Read Q'anjob'al Jn 6 Bible Online

Jn 6 - Q'anjob'al bible

Jn 6

¹Lajwi tu xin, max toj Jesús bay junxa k'axepal a' mar Galilea. Chi yik c'apax a' mar tu' Tiberias.

²Xiwil anima max oc tzakan yintak, yuj max yil eb juntzan milagro max tx'oxo', yet max yak'on jaycan c'ul eb ya'ay.

³A Jesús max toj yetok eb is cuywom bay jun tzalan, cax max ay chotan yetok eb bay tu'.

⁴Toxa chi jay tiempoal is k'in Pascua eb yet israelal yet tu'.

⁵Axa max yilon Jesús xiwil anima chi jayoc bay. Yuj tu' max yal bay Felipe axca ti': —¿Baytal laj ok co man low juntzan anima ti'? ẍi bay.

⁶Palta toc'al max k'anlej axca tu', yet watx' chi yabej tzettax chi yal Felipe tu' bay, yujtol yojtakxa Cham tzet ok yutej.

⁷Axa tak'wi Felipe tu' bay axca ti': —Caxc'al mi ay 200 denariook*fn* loj ayic' juj, tok ok yab xol eb, cax chi yion eb masanil jab jabok yet, ẍi.

⁸Palta ay junxa cuywom Jesús chi yik Andrés, yuẍtak ba yetok Simón Pedro, a' max alon bay Jesús axca ti':

⁹—Ay jun nak unin ayic' co xol ti', ay oyeb is pan cebada nak ibil, yetok cac'on is yaliẍ txay, palta tokwal ok yab jab ti' xol masanil anima. Ilab caw wal xiwil eb, ẍi bay Jesús.

¹⁰Max lajwi tu xin, max yalon Jesús bay eb is cuywom tu': —Alek bay eb anima tu', tol chi ay chotan eb masanil, ẍi bay eb. Max yiken eb yay chotanok. Ay mi oyebok mil winak. A jun lugar bay ayic' eb tu', ay yac'unal.

¹¹Max chaon ec' Jesús ixim pan tu', cax max yalon yuj diosalil bay Dios yuj ixim. Max pojon ec' xol eb is cuywom tu', axa eb max ec' pojon xol eb max ay chotan tu'. Cay c'apax tu' max yut no txay, yalc'al jantak max yochej c'ul eb.

¹²A yet max xew low eb sic'libil, max yalon Jesús bay eb is cuywom tu' axca ti': —Siq'uek aj masanil ixim bijquiltakil maxto cani, yet watx' c'am jabok ixim chi etaxi, ẍi bay eb.

¹³A yet max lajwi ec' yion aj eb ixim, lajcawebto motx max nojcan yuj sobrail ixim oyeb pan cebada tu'.

¹⁴Masanil eb anima tu' max ilon jun milagro max tx'ox Jesús, yuj tu' xan max yal eb: —A ton jun chekbej Dios ti' echbanebil jay juj bay yulyibank'inal ti', ẍi eb.

¹⁵Palta yojtakxa Jesús tol chi yochej eb chi mitx'a', cax chi yak'on pural eb yaon oc is reyalok; yuj tu' max el xol eb, axa toj tx'oklil bay jun tzalan tu' junelxa.

¹⁶Axa yet lananxa k'ekbi, max toj eb cuywom Jesús ti a' mar.

¹⁷Max oc eb yul barco, max t'inlonen ec'tok ba eb bay conob Capernaum bay ti a' mar tu'. Caw wal k'ektaninakxa yet max toj eb. A pax Jesús xin, c'amto chi jay bay eb.

¹⁸Ipan bey eb yiban a' tu', cax max tit jun miman cak'ek' caw wal ow. Axa yaj pomnaj a' mar tu' yuj jun miman cak'ek' tu'.

¹⁹Ayxam nanok is cab leguaxa bay ay eb, max yilontek eb tol ipan yapni oc Jesús yintak eb. Toc'al chi bey yiban a'. Yuj tu', caw wal max xiwaj eb.

