Read Q'anjob'al Hch 23 Bible Online

Hch 23 - Q'anjob'al bible

Hch 23

¹Axa yec' t'ananok Pablo tu' xol eb sat yajaw tu', max yalon bay eb axca ti': —Ex wet conob, watx'c'al yayji yikbomal in nabal satak Dios, xan c'am tzet chin na', masantac'al yet jun c'u ti', ẍi bay eb.

²Max yalon cham sat sacerdote chi yik Ananías bay eb ayic' cawilal Pablo tu', tol chi mak'tok eb ti'.

³Axa yalon Pablo bay Ananías axca ti': —A Dios ok ach mak'onok, yujtol cab sat ach. Chotan ach ay quin a beyc'ulnen axca yalon ley Moisés, palta ilab chin a chek mak'layok, man pax cayok tu' yalon ley tu', ẍi bay.

⁴Axa yalon juntzan eb ayic' bay tu', axca ti': —¿Tom chach buchwaj wal yin cham sat sacerdote yayji yuj Dios? ẍi eb bay.

⁵Axa yalon Pablo tu' axca ti': —Ex wet conob, man wojtakok tatol sat sacerdote cham ti'. A yul tx'an Un Tz'ibbilcanok chi yal axca ti': Manchak e yal yobal k'anej yin cham yajawil e conob, ẍi tx'an, ẍi Pablo.

⁶Axa max yiloni, titol saduceo nan eb sat yajaw tu', axa nanxa eb xin, fariseo eb. Yuj tu xin, xan caw yip yalon bay eb axca ti': —Ex wet conob, ayin ti' fariseo in, fariseo c'apax in mam. Lanan in beyc'ulnelayi yujtol chi waoc yin in c'ul tol ok ictzoj aj eb camnak, ẍi bay eb.

⁷A yet max yalon axca tu', axa teyelen aj ba eb yet fariseoal yetok eb saduceo tu'. Max pojchajtok eb, cab bulanxa max eloc eb.

⁸Yujtol chi yal eb saduceo tu', tol man ok ictzoj aj eb camnak. Chi yalon c'apax eb tol c'am ángel, tamwal espíritu. Axa eb fariseo chi aloni, tol ay ton juntzan tu'.

⁹Axa yaj bulnaj eb yel yaw masanil tu'. Ay juntzan eb meẍtol yin ley Moisés, yetbeyom ba yetok eb fariseo tu', max aj bulnaj eb yalon axca ti': —C'am jabok yobtakil chi el yunen Pablo ti'. Yamita xin ay junok espíritu ma junok ángel max k'anjab bay, ẍi eb.

¹⁰Max lajwi tu', max texac'al caklen aj ba eb sic'libil. Caw wal max xiwaj cham coronel yuj eb. A naon cham tol lanan coc' tzilnelaytok Pablo tu' yuj eb. Yuj tu' xan max yawtejtek cham eb is soldado, yuj toj ilay el Pablo xol eb. Lajwi tu', max yiontok eb bay cuartel junelxa.

¹¹Axa yet ak'balil xin, max ul tx'oxon ec' ba Cham Jajawil bay Pablo tu', max yalon axca ti': Pablo, manchak ach oc il. Axca max ot alon el wabixal bay Jerusalén ti', caytu' ok ot alon el bay Roma, ẍi Cham bay.

¹²Axa yet max k'inibi aj xin, ay jaywan eb israel max wajbaj oc ba. Max lajtinen el ba eb, tol chi mak' cam eb Pablo. Max yalon eb axca ti': —Masantac'al chi cam Pablo ti' juj, cax ok on lowok, c'al juq'uen a'. Ta c'am chi jak' yun tzet chi jal ti', caxc'al chi yatek Dios yailal jiban, ẍi eb.

¹³Ec'ban 40 bisil eb max alon axca tu'.

¹⁴Axa toj eb satak eb yajawil eb sacerdote tu' c'al eb ichamtak winak ay yopiso chekon eb israel, max yalon eb bay eb axca ti': —Max jak' co ti', tol man ok on lowok, masantac'al chi yal cam Pablo juj. Max co k'anontek yailal jiban bay Dios, ta c'am chi jak' yun tzet max jal tu'.

¹⁵A tinani xin, che k'an ayex ti' yetok juntzanxa eb sat yajaw bay cham coronel, tol chi yitek cham jun Pablo tu' ayex yecal. Che yal bay cham, tol ayto wal tzet che yochej che yab bay Pablo tu'. Ayonxa, watx'xa pax jayji co makon bay chi ca jayoc tu', ẍi eb israel tu'.

¹⁶Palta ay jun nak yune' yanab Pablo max aben k'umal tzet max lajtinej el eb. Yuj tu xin, max toj bay cuartel tu', max bet yalon yab Pablo.

