Read Q'anjob'al Jn 4 Bible Online

Jn 4 - Q'anjob'al bible

Jn 4

¹Max yaben aj eb fariseo k'umal tol ec'banxa bisil eb cuywom Jesús yintak eb yet Juan. Ec'ban c'apax eb max yak' bautizar.

²Manak Jesús max ak'on bautizar eb, a eb is cuywom chi ak'wi bautizar.

³A yet max yaben Jesús tol max yabaj eb fariseo jun tu', max el bay Judea tu', cax max meltzoj bay Galilea.

⁴Yowalil a yul yet Samaria chi ec' yet chi toj tu'.

⁵A yet ay wal ec' Jesús yul yet Samaria tu', max apni oc bay jun conob chi yik Sicar. A bay tu' ay jun tx'otx' ak'bilcan yuj Jacob bay jun is c'ajol chi yik José.

⁶A tu' ay jun uc'bala' jotbilcan yuj Jacob. Chuman mi c'u max apni oc Jesús ti a' uc'bala' tu'. Yujtol c'unbinakxa yuj beyil, xan max ay chotan ti a' tu'.

⁷Axa eb cuywom xin, max toj eb man jabok lobej yet is chuman bay jun conob cawilal jun uc'bala' tu'. A yet ay tok eb tu', max jayoc jun ix ix aj Samaria ul yion ajtek ya'. Axa yalon Jesús bay ix axca ti': —Ak' jabok a' aej ti' wuq'uej, ẍi bay ix.

⁸

⁹Axa yalon ix bay axca ti': —¿Tzet chi yal tu' oj, tol aj Samaria in, ix in paxoj, axa ach ti' israel ach cha k'anon pax aej oc' ayin? ẍi ix bay. Caytu' max yut k'anjab ba ix bay, yujtol a eb israel c'am chi chalej ba yak'on eb yetok eb aj Samaria tu'.

¹⁰Max lajwi tu xin, axa yalon Jesús bay ix axca ti': —Chin k'an jabok aej wuc' ayach, palta man ojtakok mac in txel. Man ojtakok c'apax tzet chi yochej c'ul Dios chi yak'a'. K'inalok ta ojtak, chi mi a k'an ayin, cax chi wak'on jun a' aej chi ak'on k'inalej ayach, ẍi Jesús bay ix.

¹¹Max yalon ix axca ti': —Mamin anima, tok ay a net chak' ion ajtek a'. Caw wal najat ayaytok a'. ¿Baytal ay a' chi ak'on k'inalej chal tu xin?

¹²A jichmam Jacob, a a' ti' max yuc' yetokc'al yuninal c'al no no' jobbil yuj. A yet max cami max can jun uc'bala' ti' ayon. Tokwal yelxac'al miman elapnok yintak Jacob tu', ẍi ix bay.

¹³Yuj tu' xan max yal bay ix axca ti': —Tzanc'al mac chi uq'uen jun aej ti', chi tit is takintial junelxa.

¹⁴Palta a eb chi uq'uen jun aej chi wak'a', c'amxa bak'in chi tit is takintial eb junelxa. Yujtol a jun aej chi wak' tu' chi el yakan a', cayc'al ti' yaj wornaj a' bay yanimail eb, cax chi yak'on a' k'inal eb yin tojbalk'inal, ẍi Jesús bay ix.

¹⁵Axa yalon ix bay tu': —Mamin, ak' a' aej chal tu' ayin, yet watx' c'amxa oxlajon bak'in chi tit in takintial, cax manxa yowalilok chi ul wi' wet bay jun uc'bala' ti', ẍi ix bay.

¹⁶—Asi', cax cheontek echamil, cax chex jay e cawanil cayti', ẍi Jesús bay ix.

¹⁷—C'am wichamil, ẍi ix bay. —Yel ton chala', c'am echamil tinani'.

¹⁸Owan echamil max ec'lej. A nak bay ayach ec' tinani', man ton echamilok nak. Yuj tu' xan yel ton chala' tol c'am echamil, ẍi bay ix.

¹⁹Lajwic'al yaben ix tzet max yal Jesús bay, max yalon ix bay Cham: —Mamin anima, chekbej ach Dios chi wila'.

