Read Q'anjob'al Hch 26 Bible Online

Hch 26 - Q'anjob'al bible

Hch 26

¹Axa yalon Agripa bay Pablo tu' axca ti': —Chi je' chal a ba tinani xin, ẍi bay. Axa yion aj Pablo tu' k'ab, max chaon el yich yalon axca ti':

²Ach mamin rey Agripa, xiwil chin tzaloji, yujtol cha cha' walon in ba ayach. Chi wochej chi wiel masanil tzet max yaoc eb wet israelal ti' wiban.

³Yel toni watx' chi wal ayach, yujtol ojtakxa co ley ayon israel on ti'. Ojtakxa tzet bay chi co teyelej co ba. Yuj tu xin, chin k'an ayach tol miman wal chot a c'ul win, cax chaben tzet ok wala'.

⁴Yojtak masanil eb wet israelal tzetbil yili in beybal yet max in titc'al oc yaliẍal bay in conob, c'al bay Jerusalén.

⁵Ta chi yochej eb chi yala', chi je' yalon eb tol fariseo in yintax wach'ejal. A eb fariseo tu', caw wal yikem eb yin beybalnen juntzan tzet chi cheklay co beybalnej yuj co religión.

⁶Axa pax tinani', chi c'oli quin yak'on queja eb, yujc'al tol chi waoc yipok in c'ul, tol ok yak' ictzoj aj Dios eb camnak, axca wal max yut yak'oncan is ti' bay eb jichmam.

⁷A lajcaweb bulan eb jet israelal, echbanebil yunen el tzet yalnakcan Dios yuj eb masanil. Yuj tu xin, chi yiajtek eb c'ulok yak'on serbil Dios c'ualil c'al ak'balil. Mamin rey Agripa, yujc'al wal tol ayin oc wechbanen yunen el jun tu', xan chin yak' queja eb israel ti' tinani'.

⁸¿Tzet xan c'am che yaoc yin e c'ul tol chi ictzonelay aj eb camnak yuj Dios?

⁹A in naon yet yalantok, tol xiwil tzet t'inan wunen yuj wajc'ulal yin eb yet-xa Jesús aj Nazaret. A in naoni, tol watx' chi wut in ba.

¹⁰Cay tu' wutnak in ba bay Jerusalén. Ocnak wopiso yuj eb yajawil eb sacerdote, yuj tu' xiwil eb creyente wanak oc preso. Ayin jun chi wal wet yet chi mak'lay cam eb.

¹¹Tx'ial elc'al etnebil eb wuj, yet watx' c'amxa chi yaoc eb c'ul yin Jesús. Cac'al tu' ec' utbil eb wuj bay junjun nail culto eb wet israelal. Caw wal chi chichon in c'ul yin eb. Toltax betnak in ec' bay juntzanxa tx'ok conobal najat, yujc'al bet wetnen eb.

¹²Yuj in chichonc'ulal tu', xan max in toj bay conob Damasco yet junel. Max ak'lay wikbej yuj eb yajawil eb sacerdote, cax max in cheklaytok yuj eb.

¹³Palta mamin rey, ok waltek ayach tzet onnak in. Lanan in bey yet chuman wal c'u, max wilon jun sakk'inal max tit jopnaj satcan. Ec'ban sakk'inalil yintak sakk'inalil c'u, max low jopnaj win, c'al yin eb ajun wetok.

¹⁴Max on telc'oj co masanil yuj jun sakk'inal tu'. Axa waben yoc jay belan k'anej yin hebreo axca ti': Saulo, Saulo, ¿tzet yuj xan chin oktek ec'ok? Munilc'al chetnej a ba a tx'oklil, axca junok no wacax chi teklay oc te' ay is txam yin, cax chi tec'waj no' yin txam te te' tu', ẍi ayin.

¹⁵¿Mac ach txel, Mamin? quin chi bay. Axa yalon Cham Jajawil tu' ayin axca ti': Ayin ton Jesús in, lanan quin okten ec'ok.

¹⁶Palta ajan wan. Chi ul in tx'ox in ba ayach, yet watx' ok in ak' serbil, cax ok alon el yabixal tzet max el ti', c'al jantak tzet tolto ok in tx'ox ayach.

¹⁷A tinani', ti chach in chektok bay eb man israelok. Ok ach in colil yul k'ab eb, c'al yul k'ab eb et israelal.

