Read Q'anjob'al Dt 28 Bible Online

Dt 28 - Q'anjob'al bible

Dt 28

¹Ta wal tol ok e yikej bay Jehová co Diosal, c'al masanil is chekbanil Cham chi wal ayex ti' tinani', caw miman ok yun e yelapnok yuj Cham, yintak juntzanxa nación bay yulyibank'inal ti'.

²Yetok c'apaxok, ok e cha' masanil juntzan watx'c'ulalil ti', tatol ok e yikej bay Jehová co Diosal.

³Ok ak'layc'al watx'c'ulalil e yiban bay xol e conobal c'al bay najattak elok.

⁴Ay c'apax watx'c'ulal yiban eb e yuninal, c'al yiban sat e yawoj, yetokc'al yiban yune' e wacax, c'al yune' e calnel, c'al yiban yune' juntzanokxa e jobbejal no'.

⁵Ok yak' c'apax Cham watx'c'ulal yiban tzet ok e yay yul e motx, c'al yiban e lobej che watx'nej.

⁶Ok yak' Cham watx'c'ulalil e yiban yet chex eltok, c'al yet chex oc paxtek.

⁷A Jehová ok aon oc eb ajc'ul yul e k'ab yet ok oc eb yak'on owal e yin. Txololixac'al ok yun tit eb e yin, palta sakleminakxac'al ok yun yelaj eb ayex.

⁸A Jehová co Diosal ok yak' watx'c'ulalil yiban e c'una', c'al yiban masanil tzet ok e yunej. Caywal tu' ok yun e yayji ec' yin tzalojc'ulal bay tx'otx' tx'otx' ok yak' Cham ayex.

⁹Ta ok e yikej masanil is chekbanil, c'al e tzakloj yintak, a Jehová ok ex yic'al oc is conobok, axca max yun yaloni.

¹⁰Masanil conoblak bay yulyibank'inal ti' ok yojtaknej el eb tol sic'bil ex el yuj Jehová, caw wal ok xiw eb ayex.

¹¹A Cham ok tx'ox wal is camc'ulal e yin: xiwil ok yun e yuninal, xiwil ok yun yune' e joboj, xiwil ok yun sat e yawoj bay tx'otx' tx'otx' max yak' Cham is ti' bay eb jichmam tol ok yak' ayex.

¹²Ok jak wal Cham is miman beyomal ayex, atac'al bay satcan ok titc'ay nab yiban tx'otx' tx'otx' ti' yin is tiempoal, atac'ala' jantak chi oc yopiso. Caw wal watx'xac'al ok yun masanil e mulnajil. A jantak masanil tzet yetal ay ayex caw wal oj aj can, toltax ok je' e yak'on majanil bay xiwilok nación. Axa pax ayex ti', c'am tzet yetal ok e k'an e majanej bay junokxa mactxel.

¹³Tatol ok e yikej masanil is chekbanil Jehová co Diosal, a ton masanil juntzan chi walcan ayex ti' tinani', ok ex yaoc Cham yin aj babelal, man tzunanokxac'al ok e yuncanok. Yajnakilc'al ok e yun yintak juntzanxa nación. C'am yechel tol ok ex can yalan yuj.

¹⁴Caywal tu' ok yunej, ta c'am che yiel e ba yintak chekbanilej ti', tamwal e tzakloj yintak comon dios, tamwal e yoc yin ayilal bay juntzan tu'.

¹⁵Palta ta man ok e yikej masanil is chekbanil, c'al ley Jehová co Diosal, lanan walon ayex ti' tinani', tol ok jay wal oc juntzan catab ti' e yiban:

¹⁶Caw wal yob e yet bay yul e conobal, c'al bay najattak elok.

¹⁷Caw wal c'am tzet ok ay yul e motx, c'am ixim harina ok somlay ajok.

¹⁸Caw wal yobxac'al yet eb e yuninal, c'am watx'il ok yun sat e yawoj. Yobxac'al ok yun c'apax yune' e wacax, c'al yetok yune' e calnel.

¹⁹Caw wal yobxac'al e yet yet chex eltok, c'al yet chex oc paxtek.

