Read Q'anjob'al Hch 16 Bible Online

Hch 16 - Q'anjob'al bible

Hch 16

¹Max apni oc Pablo yetok Silas bay conob Derbe. Yet max el eb bay tu' max apni oc eb bay conob Listra. A tu' max ilchaj jun creyente chi yik Timoteo yuj eb. A Timoteo tu', yune' jun xal ix creyente israel. A pax is mam xin, griego toni.

²Watx' ab is beybal Timoteo tu', yal masanil eb creyente aj conob Listra, c'al eb aj Iconio.

³Max na' Pablo yiontok Timoteo tu' yetok. Yuj tu', xan max yak' circuncidar, yet watx' c'am chi tit yowal eb israel ay bay jun lugar tu', yujtol yojtak eb tol griego is mam nak.

⁴A bay junjun conob bay max ec' eb, max yalc'al can el eb juntzan chekbanil albilcan yuj eb chekbej Jesús, c'al yuj eb anciano aj Jerusalén. Max yalcan Pablo bay eb creyente tu', tol yowalil chi yikej eb juntzan chekbanilej tu'.

⁵A eb creyente bay junjun conob tu', tec'anc'al chi yut yaon oc eb c'ul yin Cristo. Cac'al ti' ch'ib bisil eb junjun c'u.

⁶Max yochej Pablo yetok Silas max toj yalil k'anej Dios bay Asia, palta axa Cham Espíritu Santo maj chaontok eb. Yuj tu xin, axa bay Frigia yetok bay Galacia max toj eb.

⁷A yet max apni oc eb yul mojonal Misia, max naon eb tol chi toj eb bay Bitinia, palta ac'ala' maj chalaytok eb yuj Yespíritu Jesús.

⁸Yuj tu xin, toc'al max k'axponej eb tiel Misia tu', max ayapnok eb bay conob Troas, bay is ti a' mar.

⁹Axa yet jun ak'bal, ay jun winak aj Macedonia max oc lecan satak Pablo axca yin wayichejal. Max oc tean yin axca ti': Ec'an bay Macedonia, cax chach ec' colwaj jetok, ẍi jun winak tu' bay.

¹⁰Lajwic'al yilon Pablo jun tu', cax max watx'nen ba eb wetok, yet chon toj bay Macedonia tu', yujtol max jojtaknej elok, tol a Dios ak'nej jopiso jalon el k'anejal yet colbanilej bay eb anima tu'.

¹¹Lajwi tu xin, axa joc on yul barco bay Troas tu'. Co t'inlonenxatok co ba bay Samotracia. Axa yet junxa c'ual, max on apni bay conob Neápolis.

¹²Lajwi tu xin, cax max on toji, max on apni bay conob Filipos. A jun conob tu', yet eb aj Roma. Miman yelapnok jun conob tu' yintak juntzanxa ay yul yet Macedonia tu'. Tx'ialc'al c'ual max on ayji ec' bay jun conob tu'.

¹³Ay jun c'ual xewilal max on toj bay jun a' miman aej tiel conob,*fn* bay chi betc'alta' anima txajlok. A yet max on apni oc ti a' tu', axa jay chotjabok tu', max jalon el is k'anej Dios bay juntzan eb ix ix wajanxa ec' ti a' tu'.

¹⁴Ay jun xal ix aj conob Tiatira chi yik Lidia ayoc xol eb ix tu', txonom cakyin k'ap xal.*fn* Caw wal chi yiay ba xal bay Dios. Yak'ban lanan yabxalwi xal tu', max jakchaj nabal xal yuj Cham Jajawil. Yuj tu' xan caw wal max yaoc is nabal yin tzet chi yal Pablo tu'.

¹⁵Yuj tu xin, xan max yak' c'apax can bautizar ba xal, yetokc'al eb ayic' yetok bay yatut. Lajwi tu' max yalon xal ayon axca ti': —Ta yel wali chi waoc in c'ul yin Cham Jajawil che yila', tonek ak'ek e posada bay in na, ẍi xal ayon. Caw wal max occ'al tean xal jin. Yuj tu xin, max on toj bay yatut xal tu', axa jayji ec' bay tu'.

¹⁶A yet junel, yet lanan co toj bay chi oc txaj, max jayoc jun ix k'opoj ix ayon. Ayoc jun espíritu yob yin ix. Yuj tu' xan chi nachaj el k'anej yuj ix. Chekbej yayji ix bay juntzan winak. Xiwil tumin chi yi' eb is patrón ix tu' yin, yujtol chi je' yuj ix naon el k'anej.

¹⁷Max tzakloj ix jintak yetok Pablo, axa yaj yaw ix yin ipejal axca ti': —A juntzan winak ti', chekbej yayji eb yuj Dios Cham axac'al ocok. A eb chi alon ayex, tzet chi yun e colchaji, ẍi ix.

¹⁸Tx'ialc'al c'ual max yal ix axca tu'. Ac'ala'c'al tzet chi yal ix junjuntak el. Majxa techaj yuj Pablo yabeni. Yuj tu' xan max meltzojtok tucan yin ix, axa yalon bay jun espíritu yob ayoc yin ix tu', axca ti': —Chi wal ayach, yuj yikbej Jesucristo, elan yin ix ix ti', ẍi Pablo tu'. Cax max elcan yet jun bek tu'.

