Read Q'anjob'al Hch 21 Bible Online

Hch 21 - Q'anjob'al bible

Hch 21

¹Max can eb creyente tu' juj xin, max on oc yul barco, t'inan max on apni bay conob Cos. Axa yet junxa c'ual, max on toji, axa japni on bay conob Rodas. Lajwi tu', max con toj pax junelxa, max on apni on bay conob Pátara.

²A tu' max on oc yul jun barco lananxa toj bay Fenicia, max on toj bian.

³Lananxa co bey yiban a' xin, max jilontok bay co q'uexan k'ab jun sutan tx'otx' nan a' mar, chi yik Chipre. Lajwi tu', max on apni bay conob Tiro bay yul yet Siria, yujtol a tu' chi ec' cancan yikatz te barco tu' bay tu'.

⁴A yet max on eltek yul te barco tu', ay eb creyente max jil yin. Ukeb c'u max on ec' yetok eb bay tu'. Ikbabil eb yuj Cham Espíritu max yalon eb bay Pablo axca ti': —Matawal c'am chach toj bay Jerusalén tu', ẍi eb bay.

⁵A yet max lajwi ukeb c'u tu xin, max on toji. Max on bet yak'can eb creyente masanil yetokc'al yistzil c'al yuninal, tiel conob. A tu' max on ay jajan ti a' mar txajlok yetok eb.

⁶Lajwi tu', max co tak'elencan co ba yetok eb, max on occantok yul barco, axa meltzojcan eb bay yatut tu'.

⁷A yet max on el bay conob Tiro tu', max on apni bay conob Tolemaida. A tu' max con elcantek yul barco bay tu', max on can yetok eb creyente jun c'u bay tu'.

⁸Axa yet junxa c'ual, max on toji, axa japni bay conob Cesarea. A bay yatut Felipe max on apni, cham yalomal el k'anejal yet colbanilej, tol max oc c'apax diáconoal bay Jerusalén yetok wakwanxa eb.

⁹Ay canwan cutz'in Felipe tu' c'amto yetbi, k'opojto eb. Chi yalil eb k'anej Dios.

¹⁰Yak'ban ayon ec' jayeb c'u bay tu', max jay jun cham chi yik Agabo, petoj cham bay yul yet Judea. Yalomal c'apax el k'anej Dios yayji cham.

¹¹Max jayoc cham k'anjab jetok. A yet lanan co k'anjab yetok tu', max yion el c'alil Pablo, ac'al oc max c'al is k'ab c'al yakan yetok an c'alilej tu'. Lajwi tu', max yalon axca ti': —A Cham Espíritu Santo chi alon axca ti': Caytu' ok yun c'al-lay ay cham ay yet jun c'alilej ti' yuj eb israel bay Jerusalén. Ok lajwok tu', cax ok yaon oc eb yul k'ab eb man israelok, ẍi Cham Espíritu Santo, ẍi cham Agabo.

¹²A yet max jaben yetok eb aj Cesarea tzet chi yal cham tu', max on oc tean yin Pablo, tol c'am chi toj bay Jerusalén tu'.

¹³Palta max yal ayon axca ti': —¿Tzet yuj xan chex ok'i cax chin e tx'emon cus axca ti'? Tok ay yelapnok yul in sat ta chin c'al-lay ay yuj eb. Caxc'al chin is mak' cam eb bay Jerusalén tu' yuj Cham Jajawil Jesús, ok wak' in ba bay eb, ẍi ayon.

¹⁴Tutun maj tenchaj ay juj xin, xan yilxa mi, con chi. Max jalon axca ti': —Yunokab bay chi el yin c'ul Cham Jajawil xin, con chi.

¹⁵Lajwi tu xin, cax max co watx'nej co ba, max on toj bay Jerusalén.

¹⁶Ay jaywan eb creyente aj Cesarea tu' max toj jetok, max toj c'apax jun cham aj Chipre ayxatax yoc yin creyenteal jetok, chi yik Mnasón. A yet ok on apnok bay Jerusalén, a bay yatut cham t'inan japniok jak' co posada.

¹⁷A yet max on apni oc bay Jerusalén, max on is cha' apnok eb creyente yin tzalojc'ulalil.

¹⁸Axa yet junxa c'ual, max on toj yetok Pablo bay yatut Jacobo. Wajanxa ec' eb anciano bay tu', max on apni ocok.

¹⁹Max yak'on Pablo cawil c'ul eb. Max yal bay eb masanil tzet max el yunen Dios yetok, nan xol eb man israelok.

²⁰A yet max yaben eb juntzan tu', max yalon eb watx' k'anej bay Dios. Lajwi tu', max yalon eb bay Pablo tu' axca ti': —Watx' ton wuẍtak, palta ojtak, tol xiwil milal eb jet israelal max yaoc Cristo yin is c'ul. Chi yal eb masanil, tol yowalil chi jikej juntzan ley Moisés.

²¹Max yab eb k'umal, tol ach ec'nak ach cuywaj xol masanil eb jet israelal aytok xol eb man israelok, tolab max al bay eb tu', tol manchakxa yikej eb ley Moisés tu'. Tolab max al bay eb, tol manchakxa yak' circuncidar eb yuninal, manchakxa beybalnej eb co beybal ayon israel on ti'.

²²¿Tzet ok jut tinani'? Yujtol ok yabc'alta' eb tol max ach jayi.

²³Yuj tu' ikej tzet ok jal ayach ti xin. Ay canwan winak co xol ayxa is trato yetok Dios. Yowalil chi yak' eb yun is trato tu'.

