Read Q'anjob'al Jn 14 Bible Online

Jn 14 - Q'anjob'al bible

Jn 14

¹Max yal Jesús bay eb is cuywom axca ti': Manchak somchaj el e c'ul. Aek oc e c'ul yin Dios, cax che yaon c'apax oc e c'ul win.

²A bay yatut in Mam, xiwil lugar bay watx' chon cajayi. K'inalok ta c'am bay, mayalxam wal ayex. A tinani xin, toj in watx'nej e lugar bay ok ex apnok ocok.

³Ok lajwok in watx'nen e lugar tu', cax ok in jay pax junelxa, axa ex ul wiontok wetok tu', yet watx' a bay ayin ec' tu', a tu' ok ex ayjok ec' wetok.

⁴Ayex ti', e yojtakxa bay chin toji, e yojtak c'apax beal bay chin toj tu', ẍi bay eb.

⁵Axa yalon Tomás bay axca ti': —Mamin, man jojtakok bay ok ach tok tu', ¿tzet ok jut jojtaknen el jun be tu'? ẍi.

⁶Max yalon Jesús bay axca ti': —A jun be chi wal ti', ayin toni. Asan in chi je' ex wiontok bay ayic' co Mam Dios. Ayin ton yelc'al tzet chi wala', cax ayin ton aj k'inalej in.

⁷Matawal chin e yojtaknej elok. Ta chin e yojtaknej elok, ok e yojtaknej c'apax el in Mam, a pax tinani' xin, e yojtakxa in Mam tu', yujtol toxa max e yil yin, ẍi bay eb.

⁸Max yalon Felipe bay axca ti': —Mamin, tx'ox a Mam tu' jila', cax k'okbilc'alnaj tu', ẍi.

⁹Xan max yal Jesús bay axca ti': —Felipe, mimanxa tiempo ayin ec' e yetok. ¿Tom c'amto chojtaknej el mac in txel xin? A eb chin iloni, lanan yilon eb yin co Mam Dios. Yuj tu', ¿tzet yuj xan chal ayin: Tx'ox a Mam tu' jila', cachi?

¹⁰¿Tom c'am chaoc yin a c'ul, tol ayin oc yin co Mam Dios, cax ay pax oc Cham win? A tzet chi wala', man yulok wet chi waloni, palta tol a co Mam Dios ayoc win tu', a' chi ak'on wunej.

¹¹Aek oc yin e c'ul tol ayin oc yin co Mam Dios, cax ay pax oc win. Ta c'am che yaoc e c'ul win yuj tzet chi wal ti', aek oc e c'ul win yuj juntzan milagro chin tx'oxo'.

¹²Wal yel chi wal ayex, a mac chin yaoc yin is c'ul, ok yun eb juntzan chi wunej. Toltax ay juntzan tzet ec'ban ok el yunen eb yintak juntzan ti', yujtol ok in paxaj bay ayic' co Mam Dios.

¹³Tzanc'al tzet ok e k'an bay Dios yujtol wet ex, ok in watx'nej el ayex. Ok in watx'nej el ayin ti', tol C'ajol in Dios, yet watx' ok in tx'oxk'abnej elok, tol caw wal miman yelapnok co Mam Dios.

¹⁴Tzanc'al tzet ok e k'an ayin yujtol wet ex, ok in watx'nej el ayex.

¹⁵Ta chi camil e c'ul win, ikejek in chekbanil.

¹⁶Ayin ti' ok in k'an bay co Mam Dios, cax ok chekontek junxa mac ok colwaj e yetok, a ton Yespíritu tol yel chi yala'. A' ok ayjokc'al ec' e yetok yin tojbalk'inal.

¹⁷A eb yet yulyibank'inal ti', maj je' chaon eb jun tu', yujtol c'am chi je' yilon oc eb yin, xan man yojtakok eb. A pax ayex ti xin, e yojtakxa Yespíritu tu', yujtol ayic' e yetok, a' ok ayjok ec' e yin.

¹⁸Ayin ti', maj ex in bekcan e tx'oklil, ok in jay pax ayex junelxa.

¹⁹Txenxanej tiempo, catatu' bian, manxa ok in yil eb aj yulyibank'inal ti'. A pax ex ayex ti xin, ok in e yila'. Yujtol iquis inc'al yin tojbalk'inal, yuj tu' xan iquis ex c'apax yin tojbalk'inal.

²⁰A yet jun c'ual tu' ok nachaj el e yuj, tol ayin oc yin in Mam, cax ayoc Cham win. Ok nachaj c'apax el e yuj, tol ayex oc win, cax ayin pax oc e yin.

²¹A mac chi aben in chekbanil, cax chi yiken paxok, a ton eb tu' chi camil c'ul win. A eb chi camil c'ul win, a ton in Mam ok camc'ulnen eb. Yetok c'apaxok, ok in camc'ulnej eb, cax ok in tx'oxon in ba bay eb, ẍi Jesús bay eb.

²²Ay junxa mac chi yik c'apax Judas, manak Judas Iscariote, a' max alon bay Cham axca ti': —Mamin, ¿tzet xan asan ayon ok a tx'ox a ba? ¿Tzet xan man ok a tx'ox a ba bay eb yet yulyibank'inal ti'? ẍi bay Cham.

²³Axa yalon Cham axca ti': —A mac chin camc'ulneni, chi yikej tzet chi wala'. Xan axa in Mam chi camc'ulnen pax eb, cax ok on cajay yetok eb.

²⁴A pax eb c'am chin camc'ulneni, c'am chi yikej eb tzet chi wala'. A juntzan k'anej chi wal ayex ti', man wetok, yet co Mam Dios, Cham cheknejintek.

²⁵Chi walcan juntzan ti' ayex, yak'ban wal tol ayinto ec' e yetok.

²⁶A co Mam Dios ok chekontek Yespíritu ayex in q'uexelok. A' ok colwaj e yetok, ok ex cuy yin masanil tzet yetal. Ok jek e na jantak tzet albilcan ayex wuj.

²⁷A tinani xin, chi wak'can junc'ulal ayex. A caw in junc'ulal chi wak'can ayex. Man axcaok junc'ulal chi yak' eb yet yulyibank'inal ti', man cayoktu' wet chi wak'can ayex. Manchak e yak' somchaj e c'ul, cax c'am chex xiwi.

²⁸Toxa mayal wal e yabej, tol ok in paxok, palta ok in jay pax ayex. Ta yel wali chin e camc'ulnej, ta axca tu', moj wal chex tzaloji yet che yabeni tol ok in paxaj bay co Mam Dios, yujtol ec'ban Cham wintak.

²⁹Ayokto chi waloncan juntzan ti' ayex, yet watx', a yet ok yunen tzet chi wal ti', cax ok in e yaon wal oc yin e c'ul.

³⁰Manxa mimanok tzet chi walcan ayex, yujtol lanan jay nak yajaw yulyibank'inal ti'. A nak tu' c'am yalon yet win.

³¹Palta axcac'alta' tu' ok yunej, yet watx' ok yojtaknej el eb yet yulyibank'inal ti', tol ay in camc'ulal yin co Mam Dios cax chi wikej masanil is chekbanil max yak' ayin. A tinani xin, ajanek wanok, tonek, ẍi Jesús bay eb.