²⁰Palta max yal Cham bay eb axca ti': —Ayin toni, manchak ex xiwi, ẍi bay eb.

²¹Catatu' yin masanc'ulalil max chaon octok eb Cham yul barco yetok. Ayman max ec' apnok eb k'axepal a' mar bay lanan toj eb tu'.

²²Ayc'al ec' eb anima max ak'lay low tu' yin yewial bay junxa k'axepal ec' a' mar. Axa naontek eb tol junch'an te barco k'axpojnak ec'ok. Max yil eb tol asan ch'an eb cuywom Jesús max toj yul te', cax maj octok Jesús yetok eb.

²³Palta ay juntzan te barco max tit bay conob Tiberias, cax max jayoc te' cawilal jun lugar bay max lolay ixim pan yet max yak'on Cham Jajawil yuj diosalil yuj ixim.

²⁴Axa yilontek ba eb anima tu', c'amxa ec' Jesús yetok eb is cuywom xol eb. Axa yoc eb yul juntzan barco tu', cax max toj eb sayon ec' Cham bay conob Capernaum.

²⁵Axa yet max ec'apnok eb anima tu' k'axepal ec' a' mar tu xin, max ilchaj oc Jesús yuj eb. Axa k'anlen eb bay tu' axca ti': —Meẍtol, ¿bak'ini max ach jay cayti'? ẍi eb bay.

²⁶Axa yalon bay eb tu': —Wal yel chi wal ayex, asan yuj max noj e c'ul yuj max wak' pan e lo', xan chin ul e sayic'ok. Man yujok tol max e yil juntzan milagro max in tx'oxo'.

²⁷Manokabnak tzet chi co lo' che yaoc e nabal e sayoni, yujtol toc'al chi lajwi ayok. Ay wal junxa tzet yetal axca tzet chi co lo' tu', palta c'am bak'in chi lajwi. A chi ak'on e k'inal tol ayc'al yin tojbalk'inal. Yuj tu' xan aokab jun tu' che yiajtek e c'ulok e sayoni. Ayin ok wak' jun tu' ayex, yujtol Chekbilintek yuj Dios xol eb jet animail; max in tx'oxk'abnej c'apax el co Mam Dios, ẍi Jesús bay eb.

²⁸Axa k'anlen eb bay tu': —¿Tzet chi yun jiken jun tzet chi yochej c'ul Dios chi jun tu xin? ẍi eb bay.

²⁹Tix chi yut yochen Dios che yun ti': Chi yochej tol che yaoc e c'ul win, yujtol Chekbilintek yuj, ẍi Jesús bay eb.

³⁰Lajwi yaben eb jun tu', max k'anlen pax eb bay junelxa axca ti': —¿Tzet wal milagroal junok cha tx'ox ayon xin, cax chi jaon oc co c'ul en? ¿Tzet chi je' oj?

³¹A eb jichmam, ay jun milagro ilbil yuj eb yet payxa, yet max loon eb maná*fn* bay tz'inan tx'otx', axca yalon tx'an Un Tz'ibbilcanok: A' anejtek satcanil loj yuj loon eb, ẍi tx'an Un tu', ẍi eb bay Jesús.

³²Yuj tu' xan max yal Jesús bay eb: —Wal yel chi wal ayex, manak Moisés ak'nej jun satcanil loj tu' bay eb, palta a in Mam, a' chi aontek jun acaw loj chi tit satcan tu'.

³³Yujtol a jun loj chi wal tol chi yak' Dios ti', a bay satcan max aytek. Ay eb bay yulyibank'inal ti' ok cha' k'inalej tol ayc'al yin tojbalk'inal yuj, ẍi Jesús bay eb.

³⁴—Mamin, ak'c'al jun loj tu' ayon masanil tiempo, ẍi eb bay Cham.

³⁵Axa yalon bay eb tu': —Ayin ton ti' axca wal loj wayji, yujtol ak'om in k'inalej. A eb chi jay ayin, c'amxa oxlajon bak'in ok tit is wajil eb. A eb chin yaoc yin is c'ul, c'amxa chi tit c'apax takintial eb.

