Read Q'anjob'al Jn 5 Bible Online

Jn 5 - Q'anjob'al bible

Jn 5

¹Max lajwi tu xin, axa toj Jesús bay Jerusalén tu', max toj yilon jun k'in eb yet israelal.

²A bay Jerusalén tu', ay jun aej pean ajok, Betesda bi yin is ti' eb israel. A cawilal puertail bay chi oc no calnel, a tu' ay jun aej tu'. A bay tilak jun aej tu', ay oyeb lanchu c'am yichlak.

³Xiwil eb ya'ay telan octok yulak juntzan lanchu tu'. Ay eb c'am chi je' yilwi. Ay eb c'am chi je' beyi. Ay c'apax eb sicbinak el is mimanil.

⁴

⁵A bay tu' ayic' jun winak 38 abilxa tol ya'c'al ay.

⁶Max yilon Jesús tol telan ay sat tx'otx', cax max yojtaknen elok tol najatilxa tiempo caytu' yayji nak, xan max k'anlej bay nak axca ti': —¿Chi mi ochej chi jaycan a c'ul? ẍi bay nak.

⁷Axa tak'wi nak tu': —Matawal chi je' Mamin, palta a yet chi bilaj sat a' aej ti', c'am mac chi ok' c'ul win quin yaon aytok yul a'. Junjun el a yet chi wak'len in toj yul a', tx'okc'al mac chi babji yaytok in satak, ẍi nak bay Cham.

⁸Yuj tu' xan max yal Cham bay nak axca ti': —Ajan wanok, iaj a wayub, beyan, ẍi Cham bay nak.

⁹Ayman max jaycan c'ul jun winak tu'. Max yion aj is wayub, max c'oli beyi. Asan tol c'ual xewilal yet tu'.

¹⁰Yuj tu' xan ay jaywan eb yajaw bay Judea max alon bay nak max jaycan c'ul tu' axca ti': —A tinani', c'ual wal xewilal. Caw wal c'am leyal ekon bey a wayub ti', ẍi eb bay nak.

¹¹—A Cham max ak'on jaycan in c'ul, a max alon ayin axca ti': Iaj a wayub, beyan, ẍi ayin, ẍi nak bay eb.

¹²Yuj tu' xan max k'anlej eb bay nak axca ti': —¿Mactxel jun max alon ayach tol cheaj a wayub tu' cax chach beyi? ẍi eb bay nak.

¹³Palta man yojtakok nak mactxel max ak'on jaycan c'ul tu'. Yujtol xiwil anima ayic' bay tu', xan maj yil nak bay max k'okc'ay ba Jesús xol anima.

¹⁴Ato yet junelxa, max yil-len el ba Jesús yetok nak yul templo Dios, cax max yalon bay nak axca ti': —Ilabi. A tinani' watx'xa a c'ul. Manchakxa on yobtakil, yet watx' c'amxa chi jay junok yailal yel miman eban, ẍi bay nak.

¹⁵Axa toj nak yalon bay eb yajaw tu', tol a Jesús max ak'on jaycan is c'ul.

¹⁶Yuj tu xin, caw wal max oc eb ajc'ulal yin Jesús, yujtol a yet c'ual xewilal max yun jun tu'.

¹⁷Palta max yal Jesús bay eb aj Judea tu' axca ti': —A in Mam, c'am bay chi oc wanaj mulnaji, yuj tu' xan ac'ala' in mulnaj c'apax ayin ti', ẍi bay eb.

¹⁸A yet max yalon Jesús axca tu', max yochejxac'al eb max yak' camok, man asannejok yuj maj yikej c'ual xewilal, palta yuj c'apax max lajbaj ba yetok Dios, yet max yalon oc Dios is Mamok.

¹⁹Max yalon pax Jesús bay eb axca ti': Wal yel chi wal ayex, ayin C'ajol Dios in ti', c'am tzet chi je' wunen in tx'oklil. Asan tzet chi wil watx'nen in Mam, asan chi wunej. Masanil tzet chi yun in Mam tu', chi wun c'apax ayin ti'.

²⁰Chin camc'ulnelay yuj in Mam. Masanil tzet chi el yuneni, chi tx'ox ayin. Ayto wal juntzanxa tzet ok tx'ox ayin, ok c'ayaj e c'ul yet ok e yiloni.

²¹Yujtol a in Mam chi je' yak'on ictzoj aj eb camnak, cax chi yak'on k'inal eb. Cayin c'apax tu' ayin C'ajolej in ti'. Ta ay eb chi wochej chi wak' is k'inal, chi wak'a'.

²²A in Mam, c'am junok anima chi beyc'ulnej, palta ayin C'ajolej in ti', ayin max yak'can wopiso in beyc'ulnen eb masanil.

²³Max yak'can in Mam wopiso yet watx' lajan welapnok yetok in Mam yul sat masanil anima. Ta ay mac c'am welapnok yul sat, c'am c'apax yelapnok in Mam yul sat, yujtol a cheknejintek.

