Read Q'anjob'al Jn 8 Bible Online

Jn 8 - Q'anjob'al bible

Jn 8

¹A pax Jesús xin, max tojcan bay tzalan Olivolak.

²Ato yet max k'inibi aj yet junxa c'ual, max jay pax bay templo Dios junelxa. A yet max jay tu', masanil eb anima max jay c'atan. Max ay chotan Cham cuyon eb.

³Ay jun ix ix lanan wal mulji max michchaj elok, cax max yiontek eb fariseo c'al eb meẍtol yin ley Moisés ix ix tu' satak Jesús, c'al satak eb ayic' abxalwok bay Cham.

⁴Cax max yalon eb bay Cham axca ti': —Meẍtol, a jun ix ti', lanan wal mulji yet max ilchaj elok.

⁵A ley Moisés chi aloni, tol a eb ix ix caytu' beybal axca ti', yowalil chi k'okch'ennelay cam eb. Axa ach ti', ¿tzet cachi? ẍi eb bay.

⁶Palta toc'al max tz'ak k'anlej eb axca tu', yuj yak'lay porobal Cham yuj eb, yujtol max yochej eb chi yak' queja Cham. A Cham xin, toc'al max ay nojanok, cax max tz'ibli ay yetok yiximal k'ab sat tx'otx'.

⁷Axa k'anlen wal el eb bay tu' axca ti': —¿Tzet wal chi yun jun ti xin? ẍi eb bay. Yuj tu', max aj wanok, cax max yalon bay eb axca ti': —Ta ay junok ex c'am jabok e mul, aokab jun tu' chi babji k'okon oc ch'en ch'en yin ix, ẍi bay eb.

⁸Max lajwi yalon axca tu', max ay pax nojan junelxa, cax max tz'ibli ay junelxa sat tx'otx'.

⁹A yet max xew yaben eb tzet max yal tu', max naon ba junjun eb, tol ay is mul eb. Yuj tu' xan junjunalxac'al max yun pax eb. A eb ichamtak winak max babji yeltok, cax tzakan yeltok eb ach'ej. Tx'oklilxac'al Jesús max can bay lecan oc ix ix tu'.

¹⁰Lajwi tu xin, max aj wan Jesús. Axa max yiloni, tx'oklilxac'al ix ix tu' lecancan ocok; max yalon bay ix axca ti': —Txo ix, ¿baytal ay eb chach ak'on queja tu'? ¿C'am mi junok eb max ak'on low en? ẍi bay ix.

¹¹—C'amak Mamin, c'am junok, ẍi ix. —Tamwal in c'apaxok, maj wak' low en. Asi', manchakxa a say a mul junelxa, ẍi Jesús bay ix.)*fn*

¹²Axa yalon Jesús xol eb anima tu' axca ti': —Ayin ti', axca sakk'inal wayji xol eb jet animail bay yulyibank'inal ti'. A mac chi oc in cuywomok, ok wak' sakk'inal bay yanimail. Yuj jun sakk'inal tu', xan ok cha' eb is k'inal tol ayc'al yin tojbalk'inal. Majxa ec'jab eb xol k'ekk'inal, ẍi Jesús.

¹³Axa yalon eb fariseo bay axca ti': —Ach ti', yulc'al et chaloni tol ay ekbej. Yuj tu' xan c'am yelapnok jab et chal tu', ẍi eb bay.

¹⁴Xan max yal pax Cham bay eb axca ti': —Caxc'al mi yulc'al wet chi waloni, tol ay wikbej; palta acaw yel chi wala', yujtol ayin ti' caw wal wojtak bay max in tita. Yetok c'apaxok, wojtak bay ok in tok. Ayex ti' man e yojtakok bay titnak in, tamwal bay ok in tok.

¹⁵Ayex ti' toc'al che comon beyc'ulnej junok mactxel yin ayman. Ayin ti', c'am mac chin beyc'ulnej.

¹⁶Palta k'inalok ta ay mac chi wochej chin beyc'ulnej, bayc'al ijan chi wut in beyc'ulneni, yujtol man in tx'oklilok chin beyc'ulnewi. Ajun in Mam wetok, Cham cheknejintek.

¹⁷A co ley ayic' yul co k'ab chi aloni, tatol ay cawanok testigo lajanc'al yaloni, yowalil chi co cha jab tzet chi yal eb.

¹⁸Palta ilabi, ay cawan mac chi yak' ba testigoal win. Chi wak' in ba testigoal win; testigo c'apax in Mam wetok, Cham cheknejintek, ẍi bay eb.

