Read Q'anjob'al Hch 17 Bible Online

Hch 17 - Q'anjob'al bible

Hch 17

¹Max ec' Pablo yetok Silas bay conob Anfípolis yetok bay conob Apolonia. Lajwi tu' max toj eb bay conob Tesalónica, bay ay jun nail culto eb yet israelal eb.

²Max octok Pablo yetok eb yul nail culto eb tu', axcac'al chi yun bay junjun conob. Oxeb c'ual xewilal max bet yal yabix eb israel tu'.

³Max yal bay eb, tzet tz'ibbilcan yul tx'an Un, tol a Cristo, yowalil ton max yab yail, cax max ak'lay camok, palta yowalil c'apax max ictzonelay aj xol eb camnak. Max yalon c'apax bay eb: —A Jesús lanan walon yabixal ayex ti', a ton Cristo, ẍi Pablo tu' bay eb.

⁴Ay eb israel max yaoc c'ul yin Cristo, xan max oc eb yetbeyomok Pablo yetok Silas tu'. Xiwil c'apax eb griego chi yiay ba bay Dios max yaoc yin c'ul. Xiwil c'apax juntzan eb xal ix mimanbil yul sat anima.

⁵Palta a eb israel tol maj yaoc yin c'ul, a yet max yilon eb axca tu', caw wal max tit yowal eb, max wajban oc eb juntzan eb yobc'alta' nabal. A eb max wajbaj oc eb tu', ac'al yobtakil chi ec' say eb yulak calle. Lajwi yak'on eb c'ul eb yob nabal tu', max yak'on c'apax eb c'ul masanil conob. Max yuchon aj somnaj eb eb anima yuj tit yowal eb. Lajwi tu' comonxac'al max oc eb yul yatut cham Jasón, yujtol a naon eb, tol a tu' ayic' Pablo yetok Silas. Yochwan eb chi yieltek eb, cax chi alay oc eb yul k'ab eb conob.

⁶Palta c'am pax eb ayic' yul na tu'. Yuj tu' xan axa cham Jasón, yetok jaywanxa eb creyente max mitx' eb, axa yilaytok eb satak eb yajawil conob yuj eb. Max yalon eb yin ipejal axca ti': —Ajun Pablo tu' yetok Silas tu', pilan chi ec' eb yak' somchaj c'ul anima yulyibank'inal ti'. Ilab mayal jayoc eb co xol ti'.

⁷Axa cham Jasón ti' max chaon eb bay yatut. C'am chi yikej masanil eb tu' ley cham yajaw bay Roma. Ilab tol chi yal eb tol ay junokxa is reyal eb chi yik Jesús, ẍi eb bay eb yajaw tu'.

⁸A yet max yaben eb conob yetok eb yajaw juntzan tu', axa yaj uchnaj eb tu' yuj tit yowal eb.

⁹Axa pax Jasón yetok eb max mitx'lay yetok tu xin, tumin max yacan aytok eb preso q'uexelok, axa beklay el eb tu'.

¹⁰Axa yet max k'ekbiayok, max cheklaytok Pablo yetok Silas yuj eb creyente bay conob Berea. A yet max apni oc eb bay tu', max oc eb yul nail culto eb yet israelal.

¹¹Yel watx' nabal eb israel aj Berea tu' yintak pax eb aj Tesalónica. Ilab tol max cam wal yaben eb yabixal Dios, cax junjunc'al c'u cac'al ti' cuyon eb tx'an Un bay tz'ib yayjican k'anej Dios, yuj yilon eb, ta yel chi yal Pablo yetok Silas tu'.

¹²Yuj tu xin, xiwil eb max yaoc c'ul yin Cristo. Xiwil c'apax eb griego max yaoc yin c'ul. Ay eb xal ix c'al eb winak mimanbil yul sat conob, max yaoc yin c'ul.

¹³Palta a yet max yaben eb israel aj Tesalónica tol lanan yalon el Pablo k'anej Dios bay Berea tu', max toj eb bay tu'. A yet max apni oc eb, max yuchon aj somnaj eb eb conob.

¹⁴Ayman max cheklaytok Pablo yuj eb creyente ti a' mar, yet chi toj yul barco. Axa pax Silas yetok Timoteo xin, max cancan eb bay Berea tu'.

¹⁵Ay eb creyente max toj yetok Pablo bay conob Atenas.*fn* Lajwi yapni eb bay tu', max yalon Pablo bay eb axca ti': —Che yal bay Silas yetok bay Timoteo, tol chi tit eb yin ayman, ẍi yutelay eb. Lajwi tu xin, max meltzoj eb.

¹⁶Yak'ban chi yechbanej Pablo tu' yapni Silas yetok Timoteo bay conob Atenas, max yiloni, tol xiwil juntzan tzet chi yaloc anima is diosalok bay conob tu'. Caw wal max cusaj c'ul yet max yilon axca tu'.

¹⁷Max octok yul nail culto eb yet israelal. Axa c'oli cuywaj bay eb israel tu', c'al yetok bay eb griego chi yiay ba bay Dios yetok, cax junjunc'al c'u, cac'al ti' yalon el nan xol anima bay txonbal.

