Read Q'anjob'al Jn 11 Bible Online

Jn 11 - Q'anjob'al bible

Jn 11

¹A bay jun aldea chi yik Betania, ay jun winak max yaban ayok, chi yik Lázaro. Ay cawan yanab jun winak tu', ay jun chi yik María, ay junxa chi yik Marta. Aj Betaniac'al el eb yoxwanil.

²(A ix María tu' anej oc yal suk'uk'i jab yin yakan Jesús Jajawil, cax joontak ix yetok is xil.) Caw wal ya'ay Lázaro tu'.

³Yuj tu' xan max yatok eb ix anabejal tu' ti' bay Jesús, max yaltok eb ix axca ti': —Mamin, a nak camc'ulnebil oj, caw wal ya'ay nak tinani', ẍitok eb.

⁴A yet max yaben Jesús tzet max yaltok eb ix, max yalon axca ti': —A jun ilya' tu', maj cam nak yuj junelnej. Max michchaj nak yuj jun ilya' tu', yet watx' chi tx'oxk'abnej el ba is mayk'ak'al Dios, c'al yuj tx'oxk'abnelay el c'apax in mayk'ak'al ayin C'ajol in Dios ti', ẍi Jesús.

⁵Caw wal ay is camc'ulal Jesús yin Lázaro tu', c'al yin María yetok Marta.

⁶Palta a yet max yaben tol caw wal ya'ay nak, maj tok yin ayman yiloni. Yinxa cabjial max toji.

⁷A yet max ajapnok c'ual toj tu', max yalon bay eb is cuywom axca ti': —Tonek bay yul yet Judea junelxa, ẍi bay eb.

⁸Axa yalon eb bay tu': —Palta Mamin, jayebixto c'u yak'len eb aj Judea tu' ach k'okch'enneni. ¿Tom chochej chach toj pax junelxa bay tu' tinani'? ẍi eb bay.

⁹Axa yalon bay eb tu': —Jojtak tol ay 12 hora yul junjun c'u. Ta yet c'ualil chon ec'jabi, man comonok chon telc'oji, yujtol sakk'inal.

¹⁰Palta ta chon ec'jab yet ak'balil xin, comonc'al chon telc'oji, yujtol c'am sakk'inal, ẍi Jesús bay eb.

¹¹Max lajwi tu', max yalon paxtek yuj Lázaro: —A nak jamigo tu', tol chi way nak; palta ok tok in tenil wayan, ẍi bay eb.

¹²—Palta Mamin, tatol chi way nak, tekan ok jay c'ul chi yal tu', ẍi eb cuywom tu' bay.

¹³A yet max yalon Jesús tol chi way Lázaro tu', a is camichal chi yala'; palta a naon eb xin, tol acaw wayan chi yunej.

¹⁴Yuj tu xan max watx' alnej junelxa bay eb axca ti': —Max cam nak Lázaro.

¹⁵Caw chin tzaloj tinani', yujtol c'am in ec' bay tu' yet max cami, yet watx' che ya wal oc e c'ul win. A tinani' tonek jila', ẍi bay eb.

¹⁶Axa Tomás, nak Tioẍ jebil bi, max yal nak bay eb yet cuywomal tu' axca ti': —Tonek yetok Cham, toj jak'ek co ba cam yetok, ẍi bay eb.

¹⁷Axa yet max apni eb xin, max yaben eb tol oxjitax max mukay Lázaro tu'.

¹⁸Cawilal Jerusalén ay conob Betania, axca mi nanok legua xol ba.

¹⁹Yuj tu' xan xiwil eb aj Jerusalén max bet mimanc'ulnen María yetok Marta, yuj is nuej eb max cam tu'.

²⁰A yet max yaben Marta tol lanan jay Jesús bay na eb, axa toj ix chaon tu'. A pax María xin, aycan ec' yul na.

²¹Max yalon Marta bay Jesús axca ti': —Mamin, ta ayach ec' cayti', majmi cam nak in nuej tu'.