²⁰A eb jichmam, ayon aj Samaria on ti', a bay jun witz ti' chi ul yal ba eb bay Dios. A pax ayex israel ex ti xin, atac'al bay Jerusalén yowalil chi toj e yiay e ba bay Dios e yala', ẍi ix.

²¹Axa yalon Jesús bay ix ix tu' axca ti': —Txo ix, chaab tzet ok wal ayach. Ay jun tiempoal ok jayok tol manxanak bay jun tzalan ti' ok ul e yiay e ba bay co Mam Dios. Tamwal yowalil ok exto tok c'apax bay Jerusalén tu'.

²²A ayex aj Samaria ex ti', che yiay e ba bay Dios e yaloni, palta man e yojtakok pax Dios. A pax ayon israel on ti', caw wal jojtak co Diosal bay chi jal co ba. A co xol ok eltek jun Colwajwom.

²³Ay eb tol a bay co Mam Dios chi yal ba yin yel. Mayal jay tiempoal yion ay ba eb yetok yanimail c'al yin yel. Yujtol cayton tu' chi yochej co Mam Dios chi yun yion ay ba eb anima bay.

²⁴A Dios, Espíritu toni; yuj tu xin, ta ay mac chi yal ba bay, yowalil chi yal ba eb yetok wal yanimail c'al yin yel, ẍi Jesús bay ix.

²⁵Max yalon ix bay: —Ayin ti', wojtak tol ay jun Cham Mesías, a ton Cham Cristo ok jayok. A yet ok jay Cham tu', jichanc'al ok yut yalon masanil tzet yetal ayon, ẍi ix bay.

²⁶—Tokwal macto txel; ayin ton lanan in k'anjab etok ti', ẍi bay ix.

²⁷A wal lajwi yalon Jesús juntzan tu', axa jayoc eb is cuywom tu'. Caw wal max c'ayaj c'ul eb yet max yilon eb tol chi k'anjab Jesús yetok jun ix ix, palta c'am junok eb max k'anlen el bay tzet chi yochej c'ul chi k'anlej el bay ix, ma tzet chi yal yetok ix.

²⁸Lajwi tu' max bekoncan ix is moc ti a' tu', cax toj ix yalon yab eb anima yul conob tu' axca ti':

²⁹—Ay jun winak, pilan yojtak masanil tzet chi el wuneni. Mayal yaltek masanil. Tonek wetok, tonek jila'. ¿Manmilajnak Cristo ti'? ẍi ix bay eb.

³⁰Yuj tu xin, max toj eb aj conob tu' bet yilon bay ayic' Jesús.

³¹A yet c'amto chi jayoc eb anima tu' bay Cham, max yalon eb is cuywom tu' bay axca ti': —Mamin, lowan jabok, ẍi eb bay.

³²Axa yalon bay eb tu': —Ay in lobej, palta man e yojtakok, ẍi bay eb.

³³A yuj tzet max yal tu', xan max c'oli k'anlen ec' eb xol: —¿Xin ta ay mac max ul ak'oncan is lobej? ẍi eb.

³⁴Axa yalon Cham bay eb tu': —Caw wal chi wochej chi wun tzet chi yochej c'ul Cham cheknejintek. Wochwan chin watx'nej el is mulnajil max yaoc yul in k'ab. A yet chi wunen jun tu', axca tol a' chi oc in lobejok.

³⁵Ayex ti', canebto xajaw, catatu' chi oc jooj trigo e yaloni, palta ayin chi wal ayex: Ilabi, mayal jay tiempoal jolayi. A yuj eb tolto ok in chaonok, xan chi wal axca tu'.

³⁶Ay eb ec'nakxa mulnaj xol eb, axca mac chi tzicwi ay trigo. Ay c'apax eb chi mulnaj xol eb axca tol joom trigo eb, yet watx' chi cha' eb anima ti' jun k'inalej tol ayc'al yin tojbalk'inal. A eb chi mulnaj tu', ok cha' eb paktzil jun is mulnajil tu', yet watx' jun lajanc'al ok yun tzaloj eb masanil.

³⁷Xan yel ton ta' chi yal jun k'anej: Tx'ok eb chi tzicon ay trigo, tx'ok c'apax eb chi joon aj ixim, ẍi.

