Read Q'anjob'al Hch 19 Bible Online

Hch 19 - Q'anjob'al bible

Hch 19

¹A yet ayic' Apolos bay Corinto, max c'oli yec' Pablo bay juntzan conoblak ay bay tzalquiẍtak, max apni oc bay conob Efeso. A tu' max yil-lej el ba yetok juntzan eb creyente bay tu'.

²Max k'anlen el bay eb axca ti': —¿Xam e cha' Cham Espíritu Santo yet max e yaon oc e c'ul yin Cristo? ẍi bay eb. —C'amak, c'am bay chi jabej ta ay Cham Espíritu Santo, ẍi eb.

³—Palta a yet max e yak'on bautizar e ba, ¿tzet yayji jun bautismo e chanak tu xin? ẍi Pablo tu' bay eb. —A bautismo Juan max co cha', ẍi eb bay.

⁴Yuj tu' xan max yal pax bay eb axca ti': —A Juan tu', yak'nak bautizar anima yuj tx'oxbanilok tol chi na ba eb yin is yobtakil. Palta yalnak bay eb, tol ay jun mac tzakan jay yintak. Yowalil a yin jun mactxel tu' chi yaoc eb c'ul. A jun mactxel tu', a ton Jesús, ẍi Pablo tu' bay eb.

⁵A yet max lajwi yaben eb juntzan ti', max yak'on bautizar ba eb yin bi Cham Jajawil Jesús.

⁶Lajwi tu xin, max yaon ajtok Pablo k'ab yiban jolom junjun eb. Catatu bian, max chaoncan eb Cham Espíritu Santo. Axa k'anjab aj eb yin tx'ok tiejal tu', max yalon el eb k'anej Dios.

⁷A eb maxax aon oc yin c'ul tu', ay mi lajcawanok eb.

⁸Yin oxeb xajaw cac'al ti' bet Pablo tu' yalon el k'anej Dios yul nail culto eb yet israelal tu'. Tec'an max yut ba cax chi yalon yab eb. Chi yak'lej yak'on nachaj el yuj eb, tzetbil chi yun yoc eb yul k'ab Dios.

⁹Palta ay juntzan eb caw wal pit. Tutun c'am chi yal c'ul eb chi yaoc yin c'ul. Chi yal eb bay eb anima, tol man watx'ok jun cuybej bay ayoc eb creyente tu'. Yuj tu xin, xan max el Pablo nan xol eb. Max ilaytok eb creyente tu' yuj, bay yescuela jun cham chi yik Tirano. A bay tu' chi bet cuylay eb yuj junjun c'u.

¹⁰Cab abil max yun eb axca tu'. Yuj tu xin, pilanc'al max yabcan oc eb aj lugar bay Asia tu' yabixal Cham Jajawil Jesús. Pilanc'al max yabcan oc eb masanil, eb israel c'al eb man israelok.

¹¹Cax chi k'anbalnelay Pablo yuj Dios yin tx'oxon juntzan milagro caw wal mimek yelapnok.

¹²Ay eb ibil oc tx'ambalej yuj, c'al pichilej yuj, cax chi ul limon oc eb yin Pablo tu'. Chi lajwi tu' cax chi bet yaon oc eb yin eb ya'ay cax chi jaycan c'ul eb yuj. Ay c'apax espíritu yob chi elcan yin eb anima yuj.

¹³Ay juntzan eb ec'jabwom israel chi yak'lej yion el espíritu yob yin anima. Chi yak'lej eb yawten bi Cham Jajawil Jesús, yet chi yion el eb eb espíritu yob tu' yaloni. Chi yal eb bay eb espíritu yob axca ti': Yuj yikbej Jesús chi jaloni: Elanek. A ton Jesús, Cham chi ec' yalil Pablo yabixal, ẍi eb, chi yalon eb.

¹⁴Ay ukwan c'ajol jun cham israel chi yik Esceva, a ton junok yajawil eb sacerdote bay israel. Max yak'lej eb nak yion el jun espíritu yob yin anima.

¹⁵Palta max tak'wi bay eb nak axca ti': A Jesús che yal tu', wojtak. Wojtak c'apax Pablo tu'. A pax ex ayex ti', ¿mac ex txel? ẍi bay eb.

¹⁶Axa nak bay ayoc jun espíritu yob tu' max tit jucnaj yin eb, max ayc'ay eb masanil yuj nak. Max yasjitok eb, axa yel eb bay te na bay ayic' eb tu', max el xuyuyok eb yin t'iranil.

¹⁷Pilan max yab masanil eb aj Efeso yabixal tzet max uj tu', toltax eb man israelok, max yab eb. Yuj tu' xan max xiwaj eb masanil. Max ilay can Cham Jajawil Jesús yuj eb.

¹⁸Xiwil eb yanakxa oc c'ul yin Cham max apni oc yuj yalon ajtek eb masanil tzet man watx'ok max el yunen eb.

¹⁹Ay nanxa eb xin, yak'lejnak eb yin ajtxumal. Max yitek eb is libro chi yak'balnej yet chi txumli eb tu', cax max nison tz'a eb satak eb masanil. Max yi eb cuenta yin jantak tojol tx'an, ay mi 50,000 dracma*fn* ayoc yin tx'an.

²⁰Xiwil anima max yaoc c'ul yin k'anej Dios yet tu', xan axca ton ti' max yun txecloj elok tol caw wal miman yipalil is k'anej tu'.

²¹Lajwi juntzan tu xin, max naon Pablo tol ok ec' bay yul yet Macedonia yetok bay yul yet Acaya, cax chi toj bay Jerusalén. Max yalon axca ti': —Ok lajwok tu', yowalil ok in apnok bay Roma, ẍi.