¹⁸Chach in chektok bay eb, yuj toj a jakoncan nabal eb, yet watx' chi bekcan eb beybal k'ekk'inal, cax chi oc eb yin sakk'inalil Dios. C'al yuj yelcan eb yul k'ab nak Satanás cax chi occan eb yul k'ab Dios. Yuj c'apax quin yaon oc eb yin c'ul, yet watx' chi ak'laycan lajwok yobtakil eb yiban. Axca tu' bian, axa yoccan eb tz'akilok eb ocnakxa yetok Dios tu', ẍi Jesús ayin.

¹⁹Yuj tu xin, mamin rey Agripa, max wikej tzet ul yalnak Cham Jesús ayin, petoj satcan cax ul tx'oxon ec' ba ayin.

²⁰Yuj tu' xan a bay Damasco tu' max in babji walon el k'anej Dios. Lajwi tu' max ec' walon el bay Jerusalén, c'al bay junjun conob yul yet Judea, c'al bay eb man israelok. Max walon yab eb tol chi na ba eb, cax chi yaon oc eb nabal yin Dios. Max walon c'apax bay eb, tol yowalil watx' chi yut eb is beybal, yet watx' miman txequel tol chi na ba c'ul eb.

²¹Yujc'al wal k'anjabnak in el tu xin, xan max quin is mitx' eb wet israelal bay yul templo Dios, cax max yochej eb max quin yak' camok.

²²Palta yuj wal colwal Dios wetok, yuj tu' xan tec'anc'al chi wut in ba. Ac'ala' in pax tinani', tec'anc'al chi wut in ba walon el k'anej Dios bay masanil anima. Chic'al wal bay eb mimek winak, c'al bay eb yaynakil. Asan yabixal tzet t'inan jayi, tol yin ayokto max tz'ibencan eb chekbej Dios payxa yetok Moisés, asan chi walilok.

²³Tol a Cristo yowalil max yab yail cax max cami. Max lajwi cami, cax a' max oc aj babelal yictzonelay aj xol eb camnak. Catatu bian, max yalon el yabixal colbanilej bay eb jet conob, c'al bay masanil anima, ẍi Pablo.

²⁴Lanan wal yalon ba Pablo tu', cax max aj jucnaj Festo yalon bay axca ti': —Caw wal loco ach Pablo. Xiwil tzet chi ak'i a cuyu', yuj tu' xan chach oc locoal yuj, ẍi bay.

²⁵Axa tak'wi Pablo tu' bay axca ti': —Mamin yajaw Festo, mayin locook. A juntzan k'anej chi wal ayex ti', caw yel, bayc'al ijan yayji ocok.

²⁶A cham rey Agripa ti', yojtak cham juntzan ti' sic'libil. Yuj tu xan tec'an chi wut in ba cax chi walon juntzan ti' e satak. A juntzan tzet chi wal ti', man ewantakok yayji, yojtak eb anima masanil. Yuj tu' wojtak, yojtak c'apax cham rey ti'.

²⁷Axa ach mamin rey Agripa, ¿chi mi aoc yin a c'ul tzet albilcan yuj eb chekbej Dios payxa? Wojtak tol chaoc yin a c'ul, ẍi Pablo tu'.

²⁸Axa tak'wi cham rey tu' bay axca ti': —A na' talaji tol yuj jab chal ti', cax chin occan creyenteal etok, ẍi cham.

²⁹Max yalon Pablo tu' bay axca ti': —Matawal axca max yun woc creyenteal ayin ti' matawal chi el yin c'ul Dios tol cay tu' chi yun oc c'apaxok. Matawal chi oc c'apax eb lanan yabxalwi ti' masanil. Caxc'al ta asan yuj janic' ti' chex oqui, ma a toc'al yet mimantakto tzet ok al-lay ayex xin. Matawal lajan che yuncan axca in ti', palta c'am chex pixay yetok cadena axca wayji ti', ẍi Pablo bay eb.

³⁰Lajwi yalon Pablo juntzan ti', axa yaj wan cham rey tu' yetok xal Berenice. Max aj c'apax wan cham Festo yetok masanil eb wajan ec' yetok eb.

³¹Max jitzon el ba eb tx'oklil yuj lajtinen el eb, tzet watx' chi yun jun tu'. Max yalon eb axca ti': —C'am junok is mul jun winak ti' moj cam yuj, toltax man mojok nak yoc preso, ẍi eb.

³²Axa Agripa max alon bay Festo axca ti': —Matawal maj k'antok ba nak satak cham yajaw bay Roma, chi mi je' co bekon el tinani', ẍi bay.