¹⁹Palta a yet max yilon eb is patrón ix, tol max el jun espíritu yob yin ix, xan c'amxa chi yi eb tumin yin ix, max jeẍlay bey Pablo yetok Silas yuj eb bay txonbal bay ayic' eb yajaw.

²⁰A yet max apni oc eb satak eb yajaw tu', max yalon eb axca ti': —A eb israel ti', toc'al chi ul yak' somchaj el eb c'ul anima bay co conob ti'.

²¹Lanan ul yak'on eb cuylay juntzan beybalej ay yowalil yuj ley. Maj je' co chaon co beybalneni, yujtol aj Roma on, ẍi eb.

²²A jantak anima wajan ec'ok, caw wal max tit yowal eb yin Pablo c'al yin Silas tu'. Axa yak'lay ilay el pichil eb yuj eb juez tu'. Lajwi tu', max ak'lay yik eb c'ax yuj eb.

²³Lajwi yikon eb c'ax tu', axa bet k'oklaycan octok eb preso tu'. Max yalon eb juez bay nak taynem preso axca ti': —Caw wal c'anani chot eb nak, ẍi yutelay nak taynem preso tu' yuj eb.

²⁴Lajwic'al yaben nak is chekbanil tu', max bet yaoncan octok nak eb tac'al yul jun cuarto yich ocok, max yaon octok nak yakan eb yul lot'il te cepo.

²⁵Axa yet chuman ak'bal, max txajli Pablo yetok Silas tu', max bitnen c'apax eb juntzan bit bay Dios. Toxac'al chi abxalwi masanil juntzanxa eb aj preso.

²⁶Ac'ala' yet chuman ak'bal max ec' jun miman quixcab, caw ow max yut ba. Toxanej chi yucxi cimientoal preso tu' yuj, axa jakchaj puertail preso tu' masanil. Axa yelc'ay jol-lajbok cadenail eb presowom tu' ayoc yin eb.

²⁷A yet max el wayan nak taynem preso, max yilon nak tol jakanxa puertail preso tu' masanil, axa yion ajtek nak yespada yul tz'umal tu', yuj yak'on cam ba yaloni, yujtol max na' nak, tol max eltek masanil mac ayoc preso tu'.*fn*

²⁸Axa yawji eltek Pablo bay nak yin ipejal axca ti': —Manchak ak' cam a ba, ayon ec' co masanil, ẍi eltek.

²⁹Axa k'anon nak junok is tzektebal tu', max octok nak bay ayic' eb tu'. Caw wal chi bil nak yuj xiwc'ulalil, axa yay jajnaj nak satak Pablo yetok Silas tu'.

³⁰Lajwi tu', max yion eltek nak eb. —Ex mamin anima, ¿tzet yowalil chi wunej, cax chin colchaji? ẍi nak bay eb.

³¹—Aoc a c'ul yin Cham Jajawil Jesucristo, cax ok ach colchajok, c'al yetok jantak mac ayic' etok bay a na, ẍi eb bay nak.

³²Lajwi tu', max yalon eb k'anej Cham Jajawil bay nak, c'al bay masanil eb cajan bay is na yetok.

³³Ac'al oc yet jun ak'bal tu' max tx'ajil nak chiq'uil yas eb yin. Lajwi tu' axa yak'on bautizar ba nak yetok eb ayic' bay is na tu'.

³⁴Max yion octok nak eb bay is na, max low eb yuj nak. Caw wal chi tzaloj nak yetokc'al eb cajan bay is na tu', yujtol max yaoc eb c'ul yin Dios.

³⁵Axa yet max k'inibi ajok, max cheklaytok juntzan eb policía yuj eb yajaw. Max bet yalon eb bay nak taynem preso tu', tol chi beklay el Pablo c'al Silas.

³⁶Xan max yal nak bay Pablo tu' axca ti': —Max yak' eb yajaw ul al-lay ayin, tol chex in bek elok. Yuj tu xin, asek. Paxanek yin tzalojc'ulal, ẍi nak bay eb.

³⁷Palta max yal Pablo bay eb policía tu' axca ti': —Ayon ti' aj Roma on. Palta babel max jik tz'um yuj eb satak conob. Maj k'anlej eb yabej ta ay co mul. ¿Tom chi yochej eb yin ewantakil chon is bekil eb tinani'? Majc'al bian. Jayokab eb yajaw tu', acaw eb chon ul ion eltok,*fn* ẍi Pablo bay eb.

³⁸Yuj tu xin, max toj eb yalon bay eb yajaw tu'. A yet max yaben eb yajaw tu' tol aj Roma eb, caw wal max xiwaj eb.

³⁹Max toj eb k'anon mimanc'ulal bay Pablo c'al bay Silas tu'. Lajwi tu' max ilay eltek eb yul preso yuj eb. —Ac'al chi jal ayex, matawal chex el yul conob ti', ẍi eb bay eb.

⁴⁰Lajwi yeltek eb yul preso tu', max toj eb bay yatut xal Lidia junelxa. Axa c'olic'al k'anjab eb yetok eb creyente tu', c'al yiptzelaycan eb yuj eb. Lajwi tu xin, axa toj eb tu'.