¹⁸Ay juntzan winak caw wal chi cuy wal eb jelanil, eb chi yik epicúreo yetok juntzan eb chi yik estoico,*fn* max c'oli k'anjab eb yetok Pablo. Axa nanxa eb xin, max yalubtanen eb axca ti': —A jun xiwil k'anjab ti', ¿tzetlaj ok yal ayon? ẍi eb. Axa juntzanxa eb xin, max yal eb: —Yabixal juntzanxa tx'ok diosal chi ul yala', ẍi eb. Caytu' max yut yalon eb axca tu' yujtol yabixal Jesucristo max yal Pablo nan xol eb. Max yal c'apaxok tol chi ictzonelay aj eb camnak.

¹⁹Axa yilaytok Pablo yuj eb jelan tu' bay jun yaliẍ tzalan chi yik Areópago, bay chi yak' eb k'umbalba.*fn* Lajwi yapni eb bay tu', max k'anlen el eb bay axca ti': —A jun ac' cuybanilej chi ul alil ti', ¿chi mi je' jojtaknen el masanil?

²⁰Yujtol c'amto bay chi jab juntzan ti'. Yuj tu' xan chi jochej chi jojtaknej elok, tzet wal chi yal elapnok, ẍi eb.

²¹Caytu' max yut yalon eb axca tu', yujtol masanil anima bay Atenas tu', c'al eb tx'ok conobal ayic' bay tu', tx'ok yel beybal eb. Tatol ay junok ac' cuybanilej chi bet al-lay yab eb, caw wal chi cha c'ul eb yabeni, c'al yalon elok. Asan jun tu' bay chi yaoc eb nabal.

²²Axa yaj wan Pablo nan xol eb bay Areópago tu', cax max yalon axca ti': Ex mamin aj conob Atenas ti', chi wila' tol caw wal ayoc e nabal yin tzet che yaloc e diosalok.

²³Ilab tol a yet chin ec' lequecok yul e conob ti' cax chi wilon bayc'al-laj che yiay e ba bay tzet che yaloc e diosalok tu', max wilon c'apax jun batxlub xajanbal, bay tz'ibbil oc jay belan k'anej ti' e yuj: A cayti' chi jiay co ba bay jun Dios man ojtakbilok juj,*fn* ẍi oc yin. Mimanokc'al ton che yal e ba bay jun Dios tu', palta man e yojtakok Cham. A ton jun Dios man e yojtakok tu' chi ul wal yabixal ayex.

²⁴A jun Dios tu' esnenej aj yulyibank'inal ti', c'al masanil tzetak yetal. Yajaw yayji Cham satcan, yajaw c'apax yayji Cham sat tx'otx' ti'. A Dios tu' c'am chi cajay yulak na chi watx'nej anima.

²⁵Man yowalilok ay tzet chi ak'lay bay yuj anima, yujtol a Cham chi ak'on co cawil co masanil. A' chi ak'on co cak'ek', c'al masanil tzetak yetal ayon.

²⁶A Cham watx'nenej nak babel winak, nak bay max titoc yinatil junjun conob bay yulyibank'inal ti', xan ay anima bay masanil yulyibank'inal. Asan Cham chi aloni, tzet tiempoal chi aj can junjun conobal. A Cham chi ak'on lugar junjun conobal bay chi cajayi.

²⁷Chi yut Cham axca tu', yet watx' chi saylay ec' Cham yuj eb anima, ta c'uxan chi ilchaj Cham yuj eb, palta chi wal ayex, tol man najatok ay Cham. Ayic' Cham co cawilal junjun on.

²⁸Asan yuj Cham xan iquis on. Ay co cawil yuj Cham. Yuj c'apax Cham, xan ayon ec' bay yulyibank'inal ti'. Ay juntzan eb e yet conob caw jelan k'anjabi, alnejcan axca ti': Yuninal on Dios co masanil, ẍi eb.

²⁹Yel ton chi yal eb, yuninal on ton Dios. Yuj tu' xan manxa mojok co naoni tol Dios juntzan yechelej watx'nebil yetok ch'en oro tu', ma ch'en plata tu', ma junokxa tzet ch'enal watx'nebil yuj anima yetok is jelanil.

³⁰A yet payxa, man yojtakok eb anima Dios. Yuj tu' xan miman yutnak Cham c'ul yin eb. Palta tinani', yowalil ab chi na ba anima yulyibank'inal ti' yala'.

³¹Yujtol yalnakcanok, tol ay jun c'ual ok beyc'ulnej masanil anima. Bayc'al ijan ok yut beyc'ulneni, atac'ala' tzet chi el yunen junjun anima. A Dios sic'nej el jun mac ok beyc'ulnewok. Max tx'oxk'abnej el Dios bay masanil anima, tol caw wal yel jun ti', yet max yictzonen aj Dios Cham tu' xol eb camnak, ẍi Pablo bay eb.

³²Palta a yet max yaben eb yaloni tol chi ictzonelay aj eb camnak, ay eb chi buchwaj yin. Ay eb xin, max yal eb bay axca ti': —Okxa co k'anlej jab juntzan ti' ayach yet junelokxa, ẍi eb bay.

³³Lajwi yaben Pablo tzet max yal eb tu', cax max el xol eb.

³⁴Palta ay jaywan eb max yaoc c'ul yin Cristo. Max junanej ay ba eb yetok Pablo tu'. Ay jun cham ayoc xol eb chi yik Dionisio, yet yajawil ba yetok eb chi wajbaj ba bay Areópago. Ay c'apax jun xal ix chi yik Dámaris, c'al juntzanxa eb max ya c'apax oc yin c'ul.