²⁴Wal yel chi wal ayex, a mac chi aben in k'anej, cax chi yaon oc c'ul yin Cham cheknejintek, a ton eb chi yican is k'inal tol ayc'al yin tojbalk'inal. Majxa tok eb bay yailal, yujtol mayal colchajcan el eb yul k'ab camich, cax max chaoncan eb is k'inal tol ayc'al yin tojbalk'inal.

²⁵Wal yel chi wal ayex, a tinani' mayal jay tiempoal yaben eb camnak yaj waw ayin C'ajol in Dios ti'. A eb chi ikeni, a ton eb tu' ok cha' is k'inal tol ayc'al yin tojbalk'inal.

²⁶Yujtol a in Mam iquisc'alta' yul yet. Max yak' c'apax can jun ikbej tu' ayin, tol ay wiquisal yul wet.

²⁷Max yak' c'apax can wikbej in beyc'ulnen masanil anima, yujtol ayin ton Chekbilintek yuj Cham xol eb jet animail.

²⁸Manchak c'ayaj e c'ul yuj juntzan tzet chi wal ayex ti', yujtol ay jun tiempoal yet yajtok tu' ok yab eb mukanxa yaj waw.

²⁹Axa yaj wan eb tu'. A eb watx' tzet max ec' yun bay yulyibank'inal ti', ok ictzonelay aj eb, axa chaon eb is k'inal tol ayc'al yin tojbalk'inal tu'. Axa eb yob max ec' yut ba xin, ok ictzonelay c'apax aj eb, palta ok tokcan eb bay yailal yin junelnej.

³⁰Ayin ti', c'am junok tzet yetal chi je' wunen yul wet. Axca chi yut yalon in Mam ayin, caytu' chi yun in beyc'ulnewi. Bayc'al ijan chi yun in beyc'ulnewi, yujtol manak tzet chi cha in c'ul chin saya', palta a tzet chi cha c'ul Cham cheknejintek, a ton in Mam.

³¹Ta ayinc'al chi wak' testigoal in ba, yet chi waloni tol ay wikbej, c'am yelapnok tzet chi wal tu'.

³²Palta ay wal junxa chi yak' ba testigoal yin wikbej. A jun tu', wojtak tol caw yel chi yala'.

³³A yet max bet e yak' k'anlelay el bay Juan tzet yikbej, yelc'al tzet max yal win tu'.

³⁴Ayin ti' c'am chi waoc yipok in c'ul tzet chi yal anima win. Toc'al chin jek e na' tzet max yal Juan ayex, yet watx' chex colchaji.

³⁵A Juan tu', lajan axca junok tzektebal ow chaw yakan, yuj tu', max ex tzaloj jayeb c'u yetok.

³⁶Palta ay wal tzet ec'ban yelapnok yintak is k'anej Juan tu'; a' chi tx'oxk'abnen el wikbej. Yujtol a juntzan tzet yetal chi yak' in Mam wunej, a chi wunej. Caytu' chi yun txecloj elok tol a in Mam tu' cheknejintek.

³⁷Yetok c'apaxok, a in Mam, Cham cheknejintek tu', chi yak' ba testigoal win. Ayex ti', c'am junelok max e yab yoc yul nuk' k'anjabi. C'am bay max e yil yin junelok.

³⁸Maj e yaoc is k'anej yin e c'ul, yujtol maj e yaoc e c'ul win, ayin chekbilintek yuj ti'.

³⁹Yelc'ulal ton che cuy tx'an Un Tz'ibbilcanok, yujtol a e naoni, tol a tu' ok ilchaj e k'inal tol ayc'al yin tojbalk'inal, palta caxc'al chi yaltek tx'an Un tu' wabixal,

⁴⁰c'am chi yal e c'ul chex jay pax ayin yet che cha e k'inal tu'.

⁴¹C'am yelapnok yul in sat watx'ilal chi yal eb anima win.

⁴²Ayex ti', wojtak e nabal, c'am che camc'ulnej Dios.

⁴³Ayin ti', a in Mam cheknejintek, palta c'am chin e cha'. Ta ay junokxa mactxel chi jay yul yet, a jun tu' bian, ok e cha'.

⁴⁴Ayexc'al oc che mimannej e ba junjun ex, cax c'am che yochej chex mimanbilnelay yuj Cham Dios acaw yel, xan tokwal ok je' in e yaon oc yin e c'ul.

⁴⁵Manchak e na' tol ayin ok walaj e yobtakil bay in Mam. Ay junxa ok alon aj e yobtakil bay, a ton Moisés, cham che tz'ak e yaoc yipok e c'ul.

⁴⁶K'inalok ta che yaoc yin e c'ul tzet tz'ibbilcan yuj Moisés tu', chi mi e yaoc e c'ul win, yujtol wabixal max tz'ibejcanok.

⁴⁷Ilab c'am che yaoc yin e c'ul tzet tz'ibbilcan yuj tu', xan ¿tzet wal ok e yut e yaon oc yin e c'ul yin tzet chi wala'? ẍi Jesús bay eb.