²²Palta tinani', wojtak, tzanc'al tzet ok a k'an bay Dios, ok yak' ayach, ẍi ix bay.

²³—A nak a nuej tu', ok ictzoj aj nak, ẍi Jesús bay ix.

²⁴—Yel toni, wojtak. A yet lajub c'ual, yet ok ictzoj aj eb camnak masanil, cax ok ictzoj aj nak yetok eb, ẍi ix bay.

²⁵Ayin ti', ak'om in ictzoj aj camnak, aj k'inalej in c'apaxok. Tzanc'al mac chin yaoc yin is c'ul, caxc'al mi ok camok, palta ok ictzoj pax ajok.

²⁶Masanil eb iquis tol chin yaoc yin is c'ul, c'am bak'in ok cam eb. ¿Chimi aoc jun ti' yin a c'ul? ẍi Jesús bay ix.

²⁷—Chi ton waoc yin in c'ul Mamin, tol ach ti' Cristo ach, C'ajol ach Dios. Ach ton ti' echbanebil a jay bay yulyibank'inal ti', ẍi ix bay.

²⁸Lajwi yalon ix Marta axca tu', max pax ix, max toj yawtej ix is nuej. Yin ewantakil max yal ix bay is nuej tu': —Mayal jay Cham Meẍtol, chach yawtej Cham, ẍi ix.

²⁹Lajwic'al yaben María axca tu', max aj lemnajok, cax max toj bay ayic' Jesús,

³⁰tutun c'amto chi oc Cham xol conob tu'. A bay max bet chalay yuj Marta, a tu' ayto ec'ok.

³¹Palta ayic' eb aj Judea bay na yetok ix. Max ul mimanc'ulnelay ix yuj eb. Axa yet max yilon eb tol max aj lemnaj ix cax max toji, ayman max tzakloj eb yintak ix, yujtol a naon eb tol a bay mukan nak is nuej tu' chi toj ok'ok.

³²A yet max apni oc ix bay ayic' Jesús, max ay jajan ix satak. Axa yalon ix bay axca ti': —Mamin, ta ayach ec' cayti' majmi cam nak in nuej, ẍi ix bay.

³³A yet max yilon Jesús tol chi ok' ix, cax chi ok' pax eb aj Judea max tzakloj yintak ix tu', axa cus c'apax aj Cham yetok eb tu' sic'libil.

³⁴Max k'anlen bay eb axca ti': —¿Baytal max e muk nak? ẍi bay eb. —Mamin, ton jila', ẍi eb bay.

³⁵Max ok' Jesús.

³⁶Axa yalon eb aj Judea ayic' yilon tu' axca ti': —Ilab wali, caw wal camc'ulnebil yuj Cham, ẍixac'al eb.

³⁷Ay pax eb max alon axca ti': —Palta a Jesús ti', a' max jakon sat jun nak c'am chi je' yilwi. ¿Tom maj je' yak'on jay c'ul Lázaro ti', yet watx' c'am chi cami? ẍi eb.

³⁸Caw wal max tit pitz'naj is cusc'ulal Jesús, cax max apni oc bay mukan nak. A yul jun ch'en olbil, a tu' ayoctok mimanil nak tu'. Patxancan oc junxa ch'en makilok.

³⁹—Iek el ch'en makilej tu', ẍi Jesús. Max yalon Marta, ix yanab nak Lázaro tu' axca ti': —Palta Mamin, oxjitax max cam nak, tekan ayxa jabil nak tinani', ẍi ix bay.

⁴⁰—Mayal wal ayach, tatol chin aoc yin a c'ul, ok ton el mayk'ak'al Dios, ẍi bay ix.

⁴¹Catatu bian, max yion el eb makil bay ayoctok nak tu'. Max aj t'anan Jesús satcan, max yalon axca ti': —Mamin, yuj wal dios ayach, max ab tzet max wala'.