¹⁷Max yabc'al Pablo axca tu', cax max yawten jun cham capitán, axa yalon bay cham axca ti': —Itok jun nak ach'ej ti' bay cham coronel. Ay tzet chi yochej nak chi toj yal bay cham, ẍi bay.

¹⁸Axa yiontok cham capitán tu' nak bay cham coronel tu'. Lajwic'al yapni oc eb, max yalon cham capitán bay cham axca ti': —A nak ayoc preso chi yik Pablo, max in awteni, cax max k'anon nak ayin, yuj wiontek jun nak ach'ej ti' ayach. Tolab ay tzet chi yochej nak chi yal ayach, ẍi cham capitán tu'.

¹⁹Axa nic'lay nak yuj cham coronel tu', max jitzon el ba eb tx'oklil, max yalon bay nak. —¿Tzet chochej chal ayin? ẍi cham bay nak.

²⁰Max yalon nak axca ti': —Ay eb israel max lajtinej el ba. Tolab ok k'an eb ayach, cax chaontok Pablo satak eb sat yajaw yecal, cax ab ok tz'ak yalon eb ayach tol ayto wal tzet ok k'anlej el eb bay.

²¹Palta man a cha abej. Yujtol ec'ban 40 bey eb ok c'ubaj el ba, cax ok mak'on cam eb yul be yala'. Tolab max yak' eb is ti', tol man ok low eb, masantac'al chi cam Pablo tu' yuj eb. Toltax max k'antek eb yailal yiban bay Dios, ta c'am chi yak' eb yun jun tzet max lajtinej eb yunen tu'. A tinani', watx'xa yayji eb. Lanan makon yab eb, ta chi toj Pablo tu' satak eb sat yajaw tu', ẍi nak ach'ej tu'.

²²Lajwi tu' max yalon cham bay nak axca ti': —C'am junok mac bay chalilok yuj max ul al jun ti' ayin, ẍi cham bay nak. Axa cheklay pax nak yuj cham tu'.

²³Lajwi tu xin, max yawtentek cham coronel tu' cawan capitán, max yalon cham bay eb axca ti': —Che chek watx'nej ba 200 eb comon soldado yetok 70 eb ok aj yiban chej, c'al 200 eb ok yi' is lanza, yujtol ok tok eb bay conob Cesarea yet a las nueve yet ak'balil.

²⁴Cax che yaon aj tz'um no chej bay ok aj Pablo, yujtol yowalil ok e yitok satak cham Félix, yujtol a yajaw yayji. Jelanc'al che yut e ba, ayta tzet ok on Pablo tu' yulak be, ẍi cham coronel tu' bay eb.

²⁵Max yatok cham jun carta bay Félix tu', max yal jun carta tu' axca ti':

²⁶Ayin Claudio Lisias in, chin tz'ibejtok jun carta ti' ayach mamin yajaw Félix. Ti chi watok cawil a c'ul.

²⁷Chi watok jun winak chi yik Pablo ayach. A eb israel max mitx'oni. Ijan wal max mak' cam eb, palta ayin max in colil nak yetok eb soldado, yujtol max wabej tol aj Roma nak.

²⁸Max wochej max wab tzet yuj xan max ak'lay queja nak yuj eb israel tu'. Yuj tu xin, max wak' tit nak satak eb sat yajawil eb.

²⁹Axa max wabeni, tolab yuj ley eb, xan chi yak' queja eb, palta man is mojok mak'lay camok, tamwal moj yoc preso.

³⁰Palta max wabej, tol ay eb israel max lajtinej el ba yin, tol ok mak' cam eb. Yuj tu' xan chi watok nak ayach. Max wal bay eb chi ak'on queja nak tu', tol chi je' toj eb ayach, cax chi toj yalon eb, tzet wal is nabal eb yin nak. Asan janic' ti' chi waltok ayach; xa jil co ba, ẍitok yul is carta tu'.

³¹A eb soldado max iontok Pablo tu', ak'balil max yitok eb axca max yun yal-lay bay eb, max toj eb yetok bay conob Antípatris.

³²Axa yet junxa c'ual, max meltzoj eb comon soldado tu' bay is cuartel. A pax eb ayaj yiban chej xin, max tojcan eb yetok Pablo tu'.

³³Max apnic'al eb bay conob Cesarea tu', max yak'on eb tx'an carta ibil oc yuj eb tu' bay cham yajaw, max yak'on c'apax eb Pablo bay cham.

³⁴Lajwi yilon cham tx'an carta tu', max k'anlen el cham bay Pablo tu' tzet conobal bay cajan. Max yaben oc cham tol aj Cilicia.

³⁵Axa yalon cham bay tu' axca ti': —Jayokab eb chach ak'on queja tu' bel. Catatu bian, ok waben tzet ok ot alon a ba, ẍi cham bay. Lajwi tu', max yak'on cham taynelay bay is miman na cham rey Herodes.