²²Axa chekon babjok cawan is chekbej tu' bay Macedonia, a ton Timoteo yetok Erasto. A pax Pablo tu xin, maxto can janic'xa tiempoal bay yul yet Asia tu'.

²³A yet jun tiempoal tu', caw wal max aj uchnaj eb conob Efeso masanil yuj tit yowal yin is cuybej Cham Jajawil.

²⁴Ay jun cham anima chi yik Demetrio chac'om plata cham. Chi watx'nej cham yechel yatut jun xal diosal eb anima tu' chi yik Diana. Xiwil tumin chi yi' eb yet chac'om platail yin juntzan yechelej tu'.

²⁵Max yawtej oc bulan cham juntzanxa eb chi watx'nen juntzan yechelej tu' yetok, c'al juntzanxa eb yet chac'om ch'enal, max yalon cham bay eb axca ti': —Ex wet chac'om ch'enal, ti wal e yojtak, tol xiwil co tumin chi ji' yin jun jopiso ti'.

²⁶Palta ti wal che yila' cax che yaben c'apax tzet lanan yunen Pablo. Tolab a juntzan dios watx'nebil yuj anima, man ab diosok yala'. Xiwilxa mactxel mayal ak'chaj c'ul yuj. Man asannejok bay Efeso ti', palta q'uexc'al mayal ak'lay c'ul masanil eb bay yul yet Asia ti' yuj.

²⁷Caw wal ay is may jun ti'. Tekan majxa tok co txon yuj tzet chi yal nak yin tu'. Yetok c'apaxok, tekan c'amxa yelapnok yatut xal co diosal Diana yul sat anima. A xal co diosal ti', caw wal miman yelapnok xal yul sat masanil anima bay Asia ti', c'al bay masanil yulyibank'inal. Palta tinani', caw wal ay is may, tekan c'amxa yopiso yul sat eb, ẍi bay eb.

²⁸A yet max yaben eb juntzan tu', caw wal max tit yowal eb sic'libil, cax max aj yaw eb yin ipejal axca ti': ¡Caw wal miman yelapnok xal co diosal Diana, ayon aj Efeso on ti'! ẍi eb.

²⁹Axa yaj uchnaj conob tu' masanil yuj tit yowal. Max mitx'on eb jun cham chi yik Gayo yetok jun cham chi yik Aristarco. Aj Macedonia eb cawanil. Ajun eb yetok Pablo yet max jay bay Efeso tu'. Max jeẍlaytok eb cawanil yuj conob bay jun lugar bay chi bet anima matz'lok.

³⁰Yochej Pablo max toj yal bay eb anima tu', palta maj chalaytok yuj eb creyente.

³¹Ay jaywan eb yajaw bay Asia tu' yamigo ba yetok Pablo, a eb max bet yak' al-lay bay cham tu', tol manchak toj tx'oxic' ba bay eb anima tu'.

³²Tx'ok tx'okxac'al tzet chi yal eb anima wajan oc tu', yujtol sombinak ay is nabal eb. Ec'ban nan eb man yojtakok, tzet yuj xan wajan ec' eb.

³³Palta ay jun cham chi yik Alejandro. Max ilay eltek cham satak conob yuj eb yet israelal. Max al-lay bay tzet yuj xan wajan ec' anima. Lajwi tu', max yak'on yechel yetok k'ab bay eb anima, yet watx' chi numay eb, yujtol yochej cham max yal ba yetok eb yet israelal.

³⁴Palta a yet max yilon eb anima tu' tol israel cham, caw max texac'al aj yaw eb masanil. Ay mi jun cabok hora max el yaw eb yalon axca ti': ¡Caw wal miman yelapnok xal co diosal Diana ayon aj Efeso on ti'! ẍixac'al eb.

³⁵A cham yajtz'ibal conob, c'ojanc'ulal max montelay eb yuj, yet watx' chi numay eb. Lajwi tu' max yalon cham bay eb axca ti': Ex wet conob, masanil anima ojtakneni tol ayon aj Efeso on ti', ayon ayoc jiban co taynen yatut xal co diosal Diana tol mimanbil, yetok jun yechel xal tu' titnak satcan.

³⁶C'am junok mac chi je' yaloni tol lek'tial juntzan chi wal ti', yuj tu xin, numayanek. Naek wal sic'libil, yet watx' c'amokab junok tzet yetal comonc'al che yunej.

³⁷Yujtol a eb nak che yi jay ti', c'am junok yobtakil chi el yunen eb nak yin co diosal. C'am eb nak chi buchwaj yin xal.

³⁸Ta chi yochej Demetrio, yetok eb yet chac'om ch'enal chi yak' queja junok mactxel, chi je' toj eb bay juzgado toj yalon bay cham juez. Chi je' toj yalon ba eb bay eb yajaw.

³⁹Ta ay junokxa tzet che yochej, chi je' e yak'on junok k'umbalba yetok eb yajaw, cax che watx'nen yayji satak eb,

⁴⁰yujtol caw wal ay is may. Jun bek chi na' eb yajaw tu' tol a yetok eb lanan jak'len owal. Ta chi k'anlej eb ayon axca ti': ¿Tzet yuj xan chex aj uchnaj e yak'on owal? ta ẍi eb, c'am tzet watx' jalon bay eb yuj co colbanilok, ẍi cham yajtz'ibal conob tu' bay eb.

⁴¹Lajwi yalon bay eb axca tu xin, max chekon pax masanil eb anima tu' bay yatut.