Read Q'anjob'al Hch 15 Bible Online

Hch 15 - Q'anjob'al bible

Hch 15

¹A yet jun tiempoal tu', ay juntzan winak titnak bay Judea, max betic' eb bay conob Antioquía, axa c'oli yalon eb bay eb creyente axca ti': —Ta c'am chi oc jun yechelej chi yik circuncisión e yin, axca yalon ley Moisés, man ok ex colchajok, ẍi eb.

²Axa teyelen ba Pablo c'al Bernabé yetok eb tu', palta majc'al watx'jok ay yuj eb. Yuj tu' xan max yal eb creyente tol chi toj Pablo yetok Bernabé bay Jerusalén, cax chi toj c'apax jaywanok creyente yetok eb, yuj toj k'anlen eb bay eb chekbej Jesús, c'al bay eb anciano ay bay tu'.

³Lajwi cheklaytok eb yuj eb creyente tu', max ec' eb bay Fenicia yetok bay Samaria. Max ec' yalon eb bay eb creyente bay tu', tol ay eb man israelok max q'uex is beybal, cax max yaon oc eb nabal yin Dios. A yet max yaben eb creyente jun tu', caw wal max tzaloj aj eb masanil.

⁴Lajwi yapni oc Pablo yetok eb ajun yetok bay Jerusalén tu', max chalay apnok eb yuj eb creyente masanil, c'al eb chekbej Jesús yetokc'al eb anciano, cax max yalon eb jantak masanil tzet max elc'al yunen Dios yetok eb.

⁵Palta ay jaywan eb fariseo tol max yaoc c'ul yin Cristo, max aj wan eb nan xol eb, cax max yalon eb axca ti': —A eb man israelok max yaoc c'ul yin Cristo, yowalil chi ak'lay circuncidar eb. Yowalil chi jal bay eb, tol chi yikej eb ley Moisés, ẍi eb.

⁶Axa wajban oc ba eb chekbej Jesús yetok eb anciano tu', cax chi naon eb, tzet watx' chi yuncan jun chi ali tu'.

⁷Mayaltaxc'al c'oli teyelen ba eb xin, max aj wan Pedro nan xol eb, cax max yalon axca ti': —Ex wuẍtak, e yojtakxata'a, tol ayxa tiempo in sic'laycan el yuj Dios, yuj walon el k'anejal yet colbanilej bay eb man israelok, yet watx' chi yaoc eb c'ul yin Cristo.

⁸A Dios yojtak tzet ay yin is nabal junjun mactxel. Yuj tu' xan max yak' Cham Espíritu Santo bay eb man israelok tu', axca max yut c'apax yak'on ayon, xan axca tu' max yut tx'oxk'abnen elok tol watx'xa eb yul sat.

⁹A yul sat Dios, caw wal lajanxa eb jetok, yujtol a' max ion el yobtakil eb yet max yaon oc eb Cristo yin c'ul tu'.

¹⁰A tinani xin, ¿tzet yuj xan c'am che yochej che cha' tzet max el watx'nen Dios? Axca junok ikatz caw al, c'am chon aj yalan, caytu' ley Moisés tu'. Maj ikchaj yuj eb jichmam. Tamwal ayon c'apaxok, maj ikchaj juj. Yuj tu xin, ¿tzet yuj xan che yochej che yaoc jun tu' yiban eb creyente man israelok?

¹¹Manchak e yut caktu', yujtol jojtak wal sic'libil, tol asan yuj watx'c'ulal Cham Jajawil Jesús chon colchaji, xan cay c'apax tu' eb man israelok tu', ẍi Pedro tu' bay eb.

¹²A yet max yaben eb juntzan ti', max ay numnaj eb masanil. Max yaben eb tzet max yal Bernabé yetok Pablo, yet max yalontek eb tol xiwil milagro max el yunen Dios yetok eb, yet max ec' eb nan xol eb man israelok.

¹³Lajwi yalon eb, max yalon Jacobo axca ti': —Ex wuẍtak, abek tzet ok wal ayex ti'.

¹⁴Max yal Simón Pedro ayon, tol lananto tx'oxon Dios is watx'c'ulal bay eb man israelok. Lananto sic'lay el eb yuj, cax chi oc eb yetok.

¹⁵A jun tzet chi el yunen ti', chi chalej ba yetok tzet tz'ibbilcan yuj eb chekbej Dios payxa, bay yalnakcan axca ti':

¹⁶Lajwi tu' ok in meltzoj paxtek, cax ok ul waoncan oc jun yinatil rey David is q'uexelok yin yopiso. Yujtol axca junok na pilan max ec' bulnajok, caytu' yunnakcan yopiso David tu', palta ok in watx'nej aj junelxa,

¹⁷yet watx' a eb man israelok, ok yaoc eb nabal win, ayin Yajaw in ti', a ton masanil eb sic'bilxa el wuj yuj yoc wetok bay junjun nación.

¹⁸Caytu' yutnak yaloncan Cham Jajawil, Cham ak'nej jojtaknej el juntzan ti' yettaxc'al payxa, ẍi yul tx'an Un tu'.

¹⁹Yuj tu', chin na' ayin ti', tol manchak jetnej eb man israelok chi q'uex is beybal, cax chi yaon oc eb nabal yin Dios.

