Read Q'anjob'al Hch 13 Bible Online

Hch 13 - Q'anjob'al bible

Hch 13

¹A xol eb creyente aj conob Antioquía, ay juntzan eb chi yak' Dios yalil is k'anej, ay c'apax juntzan eb meẍtol: a ton Bernabé, yetok Simón, cham chi yik Niger, yetok Lucio aj conob Cirene, yetok Saulo. A c'apax jun Manaén, cham junnej ch'ibnak yetok Herodes, cham ayoc yajawil bay Galilea.

²A yet junel, lanan yoc culto satak Cham Jajawil, cax ay c'apax oc eb yin c'ajbanc'ulal, max yalon Cham Espíritu Santo bay eb wajan ec' tu' axca ti': Che siq'uil Bernabé yetok Saulo, cax ok oc eb yin mulnajil bay chi wawtej oc eb, ẍi bay eb.

³Max yak'on eb c'ajbanc'ulal, c'al txajli eb. Lajwi tu xin, max yaon ajtok eb k'ab yiban jolom Bernabé yetok Saulo, axa cheklaytok eb yuj eb tu'.

⁴Chekbiltok Bernabé yetok Saulo yuj Cham Espíritu Santo, xan max toj eb bay conob Seleucia. A tu' max oc eb yul jun barco, yuj toj eb bay Chipre.

⁵A yet max apni oc eb bay conob Salamina, max ec' yalcan el eb k'anej Dios yulak nail culto eb yet israelal bay tu'. Ajun Juan Marcos chi colwaj yetok eb.

⁶Lajwi tu' max toj eb, max k'axponej eb Chipre tu', cax max apni eb bay conob Pafos. A tu' max yil-lej el ba eb yetok jun nak israel, chi yik Bar-jesús. A jun winak tu', chi yaloc ba tol tz'akan c'ul. Chi tz'ak yala' tol a Dios chi ak'on yalil is k'anej.

⁷A jun winak tu', junnej ay yetok cham Sergio Paulo, cham yajaw bay Chipre tu'. Caw wal jelan nabal cham Sergio tu'. Max yawtejtek cham Bernabé yetok Saulo, yujtol chi yochej cham chi yab k'anej Dios bay eb.

⁸Palta nak chi yal tol tz'akan c'ul tu xin, chi yik c'apax Elimas, max teyelej ba yetok eb, yujtol maj yochej nak max yaoc Sergio tu' c'ul yin k'anej Dios.

⁹Axa Saulo chi ikon c'apax Pablo, tol ayoc yalan yikbej Cham Espíritu Santo, cax max oc t'anan yin nak Elimas tu',

¹⁰Max yalon bay nak axca ti': —Ach ti', caw wal chak' a nabal etnen anima. Caw wal a nabal. C'ajol ach nak diablo. Ajc'ul ach oc yin masanil tzet yetal watx'. Axa k'anej Cham Jajawil, yelc'al elok. Yuj tu xin, ¿tzet yuj xan c'am cha bekcan etneni?

¹¹A tinani', ay tzet ok jay eban yuj Cham Jajawil. Ok yak' c'ayil a sat junok tiempoal. Tamwal yakan c'u, majxa je' elon jabok, ẍi Pablo tu' bay. Yet wal jun bek tu', max c'ayil sat nak. C'amxa jabok tzet chi je' yiloni. Axa yec' matxatxok sayon ec' junok mac chi quetzon bey tu'.

¹²A yet max yilon cham yajaw bay Chipre tu' jun ti', max yaon oc cham c'ul yin Dios. Caw wal max c'ayaj c'ul cham yet max yaben juntzan cuybanil Cham Jajawil.

¹³Max el eb bay conob Pafos tu', max oc Pablo yul jun barco yetok eb ajun yetok, axa yapni eb bay conob Perge yul yet Panfilia. Axa Juan Marcos xin, max beklaycan eb yuj, cax max meltzoj bay Jerusalén.

¹⁴Lajwi tu xin, max el eb bay Perge tu', axa toj eb bay conob Antioquía yul yet Pisidia tu'.*fn* A yet c'ual xewilal max oc eb yul nail culto eb yet israelal eb, max ay chotjab eb yul tu'.

¹⁵Lajwi yawtelay ley Moisés yetok juntzan tzet tz'ibbilcan yuj eb chekbej Dios payxa, max yak'on eb yajawil nail culto tu' yal jun winak bay Pablo, c'al bay Bernabé axca ti': —Ex wet conob, ta ay junok tzet yetal che yochej che yak' cuy eb anima, chi je' e yalon tinani', ẍi bay eb.

¹⁶Axa yaj wan Pablo tu', max yak'on yechel yetok is k'ab, yet watx' chi cam yaben eb. Max yalon bay eb axca ti': —Ex wet israelal, c'al ex ay e xiwc'ulal bay Dios, abek.