³⁸Chex in chektok mulnaj xol anima axca junok joom trigo. Palta mayexnak babel mulnajwom ex xol eb. Tx'ok eb babel mulnajwom xol eb axca junok tzicom ay trigo. Ayex ti', axca tol toxac'al ok e jo' tzet awbil yuj eb tu', ẍi Jesús bay eb.

³⁹A bay jun conob yul yet Samaria tu', xiwil eb max yaoc c'ul yin Jesús, yujtol max yal jun ix tu' xol eb axca ti': Pilan yojtak tzet chi el wuneni, max yal ayin masanil, ẍi ix bay eb.

⁴⁰Yuj tu' max yal eb ta chi el yin c'ul Jesús chi can yetok eb yul is conob tu'. Yuj tu' xan max ayji ec' cab c'ual yetok eb.

⁴¹Xiwiltoc'al mac max yaoc c'ul yin Cham yet max yaben eb tzet max yal Cham.

⁴²Axa yalon eb bay ix ix tu': —A yet babelal, a yuj tzet max al ayon, xan max jaoc co c'ul yin Jesús. Axa tinani xin, a wal caw Cham max alon ayon. Yuj tu' xan max co watx' anejxac'al oc co c'ul yin tinani', caw wal jojtakxa sic'libil, tol a Cham ti', wal yel, a ton co Colomal co masanil ayon cajan on bay yulyibank'inal ti', ẍi eb bay ix.

⁴³Lajwi yec' cab c'u bay Samaria tu', max toj Jesús bay Galilea.

⁴⁴Yalnakxata' can yuj Cham, tol c'am yelapnok junok chekbej Dios yul sat eb yet conob.

⁴⁵A yet max apni bay Galilea tu', caw wal tzalojc'ulal max yun chalay apnok yuj anima, yujtol a yet max betic' eb iloj k'in Pascua bay Jerusalén, a tu' max yil eb tol xiwil tzet max bet yun Cham bay tu'.

⁴⁶Max apni oc Jesús bay jun conob chi yik Caná, bay yul yet Galilea tu', bay max q'uexpoj oc a' aej yin vinoal yuj. Axa bay junxa conob chi yik Capernaum, ay jun cham yajaw caw wal ya'ay jun is c'ajol.

⁴⁷A yet max yaben cham anima tu' tol a Jesús petoj bay Judea, max apni bay Galilea tu', max bet tewok bay Cham, tol chi toj Cham yetok bay yatut, yuj toj yak'on jay c'ul is c'ajol ya'ay tu', yujtol ijan chi el c'ul nak.

⁴⁸Palta max yal Jesús bay cham anima tu' axca ti': —Ta c'am che yil juntzan milagro, tol chi tx'oxon el wikbej, tok che yaoc e c'ul win, ẍi bay.

⁴⁹Axa yalon cham yajaw tu' bay Jesús axca ti': —Mamin, ton wal wetok yin ayman, yak'ban iquisto jun in c'ajol tu', ẍi bay.

⁵⁰—Paxan. A nak a c'ajol tu' ok jay c'ul nak, ẍi bay cham. Max yaoc cham yin c'ul tzet max yal Jesús bay, axa meltzoj bay yatut tu'.

⁵¹Yulxa be max chalej ba yetok eb is moso. Max yalon eb bay axca ti': —Mayal jay c'ul a c'ajol tu', ẍi eb bay.

⁵²Max k'anlen bay eb axca ti': —¿Jantak hora max oc waan yilya' tu'? ẍi bay eb. —Ewitax yet tz'eymoj c'u max sicbi jun k'ak' tu' yin, ẍi eb bay.

⁵³Axa naontek cham tu', tol wal tz'eymoj c'apax c'u max yalon Jesús bay axca ti': A nak a c'ajol tu', ok jaycan c'ul, ẍi. Yuj tu' xan max yaoc cham c'ul yin Jesús, c'al yetok eb ay bay yul yatut.

⁵⁴A ton jun yet is cab milagro tx'oxbanil el is yikbej ti'. A yet petoj bay Judea yet max apni bay Galilea max yunen jun ti'.