Read Q'anjob'al Dt 30 Bible Online

Dt 30 - Q'anjob'al bible

Dt 30

¹A yet ok jayoc masanil tzet max wal ti' e yiban, is watx'c'ulal c'al is catab toxa max wak' e sic'lej, tatol ok na wal ba e c'ul yet ayexxa ec' bay nacionlak bay chex yacantok Jehová co Diosal,

²ta yetok masanil e c'ul, c'al yetok masanil e yanimail che yikeni, cax ok yikenc'al eb e yuninal axca wal chi yun waloncan ayex ti',

³ta axca tu', ok q'uex Cham is nabal e yin, cax ok ex yaon oc yin is watx'il. Ok cusoc is c'ul Cham e yin, cax ok ex wajbantek junelxa bay max ex yacantok xolak nación.

⁴Caxc'al max ex saklemcantok, max ex apnitac'al can oc bay lajub yulyibank'inal, atac'al bay tu' ok ex yitek Jehová co Diosal,

⁵cax ok ex wajban pax oc Cham bay max ec'lej cajan eb jichmam. A tu' ok ex ayjok junelxa. Caw wal beyom ok e yuncan yuj Cham, cax xiwil ok aj can e bisil yintak eb jichmam tu'.

⁶Ok yaoc Jehová yechel trato yin e yanimail c'al yin is yanimail eb e yinatil yet ok e camc'ulnej c'al yin masanil e c'ul, c'al yin masanil e yanimail. Yuj tu' ok najatilbok e k'inal.

⁷Ok yacantok Cham masanil catab ti' yiban eb ajc'ul max chichon oc c'ul e yin, eb max ex etneni.

⁸Axa ayex ti xin, ok ex meltzojc'al oc yul k'ab Jehová yin e yiken masanil is chekbanil chi walcan ayex tinani'.

⁹Yuj wal tu xin, caw wal tol beyom ok e yuncan yuj Jehová, cax ok yak'on Cham yaxilal yiban tzetak yetal che yunej, c'al yiban e yuninal c'al e jobbejal no', c'al e yawoj. Ta che yikej masanil tzet chi yal Cham, c'al masanil is chekbanil, c'al cuybanil tz'ibbil yul yunal ley ti', ta yin masanil e c'ul, c'al yin masanil e yanimail che yaon oc e ba yul k'ab Cham, ok tzalojbok c'ul Cham yak'on watx'c'ulal ayex, axca max yun yak'on tzalojbok Cham is c'ul yetok eb jichmam.

¹¹A juntzan chekbanilej ti' chi wak' e yojtaknejcan elok, man yatakok e yikeni tamwal najat ayil e c'atan.

¹²Manak bay satcan ay, yet watx' c'am che yala': ¿Mactxel chi je' yajtok bay satcan, yet watx' chi toj yiaytek jun chekbanilej tu', cax chi yak'on jojtaknej elok, yet watx' chi co beybalnej? man quex chiok.

¹³Yetok c'apaxok, tokwal ata bay junxa k'axepaltok a' mar ay, cax che yalon axca ti': ¿Mac chi je' k'axponen a' mar ti', yet chi toj yitek ayon cax chi jojtaknen elok chi co beybalneni? man quex chiok.

¹⁴Akxa xin, a jun chekbanilej ti' ayic' co xol, chi jalubtanej, c'al ayoc yin co nabal, yet watx' chi jikej.

¹⁵A tinani', ti' wal chi wak' e sic'lej baytet che yochej: a mi cawilej c'al watx'ilal, ma a' uchlejbail c'al camich.

¹⁶Ta che yikej masanil tzet chi walcan ayex ti' yin e camc'ulnen Jehová co Diosal, cax chex tzaklojc'al yintak, cax che yikenc'al is chekbanil, c'al is cuybanil, caytu' ok yun e beytok yin watx'il, c'al xiwil ok yun bisil e yuninal. Catatu' ok yak'on Jehová co Diosal yaxilal e yiban bay sat tx'otx' tx'otx' ok ak'lay ayex tu'.

¹⁷Palta ta c'am che cha e yab juntzan ti' xin, axa ok yunej, bekanxac'al e c'ul e yilaytok yintak comon dios, cax chex ay jajan yin ayilal bay,

¹⁸a wal yet jun bek ti' chi walcan ayex, tol ok ex camxac'al. Majxac'al ex najatilbok bay sat tx'otx' tx'otx' ok e yi' yet ok ex k'axpojcan ec'tok bay a' Jordán.

¹⁹A wal yet jun c'ual ti' chi waoncan oc satcan c'al tx'otx' tx'otx' ti' yin testigoal e yin, tol max wak' e sic'lej e cawil ma e camichal, watx'ilal ma uchlejbail. Palta siq'uek el cawilej, yet watx' watx'c'al chi yun e beytok yetok eb e yinatil.

²⁰Camc'ulnejek Jehová co Diosal. Yikemc'al che yut e ba bay, yujtol a yuj e yikemal tu', ok e yi' e cawil. Yuj tu' xan ok ex ayjok ec' yin mimantak tiempoal bay sat tx'otx' tx'otx' max yak' Cham is ti' yak'on bay eb jichmam, a ton bay Abraham, bay Isaac, c'al bay Jacob, ẍi cham Moisés.