¹⁷A co Diosal ayon israel on ti', a' sic'nakcan el eb jichmam. A yet ayic' eb nan xol eb tx'ok conobal bay Egipto, a' ak'nej ch'ib bisil eb, max occan eb mimek conobal. Lajwi tu', max yion eltek eb bay Egipto tu' yetok is yipalil.

¹⁸Cawinak abil max ak'layc'al techaj beybal eb yuj Dios bay tz'inan tx'otx'.

¹⁹Yetok c'apaxok, max yak' c'ayil ukeb conobal anima yul yet Canaán, cax max yak'can tx'otx' eb max c'aylay el tu' bay eb jichmam.

²⁰A yin masanil juntzan ti' max ec' 450 abil. Lajwi tu' max yaon oc Dios juntzan eb juez yuj yak'wi cuenta eb masantac'al yul is tiempoal Samuel is chekbej.

²¹Lajwi tu xin, max k'anon eb junok is reyal bay Dios, yet watx' a' chi ak'on cuenta eb. Yuj tu' xan max yak' Dios cham Saúl reyalok eb. A Saúl tu', c'ajol jun cham chi ikon Cis, yinatil Benjamín. Cawinak abil ocnak reyalok eb,

²²Max ilay el yin yopiso yuj Dios, axa David max occan q'uexelok, cham mac yalnaktek Dios axca ti': Max ilchaj David wuj, nak c'ajol Isaí. A jun winak ti', caw wal chin tzaloj yetok. Ok yun masanil tzet chi yochej in c'ul, ẍi.

²³A jun yinatil David tu' chi yik Jesús, a' chekbiltek co Colomalok ayon israel on ti' yuj Dios, axcata' max yut yak'oncan is ti'.

²⁴A yet c'amto chi chail yich mulnaj Jesús, cax max yalon el Juan nan xol eb jet israelal, tol yowalil chi na ba eb, cax chi yak'on bautizar ba eb.

²⁵Axa yet lananxa yajapnok tiempoal yoc wanaj yopiso Juan tu', max yalon axca ti': A e naoni tol Cristo in, titol c'amak paxok. Palta ay jun Cham tzakan jay wintak tol miman yelapnok, toltax man in mojok woc yak'omalok serbil Cham tu', toltax in xuyon el xanab, tutun man in mojok, ẍi.

²⁶Ex wet animail, ex yinatil Abraham wetok, c'al ex man israelok ay e xiwc'ulal bay Dios, a jun k'anejal yet colbanilej ti', e yet wetok.

²⁷Palta eb aj Jerusalén, yetok eb yajawil eb, c'am chi nachaj el yuj eb, tatol co Colomal yayji Jesús. Junjunc'al c'ual xewilal, cac'al ti' yaben eb yabixal tzet tz'ibbilcan yuj eb chekbej Dios, palta majc'al nachaj el yuj eb. Yuj tu' xan a yet max yaon oc eb camich yiban Jesús, max yak'on eb yun tzet tz'ibbilcan tu'.

²⁸C'am jabok yobtakil max ilchaj el yin Jesús yuj eb, xan man mojok yak'lay camok, palta max occ'al tean eb yin Pilato k'anon camich yiban.

²⁹Pilan max yak' eb yun axca tz'ibelaycan yul tx'an Un Tz'ibbilcanok. Lajwi tu', cax yion aytek eb is mimanil Cham yin curus, axa bet yaon octok eb yul jun ch'en ch'en tu'.

³⁰Palta max ictzonelay aj yuj Dios xol eb camnak.

³¹Lajwi tu', tx'ial c'ualto ec'nak yetok eb is cuywom, eb titnak yetok bay Galilea cax jaynak eb yetok bay Jerusalén yet c'amto chi cami. A eb tu', lanan yalon el eb yabixal nan xol anima tinani'.

³²Ayon ti' lanan jalon c'apax ayex jun watx' abix ti', tol max yun yuj Dios co satak bay max yak' is ti' bay eb jichmam. Max yi wal ba jun ti' yet max ictzonelay aj Jesús xol eb camnak, axca tz'ibelaycan bay Salmo 2 bay chi yal axca ti': Ach ton in C'ajol ach, ayin max ach wak' iquisbok tinani', ẍi Dios yul tx'an Un tu'.

³³

³⁴Yalnak c'apax Dios, tol ok yiaj wan Jesús xol eb camnak, yet watx' c'am chi k'atok is mimanil. Yalnak yul tx'an Un tu' axca ti': Ok in tx'ox in watx'c'ulal ayex, axca max wut wak'oncan in ti' bay David, ẍi.