²⁰Ok yatek Jehová yatakilal, c'al bilc'ulal e yiban. Toxac'al ok ex somchaj el yin masanil tzet yetal ok e yunej. Yin txennej tiempoal, cax ok ex lajwok ay yuj yobtakil che yun yin e bekoncan Cham.

²¹A Cham ok yatok juntzan ilya' caw wal ow e yiban. A ok ex ak'on lajwok el bay sat tx'otx' tx'otx' bay ok ex cajay tu'.

²²Ok ya c'apaxtek Cham jun ilya' tol ok ex bakbok aj yuj, k'ak'al ilya' caw wal yob, c'al e malajok. Axa tzet ok on e yawoj xin, ok takil yuj k'ak'. Manxa ok yak' nab, toxac'al ok takajok. Ok low tz'ab yin, masantac'al ok yal e lajwi ayok.

²³A satcan manxa ok yak' nabil ayex. Axa tx'otx' tx'otx' ti', manxa ok yak' tx'otx' sat e yawoj.

²⁴C'amxa nab ok ayc'ayok. Axa pokok, c'al arena ok ay yuj Jehová co Diosal, masantac'al ok yal e lajwi ayok.

²⁵A Cham ok ex ak'on ayc'ay satak eb e yajc'ul. Txololixac'al ok yun e toj yin eb ajc'ul tu', axa ok yun xin, toxac'al ok ex elaj bay eb yin sakleminakil. Toxac'al ok xiwaj masanil nación bay yulyibank'inal, yet ok yilon tzet ok ex onok.

²⁶A no ostoc, c'al no xolakteal no' ok chiontok e mimanil. Tok ayto mac ok xibten el no' e yin.

²⁷Ok yak' wal Jehová k'atok e mimanil yuj mal yabil, axca wal max yun eb aj Egipto. Ok aj c'apax quisk'oy e yin c'al yaxk'ayil, c'al q'uilaj yabil e yin, cax manxa ok anchaj juntzan ilya' tu'.

²⁸Yetok c'apaxok, ok ex oc yin locoal, ok somchaj el e c'ul, c'al manxa ok je' e yilwani.

²⁹Toxac'al ok ex ec' matxatxok yet chuman c'u, axca chi yun yec' matxatxok eb c'amc'alta' chi ilwi. Axa yin masanil tzet ok e yunej, c'amxac'al tzet ok eloc yin watx'il. Caw wal ok ex etax elok; ok'bal c'ulxac'al ok e yunej. C'amxac'al mactxel ok ex colonok.

³⁰Ok e yak' e ti' e nupay yetok eb ix ix, palta tx'okxa pax nak winak ok way yetok ix max yak' ti' tu'. Ok e watx'nej aj junok e na, palta majxac'al ex cajay yul. Ok e yaw junok e yuva, palta majxac'al e lo' sat an.

³¹E satak wali, cax ok mak'on cam eb e wacax, palta man ok e chi' jabok no chibej tu'. E satak wali, ok yiontok eb no e burro, palta majxac'al yak' meltzoj eb ayex junelxa. Ok yitok eb ajc'ul tu' e calnel, c'amxa mactxel okto je' colon el no' bay eb.

³²E satak wali, ok tojcan eb e c'ajol, c'al eb e cutz'in yul k'ab eb tx'ok conobal. Toxac'al ok ex c'unbok aj e makon jay eb, palta c'amxa tzet ok je' e yuneni yet chi jay eb.

³³A masanil jantak sat e yawoj, c'al jantak e mulnajil ok loaytok juntzan anima man ojtakbilok e yuj, axa ayex ti', caw wal ok ex etaxok, cax ok'balxa c'ulc'al ok e yunej.

³⁴A wal yet ok e yilon masanil juntzan ti', toxac'al ok ex occan locoal.

³⁵Ok e yab wal yail yuj Jehová, yax k'ayil yabil ok aj yin jolom e penec, c'al yinlak e xub, c'al yin masanil e mimanil. Manxa ok je' yanchaj juntzan yailal tu'.

³⁶Ok ex ilaytok yuj Cham yetok e reyal sic'bil oc e yuj, bay junok nación tol man e yojtakok ayex ti', tamwal eb jichmam max ojtakneni. A bay tu' ok e yak' serbil comon dios, te' ma ch'en watx'nebil.