³⁶Palta axca ta' max yun walon ayex, caxc'al chin e yila', tok yuj tu' che yaoc e c'ul win.

³⁷Masanil eb chi yak' co Mam Dios ayin, ok jayoc eb ayin. A eb chi jayoc ayin tu', c'am junok eb man ok in cha'.

³⁸Ayin ti' max in tit satcan yuj ul wunen yochwan Cham cheknejintek. Man yujok ul wunen wochwan yul wet, xan max in tita.

³⁹A in Mam cheknejintek, chi yochej c'ul tol c'am junok mac xol eb chi yak' ayin ti', ok c'aycan elok. Chi yochej tol ayin ok wak' ictzoj aj eb yet lajub c'ual.

⁴⁰Ayin ti', C'ajol in Dios; yuj tu', a masanil mac chin iloni, ta chin yaoc eb yin is c'ul, chi yochej in Mam chi cha'can eb is k'inal tol ayc'al yin tojbalk'inal. Yuj tu' xan ayin ok wak' ictzoj pax aj eb yet lajub c'ual tu', ẍi Jesús bay eb.

⁴¹A yet max yaben aj eb aj Judea juntzan tu', yob max yal eb yin, yujtol max yal Jesús jun ti': Ayin ton axca loj wayji, cax a bay satcan max in aytek, ẍi bay eb.

⁴²Yuj tu' max yal eb axca ti': —Palta a nak ti', a ton nak Jesús, nak c'ajol José. Jojtak is mam c'al is txutx nak. Palta lanannaj yalon paxok tol a bay satcan max aytek yaloni, ẍi eb aj Judea tu'.

⁴³Axa yalon Jesús bay eb tu': —Manchak in e yalubtanej.

⁴⁴C'am junok mac toc'al chi yak' jay ba ayin, ta manak in Mam cheknejintek chi ion jayok. A eb chi jay ayin tu', ok wak' ictzoj aj eb yet lajub c'ual.

⁴⁵Ay jun xol eb chekbej Dios tz'ibnejcan ay axca ti': Cax ok cuylay masanil anima yuj Dios, ẍicanok. Yuj tu', masanil mac chi yacbaj txiquin yaben tzet chi yal co Mam Dios, ta chi nachaj el yuj eb tzet chi yala', ok jay eb ayin.

⁴⁶Man lananok waloni tatol ay junok mac max ilon yin co Mam Dios, palta ayin ti', a bay max in tita, cax asannej in wojtak yili.

⁴⁷Wal yel chi wal ayex, a mac chin yaoc yin is c'ul, ay is k'inal tol ayc'al yin tojbalk'inal.

⁴⁸Ayin ti' axca tol loj in, yujtol ak'om in k'inalej.

⁴⁹A eb jichmam, lobil maná yuj eb bay tz'inan tx'otx', palta max cam eb masanil.

⁵⁰A pax mac chi loon jun loj max aytek satcan tu xin, c'am oxlajon bak'in ok cam eb.

⁵¹Ayin ton max in aytek satcan tu', lajan in axca loj, yujtol ak'om in k'inalej. Yuj tu', a mac chi loon jun ti', iquisc'al eb yin tojbalk'inal. A jun lajan axca loj chi wak' lolay tu', a ton in chibejal, ẍi Jesús bay eb.

⁵²Axa teyelen aj ba eb aj Judea tu' yuj tzet max yal tu', cax chi yalon eb axca ti': —¿Tzet ok yut yak'on jun winak ti' is chibejal co chi' is naoni? ẍi eb.

⁵³Axa yalon bay eb tu': —Wal yel chi wal ayex, ta c'am che chi' in chibejal ti', cax c'am che yuc' in chiq'uil ayin Chekbilintek yuj Dios xol eb jet animail ti', maj je' e chaon e k'inal.

⁵⁴Palta tzanc'al mac ok chion in chibejal ti', cax ok yuq'uen c'apax in chiq'uil ti', ay is k'inal eb yin tojbalk'inal. Ayinc'al oc ok wak' ictzoj aj eb yet lajub c'ual.

⁵⁵Yujtol a in chibejal ti', caw lajan axca loj, c'al in chiq'uil ti', lajan axca tzet chi uc'layi.