³⁵Yuj tu xin, ayokto max yaloncan David yabixal Cristo yul junxa Salmo, bay chi yal axca ti': Mamin, man ok a cha k'atok in mimanil tol ayin sic'bil in can el oj ti', ẍi.

³⁶A David tu', yak'nak serbil eb anima yul is tiempoal, axca wal chi yochej c'ul Dios. Lajwic'al tu', max cami, cax max muklay bay mukan eb yichmam. A is mimanil max k'a'i.

³⁷Palta a jun max yictzonej aj Dios xol eb camnak xin, maj k'a' is mimanil.

³⁸Yuj tu' xan chi wochej che yojtaknej elok, tol asan Jesús chi je' yuj yak'oncan tan co yobtakil, xan lanan yal-lay jun abix ti' ayex.

³⁹A ley Moisés c'am chi je' yak'on tan co yobtakil, palta tzanc'al mac chi yaoc c'ul yin Jesucristo, pilan chi ak'laycan tan is yobtakil yuj.

⁴⁰Yuj tu', ilekc'al e ba. Ta c'amak, ok jay tzet tz'ibbilcan yuj eb chekbej Dios e yiban, yujtol max yal junok eb axca ti':

⁴¹Ilabi ex buchwajwom, cax ilek tonabi. C'ayokab aj e c'ul e yiloni, cax chex cami. Mayal in na tzet wal ok wun yul e tiempoal ti'. Palta man ok e yaoc yin e c'ul yet ok al-lay ayex, ẍi Dios yul tx'an Un tu', ẍi cham Pablo. Caytu' max yut yalon Pablo bay eb.

⁴²A yet lanan yeltek Pablo tu' yetok eb ajun yetok tu' yul nail culto eb yet israelal, ay eb man israelok max tewi bay eb tol chi yal eb juntzan cuybanilej tu' junelxa bay eb yet junxa c'ual xewilal.

⁴³Axa yet max lajwi culto xin, xiwil eb israel max toj yetok Pablo c'al Bernabé. Ay c'apax eb ocnak yin religión eb israel tu' max toj c'apax yetok eb. Yuj tu' xan max iptzelay eb yuj Pablo c'al yuj Bernabé, tol tec'anc'al chi yut yaon oc eb c'ul yin is watx'c'ulal Dios.

⁴⁴Axa yet junxa c'ual xewilal xin, txenxanej maj waj ba eb conob masanil, yuj yaben eb k'anej Cham Jajawil.

⁴⁵Palta a yet max yilon eb israel axca tu', tol xiwil anima max waj ba, max chichon aj c'ul eb, cax max c'oli yalon eb buchwal k'anej yin tzet chi yal Pablo.

⁴⁶Palta Pablo yetok Bernabé xin, tol max tec'baj ba eb, cax max yalon eb axca ti': —Yowalil a ayex ex jet israelal ex ti', max babji jalon el k'anej Dios, palta ilab wal tol c'am che yaoc yin e c'ul. Tekan che na' tol man e mojok e chaon e k'inal tol ayc'al yin tojbalk'inal. Yuj tu' xan a tinani xin, ti chon toj bay eb man israelok, cax chi toj jalon yabix eb.

⁴⁷Yujtol caytu' max yut yaloncan Cham Jajawil ayon axca ti': Max ach waoc yin sakk'inalil bay eb man israelok, yuj eontok colbanilej bay masanil anima, masantac'al lajubal tx'otx' tx'otx', ẍi Cham Jajawil, ẍi eb.

⁴⁸Axa eb man israelok xin, caw wal max tzaloj aj eb yaben juntzan ti'. Max c'oli yalon eb tol caw wal watx' k'anej Cham Jajawil. Axa eb sic'bilxac'alta' el yuj Dios yuj chaon eb is k'inal tol ayc'al yin tojbalk'inal xin, max yaoc eb c'ul yin.

⁴⁹Xan cac'al tu' max yun saklem k'anej Cham Jajawil bay masanil jun lugar tu'.

⁵⁰Palta axa eb israel max ak'on c'ul eb yajaw bay jun conob tu', c'al juntzan eb xal ix ayoc Dios yin c'ul, cax miman yelapnok yul sat anima, pilanc'al max ak'lay c'ul eb yuj eb. Max c'oli yak'on eb yobc'ulal yin Pablo, c'al yin Bernabé, yuj yuktelay el eb yuj eb bay jun lugar tu'.

⁵¹Axa tziconcan el Pablo c'al Bernabé tu' pokokal yakan,*fn* yuj tx'oxk'abnen el eb, tol c'amxa yalon eb yet yin eb anima tu'. Lajwi tu xin, max toj eb bay conob Iconio.

⁵²Axa eb creyente aj Antioquía tu xin, caw wal chi tzaloj eb. Ay c'apax oc eb yalan yikbej Cham Espíritu Santo.