⁴²Wojtakxa tol masanil tiempo chabc'alta' tzet chi wala', palta a yuj jantak eb anima bulan ec' ti', xan chi wal juntzan ti' ayach, yet watx' ok yaoc eb yin c'ul tol ach cheknejintek, ẍi Jesús.

⁴³Lajwi yalon juntzan tu', cax max aj yaw yin ipejal axca ti': —¡Lázaro, elantek! ẍi.

⁴⁴Axa yeltek nak camnak tu'. Chulan oc juntzan k'apej yin yakan nak c'al yin is k'ab nak. Ay c'apax jun an xotan oc yalan is ti'.*fn* Max yal Jesús axca ti': —Xuyek el juntzan k'ap ayoc yin nak tu', ẍi bay eb.

⁴⁵Cax xiwil eb aj Judea ajun yetok María tu', max yil eb tzetc'al max yun Jesús. Yuj tu' xan xiwil eb max yaoc c'ul yin.

⁴⁶Palta ay juntzanxa eb max bet alon yab eb fariseo, tzetak max yi ba yuj.

⁴⁷Axa lajtinen el ba eb fariseo tu' yetok eb yajawil eb sacerdote c'al eb sat yajaw, cax yalon eb axca ti': —¿Tzet chi jut jun winak tu' che na'? Yujtol xiwil juntzan milagro lanan tx'oxon tinani'.

⁴⁸Ta toc'al ok jiloc nak tinani', masanil eb jet conob ok yaoc eb c'ul yin nak. Axa eb yajaw bay Roma, ok ul yuchay eb jun templo Dios ti', cax ok on yak'on lajwok eb yetok eb jet conob masanil, ẍi eb.

⁴⁹Palta ay jun chi yik Caifás xol eb. A jun tu' ayoc sat sacerdoteal yet jun abil tu'. A' max alon bay eb axca ti': —Ayex ti', caw wal c'am jabok tzet e yojtak.

⁵⁰C'am chi nachaj el e yuj, tol yelmi watx' chon cani ta chi cam junok winak q'uexelok anima masanil. Ta caytu' chi yunej, c'am chi lajwi el eb jet conob masanil, ẍi Caifás tu'.

⁵¹Palta a yet max yalon juntzan k'anej tu', man yulok yet max yala', palta yujtol sat sacerdote yayji yet jun abil tu', yuj tu' xan max ak'lay yal yuj Dios tol ok cam Jesús q'uexelok eb israel masanil.

⁵²Man asannejok yuj eb israel tu', xan max cami. Max cam c'apax yuj wajban oc jantak eb yuninal Dios sakleminak yayji bay yulyibank'inal ti', yet watx' junxanej chi yuncan eb.

⁵³Yuj tu xan, a yet jun c'ual tu', max chaon el eb yajaw yich sayoni, tzetbil ok yut eb yak'on cam Jesús.

⁵⁴Yuj tu xan c'amxa chi ec' Jesús nan xol eb aj Judea tu'. Axa yel bay jun lugar tu', cax max toj bay jun conob chi yik Efraín, bay tilak el jun tz'inan tx'otx'. Ata tu' max apni oc yetok eb is cuywom.

⁵⁵A yet lananxa jay tiempoal jun is k'in eb israel chi yik Pascua, xiwil eb najat petoj, max jayoc eb bay Jerusalén. C'amto chi oc k'in tu' yet max apni oc eb, yet watx' chi watx'nej ba eb axca ta' is beybalil.

⁵⁶A yet ayic' eb bay tu', caw wal max saylay ec' Jesús yuj eb. Ay eb max alon yul yamak'il templo Dios axca ti': —¿Tzet ẍi e c'ul? ¿Okmi jay Jesús tu' bay k'in ti', ma maj jay che na'? ẍi eb.

⁵⁷Axa yion eltek eb fariseo c'al eb yajawil eb sacerdote tu' jun k'anej tol chi yal axca ti': Ta ay bay che yil yin Jesús, chi ul e yal ayon, ẍi. Caytu' max yun saklemil k'anej yuj eb, yujtol max yochej wal eb max yaoc preso.