³⁷Ok c'ayaj c'ul juntzanxa nación e yin. Toxac'al ok ex oc yin abixal c'al e buchlay yuj juntzan conob bay ok ex yitok Jehová.

³⁸Caw wal miman inat ok e yawa', palta janic' ch'an sat e yawoj ok e wajajok, ac'al no chapulín ok loon aytok.

³⁹Ok e yaw e yuva, cax ok e pecheni, palta man ok e waj sat e yuva tu', tamwal ok e yuc' e vino; ac'al no patz ok loon aytok sat an.

⁴⁰Ay te olivo bay sat e tx'otx', palta man ok e bon e ba yetok yaceiteal te' yujtol toc'al ok pukay sat e yolivo tu'.

⁴¹Ay e c'ajol, ay e cutz'in, palta man ok ayjok ec' eb e yetok, yujtol ok ilaytok eb yin mosejal bay juntzanxa tx'ok nacional.

⁴²Masanil te te' chi yak' sat bay yul e tx'otx'al, pilan ok lajwok el te' yuj no chapulín.

⁴³A eb tx'ok conobal cajan ec' e xol, yelxac'al ok aj can is tec'anil eb, yak'ban ayex ti', ok lajwok ay e tec'anil.

⁴⁴A eb tu' ay tzet yetal ok je' yak'on eb majanil, palta ayex ti', tok ayto tzet yetal ok je' e yak'on majanil. A wal ikbej mimek yelapnok ok yi' eb, axa ayex ti', axac'al ikbej c'am yelapnok ok e yi'.

⁴⁵Masanil juntzan yatakilal ti' ok jayoc e yiban. Ok ocxac'al ijan e yin masantac'al ok yal e c'ayil yuj, yuj wal tol maj e yikej masanil chekbanil, c'al ley Jehová co Diosal max yala'.

⁴⁶A juntzan yailal ti', tx'oxbanilal el yowal c'ul Dios e yin ayex ti', c'al yin eb e yinatil yin najatil tiempo.

⁴⁷Yujtol maj e yak' serbil Jehová co Diosal yin tzalojc'ulal c'al yin masanil e c'ul, caxc'al xiwilxa tzet yetal watx' max yak' ayex,

⁴⁸yuj tu' xan yowalil ok e yak' serbil eb ajc'ul ok yatek Jehová e yin xol yailal, wajil, takintial, c'al maj pichilejal, yetokc'al masanil yatakilal. Caw wal ok e yab yail yin mosejal tu', masantac'al ok yal e lajwi ayok.

⁴⁹A wal junok nación ay najat bay lajubal yulyibank'inal, a ok yitek Jehová e yin, jelan ok yun bey tita, axca bey no tx'acbaj. Tx'ok yel is ti' jun nación tu', man ok e yab tzet ok yala'.

⁵⁰Caw wal owal anima eb. C'am yelapnok eb icham anima yul sat eb, tamwal ay yelapnok eb unin bay eb.

⁵¹Ok chiaytok eb yune' e jobbejal no', c'al loon aytok eb sat e yawoj, masantac'al ok cam wal e yetaxi. C'amxac'al e trigo, e vino, e yaceite, tamwal yune' e wacax, c'al yune' e calnel okto can yuj eb, asan tol ok ex cam yuj wajil.

⁵²Toxac'al ok jayoc oyan eb ajc'ul tu' yinlak e conob, cax ok jayoc eb e yin, masantac'al ok yal yayc'ay bulnaj muralla can ayajok, c'al cuartel ayoc yipok e c'ul. Ok yoymanej eb masanil juntzan conoblak ok yak' Jehová co Diosal ayex.

⁵³A wal yet ok ocxac'al oyan eb ajc'ul tu' yin e conobal tu', axa yuj wajil ok e chion aytok e c'ajol, c'al e cutz'in max yak' Jehová co Diosal.

⁵⁴Caxc'al ay junok winak e xol caw wal watx' is c'ul, palta yobxac'al ok yut sat yin yuẍtak, yin yistzil tol camc'ulnebil yuj, c'al yin yuninal, a ton mactxel okto canok.

