lajwi tu xin, chi awtelay nak yuj eb yicham winakil conob, cax chi k'anlen el eb cham bay nak tzet wal ẍi nak. Tatol yel c'am chi je' c'ul yion ix is mu' tu',

⁹catatu' chi jayoc ix c'atan nak bay satak eb cham yicham winakil conob, cax chi yion el ix junok xanab nak, c'al tzubli oc ix yin sat nak, cax chi yalon ix: Axca ti' chi utlay eb nak tol c'am chi yal c'ul chi yak'can binaj yuẍtak, ẍi.

¹⁰Yuj tu xin a chi yun binaj xol co conob, is yinatil nak tol ibil el is xanab.

¹¹Ta ay cawanok winak chi yak'lej owal, cax chi jayoc yistzil junok eb nak tu' yin colon yichamil yaloni, chi tzac'ontek ix is winakil junxa nak tu',

¹²ta caytu' chi yunej, chi tzoc'lay el is k'ab ix ix tu' yin c'amxac'al yabenc'ulalil.

¹³Manchak e k'an echbal man tz'akanok yet chex txonji, ma yet chex manji,

¹⁵palta tol a wal echbal tz'akan, yet watx' chi najatilbi e k'inal bay tx'otx' tx'otx' ok yak' Jehová co Diosal ayex,

¹⁶yujtol c'am chi yochej Cham eb chi beybalnen juntzan man tojolalok.

¹⁷Naektek ayex ti', tzet max on utlay yuj conob Amalec, yet ayon ec' bay yulak be yet mayal con eltek bay Egipto.

¹⁸Naek c'apaxtek, tol c'am jabok xiwc'ulalil eb bay Dios. Max oc eb jin bay yulak be yet c'unbinak on elok, max jayoc eb mak'om cam eb najat tzunanxac'al chi yut ba.

¹⁹Yuj tu' xan a yet ok ex col-lay el yuj Jehová co Diosal bay eb ajc'ul oyan oc yinlak tx'otx' tx'otx' ok ak'lay e sataknej tu', yowalil che c'ayil binaj Amalec bay yulyibank'inal ti' yin junelnej. C'amokab chi toj c'ayc'ulal e yuj jun chekbanilej ti'.