¹⁹—Palta, ¿baytal ay a Mam tu xin? ẍi eb bay. Max yalon bay eb axca ti': —Ayex ti', man e yojtakok mac in txel. Man e yojtakok c'apax in Mam. K'inalok ta e yojtak mac in txel, e yojtak c'apax mi in Mam, ẍi bay eb.

²⁰A yul yamak'il templo Dios, bay cawilal chabal ofrenda, a tu' max yal Jesús juntzan ti'. A tu' max cuywaj xol anima. C'am junok mac max oc lacan yin, yujtol c'amto chi jay is c'ual cami.

²¹Max yal Jesús bay eb junelxa: —Ok in tok ayin ti'. Okto in e sayic'ok, palta yin e yobtakil ok ex camok. Man ok je' tol comonc'al ok ex apnok bay ok in tok tu', ẍi bay eb.

²²Yuj tu' xan max yal eb yajaw bay Judea tu' axca ti': —Tekan tol ok yak' cam ba jun winak ti', xan chi yala' tol man ok je' japni bay ok apnok tu', ẍi eb.

²³Axa yalon pax Jesús bay eb tu': —Ayex ti', aj sat tx'otx' ex, yujtol yet ex yulyibank'inal ti'. Ayin ti', mayin yetok yulyibank'inal ti', yujtol aj satcan in.

²⁴Yuj tu' xan max wal ayex tol yin e yobtakil ok ex camok. Ta c'am che yaoc yin e c'ul, tol ayin toni, yin e mul ok ex camok, ẍi bay eb.

²⁵—¿Mac ach wal txel xin? ẍi pax eb bay. Axa yalon tu': —Albilxa wuj ayex yettax yalantok mac in txel.

²⁶Xiwiltoc'al tzet chi je' walontek e yin c'al ex in beyc'ulneni. Palta a Cham cheknejintek, caw wal yel chi yala'. A tzet yalnak ayin, asan chi wala', ẍi bay eb.

²⁷Palta maj nachaj el yuj eb, ta a co Mam Dios chi yala'.

²⁸Yuj tu' xan max yal pax bay eb axca ti': —Ato yet ok in e locban ajok, cax ok nachaj el e yuj, tol ayin ton Chekbilintek yuj Dios xol eb jet animail. Catatu' ok e yojtaknen elok, tol c'am tzet yulc'al wet chi wunej. Asan juntzan cuybanilej yalnak in Mam ayin, a' chi wala'.

²⁹A Cham cheknejintek tu', a' ayoc wetok. A in Mam c'am chin is bekcan in tx'oklil, yujtol a tzet chi cha c'ul, a' chi wun masanil tiempo, ẍi bay eb.

³⁰A yet max yalon juntzan ti', xiwil eb max yaoc c'ul yin.

³¹Axa yalon Jesús bay eb israel max yaoc c'ul yin axca ti': —Ta ayc'al oc e nabal masanil tiempo yin tzet chi wala', a caw in cuywom ex ton sic'libil.

³²Cax ok e yojtaknen el k'anej tol caw wal yel. Yuj jun k'anej yel tu', xan ok ex bekchajok, ẍi Jesús bay eb.

³³Axa yalon pax eb bay tu': —Ayon ti', yinatil on Abraham. C'am junelok chon oc mosook junok anima. Yuj tu xin, ¿tzet yuj xan chala' tol ok on bekchajok? ẍi eb.

³⁴—Wal yel chi wal ayex, tzanc'al mac tol ac'ala' yunen yobtakil, caw wal ayoc eb mosook yobtakil tu'.

³⁵K'inalok ay junok mac ayoc mosejal bay junok anima tinani', a jun mosejal tu', c'am chi je' cajay yetok jun anima tu' junelnej. Palta a junok is c'ajol junok anima tu', caw wal is c'ajol ton junelnej.

³⁶Yuj tu' xan ta ayin chex wak' bekchaj can el yin e yobtakil, wal yel ok ex ton bekchajok, yujtol C'ajol in Dios.

³⁷Ayin ti' wojtak toni, tol yinatil ex Abraham; palta ilab che yochej chin e yak' pax camok, yujtol a tzet chi wal ayex, c'am yelapnok yul e sat.

³⁸A tzet ilbil wuj bay in Mam, a' chi wal ayex. Ayex ti', tx'ok e mam. A yochwan e mam tu' che yunej, ẍi Jesús bay eb.

³⁹—Palta ayon ti', yinatil on Abraham, ẍi eb bay. —Matawal yel yinatil ex Abraham tu'. Ta yel yinatil ex, ami yunben che yunej.

⁴⁰Asan juntzan tzet yetal yel albil yuj Dios ayin, a' chi wal ayex, palta ijan che yochej pax chin e yak' camok. A Abraham tu', c'am junelok caytu' max yut ba.

