Read Q'anjob'al Dt 27 Bible Online

Dt 27 - Q'anjob'al bible

Dt 27

¹Max yal cham Moisés yetok masanil eb yicham winakil conob juntzan chekbanilej ti' bay masanil eb conob: A tinani' xin, ok e yikej wal masanil tzet yetal chi wal ti'.

²A yet ok ex k'axpoj ec'tok bay a' Jordán, yet ok ex octok bay yul tx'otx' tx'otx' ok yak' Jehová co Diosal ayex bay tu', ok e yi aj wan juntzanok ch'en mimek ch'en, cax ok e yaon oc repello yin,

³cax ok tz'ibelay oc masanil juntzan chekbanilej ti' yin ch'en. Caywal tu' ok e yun yet ok ex apnok oc bay jun tx'otx' tol caw wal watx' tu'. Xiwil tzet ay sat tx'otx', a ton bay tx'otx' ok yak' Jehová co Diosal ayex tu', axca max yun yak'on is ti' bay eb jichmam.

⁴A yet mayal ex k'axpoj ec'tok bay a' Jordán tu', ok e watx'nej aj ch'en ch'en max wal ayex tu' bay witz Ebal, cax ok e yaon oc repello yin ch'en.

⁵Ok e watx'nen c'apax aj junok altar bay Jehová co Diosal. A ch'en ch'en ok e yaoc yin bay tu', man ok e jos ch'en. A bay yiban ch'en altar tu' ok e yak' tz'a xajanbal bay Jehová.

⁷Cax che yak'on c'apax xajanbal yet junc'ulalil. A bay tu' ok e cha k'in, ok ex low yin tzalojc'ulal satak Cham.

⁸A yin ch'en ch'en tu', watx' ok yun e tz'iben oc masanil juntzan chekbanilej chi wal ayex ti', ẍi cham Moisés.

⁹Max lajwi tu xin, max k'anjab cham Moisés bay eb yet conob, ajun masanil eb sacerdote is yinatil Leví yetok cham. Max yalon axca ti': Ex wet israelal, numayanek, abek wal tzet ok wala': Mayal wal on oc is conobok Jehová co Diosal tinani'.

¹⁰Yuj tu' xan yelc'ulalokab che beybalnej juntzan is chekbanil c'al juntzan is ley Cham chi walcan el ayex ti', ẍi cham Moisés.

¹¹A yet jun c'ual tu' max yal cham Moisés axca ti' bay conob Israel:

¹²A yet mayal ex k'axpoj ec'tok bay a' Jordán, a is tribual Simeón, Leví, Judá, Isacar, José c'al Benjamín, a tu' ok oc bulan eb bay yich witz Gerizim, yet watx' chi yal eb watx' k'anej yiban conob.

¹³Axa pax tribual Rubén, Gad, Aser, Zabulón, Dan, c'al Neftalí, a eb tu' ok oc bulan eb bay yich witz Ebal, yet watx' chi yal c'apax el eb catab k'anej yiban conob.

¹⁴Axa pax eb levita xin, ok yal eb bay eb yet israelal. Caw wal can ok yut eb yul is nuk' cax ok watx' alnen el eb juntzan k'anej ti':

¹⁵Catabnelayokab mac chi watx'nen aj yechelej, axca ch'en yechelej watx'nebil yuj junok mactxel chi je' watx'neni, cax chi yak'on bay junok lugar ewantak yet chi oc ayilal bay. A juntzan tu', yajbil el yuj Jehová, ẍiokab eb. Masanil conob ok alonok: Yunokabi, ẍiokab eb.

¹⁶Catabnelayokab mactxel c'am yelapnok is mam c'al is txutx yul is sat, ẍiokab eb levita. Yunokabi, ẍiokab eb conob.

¹⁷Catabnelayokab mactxel chi lacon mojonal is tx'otx' is vecino, ẍiokab eb levita. Yunokabi, ẍiokab eb conob.

¹⁸Catabnelayokab mactxel chi ikban el junok c'am chi je' yilwi yul be, ẍiokab eb levita. Yunokabi, ẍiokab eb conob.

¹⁹Catabnelayokab mactxel chi yun junok man tojolalok yin eb tx'ok conobal, c'al yin eb xal ix camnakxa yichamil, ma yin eb unin c'amxa is mam c'amxa is txutx, ẍiokab eb levita. Yunokabi, ẍiokab eb conob.

²⁰Catabnelayokab mactxel chi yun mul yetok yistzil is mam, yujtol a mac chi yun axca tu', c'am yelapnok is mam yul sat, ẍiokab eb levita. Yunokabi, ẍiokab eb conob.

²¹Catabnelayokab mactxel chi yun mul yetok no no' ẍiokab eb levita. Yunokabi, ẍiokab eb conob.

²²Catabnelayokab mactxel chi yun mul yetok is cab yanab, is yanab yuj is mam, ma yuj is txutx, ẍiokab eb levita. Yunokabi, ẍiokab eb conob.

²³Catabnelayokab mac chi yun mul yetok is ni', ẍiokab eb levita. Yunokabi, ẍiokab eb conob.

²⁴Catabnelayokab mactxel chi mak'cam junok yet animail yin ewantakil, ẍiokab eb levita. Yunokabi, ẍiokab eb conob.

²⁵Catabnelayokab mactxel chi cha' tumin yuj yak'on low camich yin junok anima tol c'am is mul, ẍiokab eb levita. Yunokabi, ẍiokab eb conob.

²⁶Catabnelayokab mactxel c'am chi tx'oxoni, tol ay yelapnok juntzan chekbanilej ti' yul sat yin yikeni, ẍiokab eb levita. Yunokabi, ẍiokab eb conob.