⁵⁶Tzanc'al mac ok chion in chibejal ti', cax ok yuq'uen c'apax in chiq'uil ti', chi ayjic'al ec' win, cax chin ayji c'apax ec' yin.

⁵⁷A co Mam Dios iquisc'al Cham yul yet, a Cham cheknejintek. Yuj Cham xan iquis in c'apaxok. Cay c'apax tu', a mac chi chion in chibejal ti', ok wak' is k'inal tol ayc'al yin tojbalk'inal.

⁵⁸A jun axca loj max aytek satcan chi waltek ti', man lajanok axca maná, tol lobil yuj eb jichmam yet payxa. Mimanok tol max lo eb, palta ilab camnak pax eb. Palta a mac ok loon jun axca loj ti', ok cha eb k'inalej tol ayc'al yin tojbalk'inal, ẍi Jesús bay eb.

⁵⁹A juntzan cuybanilej ti', a bay nail culto bay conob Capernaum, a tu' albil yuj.

⁶⁰A yet max yaben eb is cuywom juntzan k'anej tu', xiwil eb max alon axca ti': —Caw wal ya' yoc jun chi yal tu'. ¿Mac ok cha c'ul yabeni? ẍi eb.

⁶¹Palta max yojtaknej el Jesús tzet yetal lanan yalon eb, yuj tu' xan max yal bay eb axca ti': —¿Tom chi somchaj el e nabal yuj juntzan k'anej chi wal ti'?

⁶²Akxa tatol che yil in paxaj bay max in tita, ayin Chekbilintek yuj Dios xol eb jet animail ti'.

⁶³A Espíritu chi ak'on k'inalej tol ayc'al yin tojbalk'inal, axa co mimanil ti xin, c'amc'al bay chi oc tz'aanok. A juntzan k'anej chi wal ayex ti', wal yel yet Espíritu. Yuj tu' xan a chi je' yak'on e k'inal tol ayc'al yin tojbalk'inal.

⁶⁴Palta ay jaywan ex c'am chin e yaoc yin e c'ul, ẍi Jesús bay eb is cuywom tu'. Caytu' max yut yalon Jesús bay eb axca tu', yujtol yojtakxa yet yichbanil mactak txel eb man t'inanok yaon oc c'ul yin. Yojtakxa c'apaxok mactxel jun t'inan yaon oc Cham yul k'ab camich.

⁶⁵Max yalon c'apax axca ti': —Yujtol ayex c'am che yaoc e c'ul win, yuj tu', max wal ayex, tol c'am junok mac toc'al chi yak' jay ba ayin, ta manak in Mam chi ion jayok, ẍi Jesús bay eb.

⁶⁶Yettaxc'al tu xin, xiwil eb is cuywom tu' max meltzoj yintak junelxa. Majxac'al yal c'ul eb max tzakloj yintak Cham.

⁶⁷Yuj tu', max k'anlej Jesús bay eb lajcawan is chekbej axca ti': —¿A pax ex ayex ti', ma che yochej chex meltzoj e yintak c'apaxok? ẍi bay eb.

⁶⁸Xan max tak'wi Simón Pedro tu' bay axca ti': —Mamin, ¿mac wal junokxa ok on tok yetok? Yujtol a yin juntzan k'anej chal ayon ti', a tu' ay co k'inal tol ayc'al yin tojbalk'inal.

⁶⁹Ayon ti', toxa max ach jaoc yin co c'ul. Jojtak tol ach ti', Sic'bil ach el yuj Dios, ẍi Pedro bay.

⁷⁰Axa yalon Jesús bay eb axca ti': —Ayex lajcawan ex ti', ayin max ex in sic'can elok, palta ay jun e xol tol chekbej diablo yayji, ẍi bay eb.

⁷¹Yuj Judas c'ajol Simón Iscariote, xan cay tu' max yut yaloni, yujtol a Judas tu' t'inanc'alta' yalay oc Cham yul k'ab camich yuj, palta ti pax yet cuywomal ba yetok eb usluc'wanxa tu'.