⁴¹Axa ayex ti' xin, a tzet chi yun e mam, a' che yun yetok, ẍi Jesús bay eb. —Palta ayon ti', mayon mitz' winakok. Junnej co mam, a ton Dios, ẍi eb bay.

⁴²Matawal yel tol a Dios e mam. Ta yel a Dios e Mam, ay mi e camc'ulal win, yujtol a bay Dios max in tita, cax max in jay cayti'. Man toc'alok max in jay yul wet, a Dios max in chekontek.

⁴³¿Tzet xan c'am chi nachaj el e yuj tzet chi wal ayex ti'? Tekan tol c'am chi yal e c'ul che cha e yab tzet chi wal ti'.

⁴⁴A e mam ayex ti', a ton nak diablo, yuj tu' xan asan yin che yaoc e nabal. Asan tzet chi yochej nak che yunej. Mak'om cam animaxa nak yettax max esnelay yulyibank'inal ti'. C'am jabok yelapnok junok tzet yetal yel bay, yujtol c'am junok tzet yetal yel chi yala'. A yet chi yak'on junok lek'tial, a bay is nabal chi tita, yujtol caw wal lek'ti'. A' ay yet masanil lek'tial.

⁴⁵Axa ayin ti xin, caw wal yel juntzan tzet yetal chi wal ayex, palta c'am che cha' pax e yabej.

⁴⁶¿Mac junok ex chi je' e tx'oxon oc jabok in yobtakil? Caw wal yel juntzan chi wal ayex ti', yuj tu', ¿tzet xan c'am che cha pax e yabej?

⁴⁷A eb yet Dios, chi yacbaj eb is txiquin bay is k'anej, palta ayex ti', mayex yetok Dios. Yuj tu', c'am chi yal e c'ul che yacbaj e txiquin bay, ẍi Jesús bay eb.

⁴⁸Cax max yalon pax eb aj Judea tu' bay axca ti': —Ila xin, yel chi jala'. Tekan tol aj Samaria ach. Tekan ay junok espíritu yob ayoc en, ẍi eb bay.

⁴⁹—C'amak, c'am junok espíritu yob ayoc win. Tol lanan wion aj can in Mam. Toc'al chex buchwaj win ayex ti'.

⁵⁰Ayin ti', c'am chi wochej tol mimanxac'al welapnok; palta ay jun mac chi aloni tol miman welapnok yul sat. A Cham tu' chi beyc'ulnen mac yel chi yala'.

⁵¹Wal yel chi wal ayex, a mac chi iken tzet chi wala', c'am bak'in ok cam eb, ẍi Jesús bay eb.

⁵²—A tinani', caw wal jojtak sic'libil tol ay junok espíritu yob ayoc en. A Abraham, yetokc'al eb chekbej Dios yet payxa, max cam eb masanil, cax chalon paxok: Ta ay mac chi iken tzet chi wala', c'am bak'in ok cam eb, cachito wal paxok.

⁵³¿Tom ec'ban ekbej yintak jichmam Abraham tu', c'al yintak eb chekbej Dios yet payxa? Palta ilabi, max cam pax eb tu'. ¿Mac ach txel a naon tinani'? ẍi eb bay.

⁵⁴Yuj tu' xan max yal bay eb axca ti': —Ta yulc'al wet chi wiaj can in ba, c'am jabok welapnok, palta a in Mam chi aloni tol ay welapnok. A ton in Mam che yaloc e Diosalok.

⁵⁵Palta mimanokc'al che yaloc Cham e Diosalok. Man e yojtakok Cham. A pax ayin ti xin, caw wal wojtak Dios. K'inalok ta chi wala' tol man wojtakok, lek'ti in mi axca ex tu'. Palta wal yel, wojtak Cham. A tzet chi yala', a' chi wikej.

⁵⁶A jichmam Abraham, max tzaloj ajok, yujtol t'inan chi yil in jayi. Max ton yila', xan max yak' tzaloj c'ul, ẍi bay eb.

⁵⁷—Achxa ti' tokwal ayachxa yin 50 abil, ¿tzet wal max yun elon yin cham Abraham? ẍi eb bay.

⁵⁸—Wal yel chi wal ayex, a yet c'amto chi alji Abraham tu', ayinxa ec' ayin ti', ẍi Jesús bay eb.*fn*

⁵⁹Max lajwi tu xin, max c'oli sic'on aj eb ch'en, cax max yochen eb max k'okch'ennej camok. Max c'uban el ba Cham bay eb, cax max eltek yul templo Dios.