⁵⁵Man ok yak' janic'ok chibejal is yuninal lanan chion tu' bay eb, yujtol asanxanej jun tu' ayic' yul k'ab yuj yailal ok yaoc eb ajc'ul e yin, yet ok oc oyan eb yin masanil e conobal.

⁵⁶Caxc'al ay junok xal ix caw wal watx' c'ul e xol, tol caw wal beyom, tamwal chi yochej chi yay yakan sat tx'otx', yet c'am oc xanab, caw wal yobxac'al ok yut sat yin yichamil tol camc'ulnebil yuj, c'al yin is yune'.

⁵⁷Tokwal chi yak' xal jabok yune' ato yalji, tamwal is moj yune' tu' bay eb. Masanil juntzan tu', yinxac'al ewantakil chi yun chion aytok xal, yujtol c'amxa tzet watx' chi chi' yet ayic' eb ajc'ul yak'on owal yinlak e conob tu'.

⁵⁸Ta man ok e beybalnej masanil juntzan chekbanilej tz'ibbil bay yul tx'an libro ti', cax tatol c'am yelapnok Jehová co Diosal yul e sat, Cham manxa watx'ilok c'al tol ay is may.

⁵⁹Ok ya waltek Cham mimek yailal e yiban, c'al yiban e yinatil. A wal ilya' yelxac'al yob ok yak' e yiban tol c'amxa chi anchaji.

⁶⁰Ok tit wal juntzan ilya' e yiban, axca wal juntzan ilya' max oc yiban eb aj Egipto, a ton juntzan bay caw wal max ex xiwi; manxac'al ok el juntzan yailal tu' e yiban.

⁶¹Aytoc'al juntzanxa yailal tol c'amxa chi binaj bay yul jun libro yet cuybanilej ti', a ton juntzanxa tu' ok yatek Jehová e yiban yuj ex yak'onxac'al lajwok.

⁶²A wal ayex ti' ex wet israelal, tol caw wal xiwilxa e bisil, lajanxac'al ex axca waycan bay satcan, palta ok ex c'ayajok. C'amxa tx'ial ok yuncan e bisil, yuj wal tol maj e yikej bay Jehová co Diosal.

⁶³A Cham caw wal ay tzalojc'ulal jin, yin yion aj can co bisil; axa yet tu' ok tzaloj c'apax c'ul yuj e yetaxi, c'al e lajwi ayok. Yinxac'al yaxc'ayinakil ok yun e yilay el bay jun nación bay toxa ok ex apnok cajayok.

⁶⁴A Jehová ok ex ak'on saklemtok bay xolak juntzanxa nación, bay jun tilak tx'otx' tx'otx', masantac'al bay junxa tilak tx'otx'. A bay tu' ok ex oc yin ayilal bay comon dios, a ton bay juntzan dios te' ma ch'en, tol man e yojtakok ayex ti', tamwal eb jichmam max ojtakneni.

⁶⁵A yet ok ex ilaytok bay juntzan nación tu', c'am xewilal ok e yila', tamwal ay jabok e satak yul e yet, yujtol a Jehová ok ex ak'on ayjok ec' yin xiwc'ulalil, toxac'al cusiltak ok yun yili e sat yuj bilc'ulal.

⁶⁶Caw wal ay is may ok yun e yayji ec'ok. Caw wal ay e xiwc'ulal yet c'ualil, c'al yet ak'balil. C'am bay tol c'amxa tzet ok e na'.

⁶⁷Yel wal miman xiwc'ulal ok aj can e yin. Caw wal ayxa is may tzet yetal ok e yila'. A yet k'inibalil ok e yala': Ayok wal man chi k'ekbi, quex chi. Axa yet ak'balil xin, ok e yalon paxok: Matawal mayal k'inibi, quex chi.

⁶⁸Caxc'al max yal Jehová, tol c'am chex meltzoj junelxa bay beal Egipto, palta a Cham ok ex chekontok bay tu' junelxa yul barco. Ok e txonil e ba chekbejok eb e yajc'ul tu', palta c'amxa mac ok je' c'ul ex manon elok, ẍi cham Moisés.