²⁰Asannejokab co carta chi jatok bay eb, chi jalontok bay eb, tol manchakxa chi' eb tzet max ak'lay yin xajanbalil bay tzet chi al-lay oc diosal. Manchak beybalnej eb ajmulal. Manchakxa chi' eb no no' chi sut'lay camok. Manchakxa chi' eb chic'.

²¹Chi wal axca tu', yujtol yettax payxa, ay eb chi awten aj ley Moisés bay junjun nail culto eb jet israelal. Ac'ala' tinani', ac'ala' yalon el eb yet junjun c'ual xewilal, ẍi Jacobo bay eb.

²²Yuj tu' xan max wajan alnej eb chekbej Jesús, yetok eb anciano, c'al eb creyente masanil, tol chi siq'uil eb jaywan eb creyente chi toj yuc'lebok Pablo yetok Bernabé bay conob Antioquía. Lajwi tu', max sic'on el eb Judas, nak chi yik c'apax Barsabás, yetok Silas. A cawan eb tu', miman yelapnok eb nan xol eb creyente.

²³A eb max cheklaytok toj yak' tx'an carta tu'. Max yaltok eb yul tx'an axca ti': Ayon chekbej on Jesús yetok eb anciano, tol juẍtak co ba e yetok, chi jatok cawil e c'ul ex jet creyenteal man israelok, ex aj conob Antioquía, yetok ex aj Siria, c'al ex aj Cilicia.

²⁴Max jabej, tol ay jaywan eb aj Jerusalén, munilc'al max yaoc yet toj ayex tu'; mayonnak max co chektok eb. Max jabej, tol chex yetnej eb yuj tzet chi yala'. Tekan ijan chi somchaj el e c'ul yuj eb.

²⁵Yuj tu' xan max co lajtinej co ba, cax max co sic'on el jaywan eb co xol, yuj toj eb ayex tu'. Junnej toj eb yetok juẍtak Bernabé c'al juẍtak Pablo. A cawan eb ti', caw wal ay co camc'ulalil yin eb.

²⁶Bekanxa c'ul eb yilon yailal yujc'al Cham Jajawil Jesucristo. Ayxa bay ijan maxax ak'lay cam eb.

²⁷A ton Judas yetok Silas ok co chektok ayex tu'. A eb ok tok alon e yabej, tzet max co lajtinej cayti'.

²⁸Chi co na', tol watx' man xiwilok chekbanil chi jaltok ayex. Ca c'apax tu' max yun chaon c'ul Cham Espíritu Santo jetok. Yuj tu xin, tix wal jayeb ti' chi jaltok ayex, tol yowalil che yikej:

²⁹Manchak e chi' no chibej chi ak'lay yin xajanbalil bay tzet chi al-lay oc diosal. Manchak e chi' chiq'uil no'. Manchak e chi' no no' chi sut'lay camok. Manchak e beybalnej ajmulal. Ta che yikej juntzan ti', watx' chi el e yunen chi yal tu'. Asan jay belan ti' chi jaltok ayex, ẍi tx'an carta tu'.

³⁰Chekbiltok eb chekbej tu xin, xan max toj eb bay conob Antioquía tu'. Max apni eb, axa yak'on eb wajbaj oc ba eb creyente masanil tu', cax max yak'on eb tx'an carta tu' bay eb.

³¹Caw wal max tzaloj aj eb creyente tu' yet max yaben eb yawten aj eb tx'an, yujtol max ak'lay mimanil c'ul eb yuj tx'an max yabej.

³²Tutun a Dios chi ak'on yalil Judas, c'al Silas is k'anej xin, yuj tu' xan max yak' c'apax eb mimanil c'ul eb creyente tu'. Xiwil tzet max yal eb bay eb, yuj yiptzelay eb creyente tu'.

³³Lajwi yayji ec' eb jayeb c'u bay tu xin, max tak'elen ba eb creyente yetok eb, yuj meltzoj eb bay ayic' eb cheknejtek eb tu'.*fn*

³⁵Maxto cancan c'apax Pablo yetok Bernabé bay jun conob tu', axa cuywajcan eb nan xol eb creyente tu'. Max yalon el eb k'anej Cham Jajawil. Xiwil eb creyente max colwaj yalon el yetok eb.

³⁶Lajwi yec' jayeb c'ual xin, max yalon Pablo bay Bernabé axca ti': —Ton, toj jil eb creyente bay junjun conob bay max ec' jalil k'anej Cham Jajawil yet babelal. Toj jil eb, ta tec'anc'al waay eb, ẍi Pablo tu'.

³⁷Max yochej Bernabé chi toj Juan Marcos yetok eb,

³⁸palta max na' Pablo tol man mojok nak toj yetok eb. Yujtol a yet junel, max elcan nak yintak eb bay Panfilia, cax majc'al lajwok yilon yopiso yetok eb.

³⁹Axa max yunajok, max teyelen aj ba eb yujc'al nak, majxa chalej ba k'anjab eb. Yuj tu xin, tx'ok tx'okxac'al max tojcan junjun eb. A Bernabé max oc yul barco max toj bay Chipre. Max yicantok Marcos yetok.

⁴⁰A pax Pablo xin, max siq'uil Silas xol eb creyente, yuj toj yetok. Lajwi yabenelay oc eb yul k'ab Dios yuj eb creyente tu', cax max toj eb.

⁴¹Max ec' eb bay yul yet Siria yetok bay Cilicia. Max ec' yaoc eb nabal eb creyente bay junjun iglesia.