²⁴Itok eb etok, cax chi toj a watx'nen a ba yetok eb axca yalon ley Moisés. Cha tojlanej gasto eb chi yak'balnej manon juntzan xajanbal. Chi lajwi tu', cax chi yak'on tzuklay el ba eb canwanil. Ta caytu' chot axca tu', ok yil eb anima masanil, tol a tzet max al-lay en max yab eb tu', lek'tial toni, cax ok yilon eb bian, tol chekej ley Moisés tu'.

²⁵A pax bay eb man israelok maxax yaoc c'ul yin Cristo xin, tz'ibbilxa tok co carta bay eb, tol man yowalilok chi yikej eb juntzan tu'. Asan jayeb chekbanilej ti' max jaltok bay eb, tol manchak chi' eb no chibej chi ak'lay yin xajanbalil bay juntzan tzet chi al-lay oc diosal. Manchak chi' eb chic'. Manchak chi' eb no no' chi sut'lay camok. Manchak beybalnej eb ajmulal. Caytu' max jut jalontok bay eb, ẍi eb anciano tu' bay Pablo.

²⁶Axa yet junxa c'ual max ilaytok eb canwanil yuj Pablo tu', max watx'nen ba yetok eb nak, axca yalon ley Moisés tu'. Lajwi tu', max oc yul templo Dios yuj yalon bay eb sacerdote, tzet c'ual chi lajwi tiempoal watx'nen ba eb, yet chi yak'on junjun eb yofrenda bay Dios.

²⁷A yet lananxa lajwi yukeb c'ual tu xin, ay jaywan eb israel aj Asia max iloni tol ayic' Pablo yul templo Dios. Axa yuchon aj somnaj eb eb anima tu', yuj tit yowal eb. Axa mitx'on eb Pablo tu'.

²⁸Caw yip eb yalon axca ti': Ex jet israelal, colwajanek. A ton jun winak ti' chi ec' cuyon anima bay junjun lugar. Yob chi yal nak jin ayon israel on ti'. Yob chi yal nak yin ley Moisés c'al yin templo Dios ti'. A tinani', comonc'al max yi octok nak jaywan eb griego yul templo Dios ti'. A jun na ti', asan Dios ay yet, palta mayal etax el yuj nak yul sat Dios, ẍi eb.

²⁹Caytu' max yut k'anjab ba eb axca tu', yujtol max yil eb, tol junejc'al chi ec' Trófimo yetok Pablo tu' yul conob. A Trófimo tu', griego, cax aj Efeso. A naon eb, tol max yi octok Pablo tu' yul templo Dios tu' yetok.

³⁰Caw wal max tit yowal masanil conob, cax max wajban oc ba eb, max bet tzicon eltek eb Pablo yul templo Dios tu', cax k'oklay eltek yina yuj eb. Ayman max makchej eb puerta bay.

³¹Lananxa yochen eb tol ok mak' camok, axa bet yal-lay bay cham coronel, tol lanan yaj uchnaj conob yuj tit yowal.

³²Yuj tu xin, ayman max toj cham yetok is soldado, c'al juntzanxa yet yajawilal. Yanej eb toj bay lanan wajban oc ba anima tu'. A yet max yilontok eb anima tu', tol lanan yapni oc cham coronel yetok is soldado masanil, max bekon mak'on eb Pablo tu'.

³³Max apnic'al oc cham coronel tu xin, cax max mitx'ontek cham Pablo tu', cax yak'on cham alay oc cab cadena yin. Lajwi tu' max k'anlen cham bay eb anima tu' axca ti': —¿Mactxel jun winak ti'? ¿Tzet mul nak che yila'? ẍi bay eb.

³⁴Palta max aj bulnaj eb anima tu' yaloni, cax tx'ok tx'okc'al tzet chi yal junjun eb. C'amxa chi yab cham tzet chi yal eb, yujtol toxanej chi wekeki eb. Yuj tu xin, xan max yak' cham ilaytok Pablo tu' bay cuartel.

³⁵A yet max apni oc eb bay k'ochal chon ajtok janic' yet chon ajapnok ti' cuartel tu', max batxlay aj Pablo tu' yuj eb soldado, yujtol max yochej eb anima tu' max mak' cam bay tu'.

³⁶Yujtol masanil eb tzakan oc yintak, chi el yaw eb, cax chi yalon eb axca ti': Camokab nak ayman, ẍixac'al eb.

³⁷A yet lanan yion octok eb Pablo tu' yul cuartel, max yalon bay cham coronel tu' axca ti': —¿Chi mi je' in k'anjab jabok etok? ẍi bay cham. Axa yalon cham bay axca ti': —¿Tom chi je' alon griego?

³⁸Mantok tol aj Egipto ach. A chi wut in naoni tol ach inej el yich jun owal yin cham yajaw yet payxa, cax max eon bey caneb mil eb nak mak'om cam anima bay jun tz'inan tx'otx', ẍi cham bay.

³⁹Axa yalon Pablo tu' bay cham axca ti': —C'amak. Ayin ti' israel in. A bay jun miman conob Tarso, yul yet Cilicia, a tu' aljinak in. Ac'al chi wal ayach, ¿c'am mi chin a cha' k'anjab jay belanok bay eb anima? ẍi.

⁴⁰—K'anjaban xin, ẍi cham bay. Axa yeltek lecan Pablo tu' bay sat k'ochal ti' cuartel tu', max yion aj k'ab can, yuj yak'on yechel yet watx' chi numay anima tu'. Max ay numnaj eb xin, axa k'anjab eltek nan xol eb tu' yin is ti' eb, a ton hebreo, axca ti':