Read Q'anjob'al Hch 10 Bible Online

Hch 10 - Q'anjob'al bible

Hch 10

¹Ay jun winak bay conob Cesarea chi yik Cornelio. A jun winak tu', yajawil jun bulan eb soldado chi yik Aj Italia.

²Caw wal ayoc Dios yin c'ul jun winak tu'. Ay is xiwc'ulal bay Dios, yetok masanil is familia. Xiwilc'al tzet chi el saon bay eb meba' xol eb israel. Caw wal chi yiajtek c'ulok txajli bay Dios.

³A yet junel, axca wayich max yut yilon jun tzet yetal yet jantak mi a las tres yet lajwi chuman. Ay jun yángel Dios max jayoc bay jun cuarto bay ayic' tu'. Max yalon bay axca ti': Cornelio, ẍi bay.

⁴Axa yoc t'anan Cornelio tu' yin, caw wal max xiw yuj. ¿Tzet ẍi, Mamin? ẍi bay. Axa yalon bay axca ti': Mayal yab Dios a txaj. Mayal c'apax yil a sabal bay eb meba'. Maj tok c'ayc'ulal juntzan ti' yuj Cham.

⁵A tinani xin, chektok jaywanok winak bay Jope, cax chi toj yion eb Simón, nak chi yik Pedro.

⁶A tu' ayic' bay yatut nak chi ikon c'apax Simón, nak watx'nem tz'um. A yatut nak tu' a tu' ay bay ti a' mar, ẍi jun ángel tu' bay.

⁷Lajwi toj jun ángel tu xin, max yawtentek cawan eb is moso, yetok jun soldado yak'omal serbil. A jun soldado tu', asan yin Dios ayoc nabal.

⁸Masanilc'al tzet max al-lay bay yuj jun ángel tu', pilanc'al max yal bay eb. Lajwi tu' max cheklaytok eb yuj bay conob Jope.

⁹Yewial tu xin, yet chumanxa c'u, lananxa yapni oc eb cawilal Jope tu', cax max ajtok Pedro txajlok yiban pananil*fn* yatut Simón tu'.

¹⁰Yet ayxa ajtok bay tu', max c'oli tit is wajil, cax max k'anon low ba, palta yak'ban chi watx'nelay is lobej, ay tzet max ak'i yil axca junok wayichej.

¹¹Cax jakan satcan max yila'. Ay jun tzet axca junok miman sábana max ulaytek. Ayc'al oc pixil canebal txiquin, max ayol bay pananil yiban te na bay ayajtok Pedro tu'.

¹²A yul jun axca sábana tu' ayoctok masanil makan no no' caneb yakan, no labaj, c'al no' chi ec' jenenok.*fn*

¹³Lajwic'al yayol t'ununok xin, max yaben Pedro tu' yoc jay belan k'anej ti': Pedro, ajan wanok. Ak' cam juntzan no ti', cax cha chioni, ẍi.

¹⁴Max yalon Pedro tu' axca ti': C'amak Mamin, yujtol c'amto junelok chin lo' ma chin chi' junok comon tzet yetal, c'al junok tzet ay yowalil yuj ley Moisés, ẍi.

¹⁵Yuj tu' xan max yal junelxa axca ti': A tzet chi yal Dios tol c'am yowalil, manchak ak' yowalil ach ti', ẍi.

¹⁶Oxel max yun jun tu'. Max lajwi tu xin, max ilay paxaj jun axca sábana tu' satcan.

¹⁷Lananto naon Pedro tzet yayji juntzan max ak'i yil tu', max jayoc eb chekbej Cornelio ti' na. Lanan k'anlen eb bay ay yatut Simón tu', yet max titc'al eb yulak be.

¹⁸Max jayoc eb xin, max k'anlen eb axca ti': —¿A mi cayti' ayic' Simón, nak chi yik c'apax Pedro? ẍi eb.

¹⁹Ac'ala'toc'al naobtanen Pedro tzet yayji juntzan max ak'i yil tu', cax max yalon Cham Espíritu Santo bay axca ti': Ay oxwan winak chach k'anlen ec'ok.

²⁰Ajan wanok, cax chach aytok. Asi' yetok eb. Aoc yin a c'ul a toj yetok eb, yujtol ayin max in chektek eb, ẍi bay.

²¹Yuj tu' xan max ayol bay ayic' eb chekbej Cornelio tu', cax max yalon bay eb axca ti': —Ayin ton chin e k'anlej ec'ok, xan tix in ti'. ¿Tzet ẍi e chekbanil ayin, xan chex jayi? ẍi bay eb.

²²Axa yalon eb axca ti': —Ay jun cham chi yik Cornelio, yajawil eb soldado. Caw wal watx' is beybal cham. Chi xiw cham bay Dios. Watx' cham yul sat masanil eb et israelal. Ay is camc'ulal eb yin. Ay jun yángel Dios max alon bay cham, tol chi chektek cham is chekbej yet chach ul yitok, cax chach toj bay na, yet watx' chi yabcan oc tzet ok al bay, ẍi eb bay Pedro tu'.

²³Axa yilay oc eb yul na yuj Pedro tu'. A tu' max way eb, axa yet junxa c'ual, max toj yetok eb, max toj c'apax jaywan creyente aj Jope yetok eb.

²⁴Yewialxa tu', max apni oc eb bay conob Cesarea. Echbanebil yapni eb yuj Cornelio tu'. Wajanxa ec' jantak eb yican, c'al jantak eb yamigo.

²⁵A yet max apni Pedro bay tu', max eltek Cornelio tu' chaoni, cax max ay jajnaj satak, max yion ay ba bay Pedro tu'.

²⁶Palta axa Pedro max quetzon aj wanok, max yalon bay axca ti': —Ajan wanok yujtol jet animail co ba, ẍi Pedro bay.

²⁷Lanan k'anjab eb max octok eb yul na. Axa yilon Pedro xiwil eb wajanxa ec'ok.

²⁸Axa yalon bay eb axca ti': —E yojtak, tol ayon israel on ti', ay leyal tol c'am chi je' co junanej co ba yetok junok tx'ok conobal. Ay leyal tol c'am chi je' chon oc yul yatut, palta max yak' Dios wojtaknej elok, tol c'am chi je' waloni ta ay junok mac tol c'am chi je' chin junanej in ba yetok.

²⁹Yuj tu' xan c'am tzet max wal yet max quin bet e yak'on titok. A tinani xin, chi wochej chi wabej, ¿tzet yuj xan max quin bet e yak' titok? ẍi bay eb.

³⁰Axa yalon Cornelio tu' bay axca ti': —Yab mi wal axca hora ti' yet oxji, lanan woc yin c'ajbanc'ulal. Lanan in txajli yul watut ti' yet tz'eyanxa c'u, cax ay jun mac max tx'oxaj ba ayin, caw wal chi tzekeki pichil.

³¹Max yal ayin axca ti': Cornelio, max yab Dios a txaj, cax max naontek juntzan a sabal chak' bay eb meba'.

³²A tinani xin, chektok jaywanok winak bay conob Jope, cax chi toj yiontek eb cham Simón, cham chi ikon Pedro. A tu' ayic' cham bay yatut nak chi ikon c'apax Simón, nak watx'nem tz'um. A yatut nak tu' a tu' ay bay ti a' mar, ẍi ayin.

³³Lajwi tu xin, axa in chekontok eb in chekbej tu' ach toj sayon ec'ok. Yuj wal dios ayach, max ekej a tita. A tinani', ayon ec' co masanil satak co Mam Dios yet watx' chi jab masanil tzet max chek Cham Jajawil al ayon, ẍi bay.

³⁴Axa chaon el Pedro yich k'anjab nan xol eb axca ti': —A tinani', wojtak tol wal yel, lajan yelapnok masanil anima yul sat Dios.

³⁵Tzanc'al mac ay yelapnok Dios yul sat, caxc'al man israelok, caw chi tzaloj yetok eb, asan tanej watx' is beybal eb.

³⁶A Dios ak'nejcan is k'anej ayon israel on ti'. Yalnakcan ayon, tol ay junc'ulal yetok Cham yuj Jesucristo, Cham tol Jajawil co masanil.

³⁷Ayex ti', e yojtakxa tzet max el yunen Dios bay co lugar ayon israel on ti'. A bay Galilea elnakcan yich, yet max lajwi yalon el Juan k'anej Dios, c'al yak'wi bautizar anima.

³⁸E yojtak, tol a Dios yak'nak Cham Espíritu Santo bay Jesús aj Nazaret, cax yak'nak c'apax ikbej bay. E yojtak c'apaxok tol colwajnak Jesús bay eb anima. Masanilc'al mac chi etax yuj nak diablo, pilan max watx'jican eb yuj. Max je' yunen masanil juntzan tu', yujtol ayoc Dios yetok.

³⁹Ayon ti', chi jak' co ba testigoal yin masanil tzet max el yunen bay Judea yetok bay conob Jerusalén; caw wal max jila'. Max lajwi tu', max locban aj eb jet israelal yin curus. Caytu' max yun yak'on cam eb.

⁴⁰Palta a yet yox c'ual tu', max yictzonej aj Dios, xan yuj is yipalil Cham max tx'oxaj ba ayon.

⁴¹Palta man masanilok anima bay max tx'oxaj ba. Asan ayon max tx'oxaj ba, yujtol atax payxa, sic'bil on el yuj joc is testigook. Cax max onto low yetok yet mayal ictzonelay aj xol eb camnak tu'.

⁴²Max yalcan ayon, tol yowalil chi ec' jalil yabixal bay eb anima, tol a Dios ak'nej yopiso beyc'ulnen masanil anima, eb iquis, c'al eb camnak.

⁴³Yet payxa, ayokto max yaloncan el eb chekbej Dios yabixal Jesús. Yalnakcan junjun eb, tol masanilc'al mac ok yaoc c'ul yin, ok ak'laycan lajwok yobtakil eb yuj, ẍi Pedro bay eb.

⁴⁴A yet lanan k'anjab Pedro tu', cax max ayol Cham Espíritu Santo yiban masanil eb chi abxalwi tu'.

⁴⁵Caw wal max c'ayaj c'ul eb creyente israel ajun yetok Pedro tu', yujtol max yak' c'apax Dios Yespíritu bay eb man israelok.

⁴⁶Max yab eb tol tx'ok tx'ok tiejal chi yal eb, cax max yaben c'apax eb yalon eb watx' k'anej bay Dios.

⁴⁷Lajwi tu', max yalon Pedro axca ti': —¿Chi mi wal je' tenlay oc wanaj eb ti', cax c'am chi yak' bautizar ba eb? Palta ilab tol max ak'lay Cham Espíritu Santo bay eb axca max yun yak'lay ayon, ẍi.

⁴⁸Yuj tu' xan max yal Pedro tol chi ak'lay bautizar eb yin bi Jesucristo. Lajwi yak'lay bautizar eb tu', cax max yalon eb bay, tol chi can jayebok c'u yetok eb.