Read Q'anjob'al Hch 28 Bible Online

Hch 28 - Q'anjob'al bible

Hch 28

¹Axa yet maxax on colchaj el xin, max jabeni tol Malta bi jun lugar nan a' tu'.

²Caw wal watx' max yut eb aj lugar bay tu' c'ul jin. Max yaoc eb jun miman k'ak', max con yawten eb k'aẍnok, yujtol caw wal sic, cax lanan yay pax nab.

³Axa bet wajontek Pablo cabxa co c'ax tu'. Lanan wal yaontok te' yiban k'ak', max eltek jun no labaj xol te' yuj k'ak' tu'. Max chilay k'ab yuj no', cax yoccan t'unan no' yin.

⁴Yujtol max yil eb aj lugar bay tu' tol max occan t'unan no' yin is k'ab tu', xan max yal eb axca ti': A jun winak ti', tekan tol mak'om cam anima. Caxc'al max je' yuj colchaj el yiban a', palta yowalil ok jayc'alta' oc yiban yuj is mul tu', cax ok camok, ẍi eb.

⁵Palta a Pablo tu', toc'al max tzic is k'ab, axa yayc'ay jolnaj no' xol k'ak' tu' yuj. C'am jabok tzet max utlay yuj no'.

⁶Makbilxac'al yuj eb masanil malaj k'ab Pablo tu'. Max na' eb tol ok camxac'al yet jun bek tu'. C'uc'al max yechbanej eb, c'amc'al pax jabok tzet chi oni. Yuj tu xin, max q'uex eb is nabal, max yalon eb axca ti': —A jun winak ti', tekan tol dios, ẍi eb yuj.

⁷A cawilal bay ayon ec' tu', a tu' ay is tx'otx' cham yajaw bay Malta tu'. Publio bi cham. Max on cha apnok cham bay yatut. Caw wal watx' max yut cham c'ul jin. Oxeb c'u max on ec' yetok cham bay yatut tu'.

⁸A mam cham Publio tu', caw wal ya'ay. Caw wal tol chi cam yuj k'ak', c'al chic' c'ulej. Axa yoctok Pablo bay is cuarto bay telan aj tu', max txajli yuj, max yaon c'apax oc is k'ab yiban, axa jaycan c'ul cham yuj tu'.

⁹Lajwi jaycan c'ul cham xin, cax max jayoc masanil eb ya'ay aj lugar tu' bay Pablo. Pilanc'al max watx'jican eb yuj.

¹⁰Xiwil camc'ulal eb aj lugar bay tu' jin. Axa yet max jay tiempoal co toj yul junxa barco xin, maxc'al yak' eb co tzetak yetal chi oc yopiso juj yulak be.

¹¹Oxeb xajaw max on ec' bay jun lugar Malta tu'. Ay jun Alejandríail barco max yechbanej yec' nabil k'inal ayic' bay tu'. Ayoc yechel cab dios satak jun barco tu', jun is diosal eb chi yik Cástor, yetok jun chi yik Pólux.*fn* A yul jun barco tu' max on oqui, max on toji,

¹²Max on apni bay conob Siracusa. Oxeb c'u max on ec' bay tu'.

¹³Lajwi tu', max on toj junelxa, ac'al tilak tx'otx' max on toji, masantac'al max con apni bay conob Regio. Axa yet junxa c'ual, max tit jun cak'ek' bay sur. Yuj tu' xan max on toji. Axa yet yewial tu' max on apni bay conob Puteoli.

¹⁴Ay jaywan eb creyente max jil yin bay tu'. Max yochej eb max on ayji ec' yetok. Yuj tu' xan ukeb c'u max on ayji ec' yetok eb. Lajwi tu', max on toj bay conob Roma yetok jakan.

¹⁵A yet max yaben eb creyente aj Roma tu' tol lanan japni, max on ul chaon eb yul be. Ay eb max on ul chaon bay is txonbal eb aj Apio, ay eb xin, bay aldea chi yik Oxeb Posada max on ul chalay yuj eb. A yet max yilontok Pablo tol lanan jul chalay yuj eb, max yalon yuj diosalil bay Dios. Caw wal max yi' yip c'ul.

¹⁶Axa yet max on apni bay Roma xin, maj cancan Pablo preso yetok juntzanxa eb aj preso. Palta max cancan bay junok na, toc'al max taynelay yuj junok soldado.

¹⁷Cabjial japni bay tu', max yawten Pablo eb miman txequel yayji xol eb yet israelal aj Roma tu'. A yet max jayoc eb bay, max yalon bay eb axca ti': —Ex wet conob, caw wal c'am jabok in mul bay eb jet israelal. C'am beybal eb jichmam aycan yul co k'ab chi wetnejtok, palta max quin mitx'lay bay Jerusalén yuj eb jet conob, cax max in yaon oc eb yul k'ab eb aj Roma.

¹⁸Max k'anlej yab eb aj Roma tu' ayin tzet in mul, palta max yil eb tol c'am jabok in mul tol moj in cam yuj, xan max yochej eb max quin is bekilok.

¹⁹Palta axa eb jet israelal tu', maj yal c'ul eb. Yuj tu' xan max in k'antek in ba satak cham yajaw bay Roma ti'; a cham ok naon tzet ok wunej. Ayin ti', c'am jabok tzet ok in k'an yiban eb jet conob tu'.

²⁰Yujc'al ton jun k'anej ti xin, xan chex wawtej oc wajanok, yujtol chi wochej chi wiloc e yin, cax chin k'anjab e yetok. Ay jun Cham echbanebil jay juj ayon israel on ti'. Yujc'al wal tol chi waoc in nabal yin Cham tu', xan ayoc ch'en cadena ti' win, ẍi Pablo tu' bay eb.

²¹Axa yalon eb tu' bay axca ti': —Ayon ti' c'am carta chi jay yul co k'ab yuj eb aj Judea tu' yet chi yalontek eb tzetbil ayji ocok. C'am c'apax junok eb jet aj israelal tu' chi ul alon junok tzet yetal en.

²²Palta chi jochej chi jabej tzet lanan a naoni. Yujtol chi jab k'umal, tol a bay junjun lugar, yob chi al-lay yin jun a religión tolto chi pitzc'oj aj ti', ẍi eb bay Pablo tu'.

²³Lajwi tu' max wajan alnen eb tzet c'ual chi wajbaj oc ba junelxa. A yet jun c'ual max txeclojcan eltek tu', xiwil mac max wajbaj oc ba bay ayic' Pablo tu'. K'inibaliltoc'al ch'an max chaon el Pablo yich k'anjab bay eb; masantac'al max toj c'u max bekoni. Max yaltek tzetbil chi yun yoc eb yul k'ab Dios. Max yaltek, tzetakc'al tz'ibbilcan yul ley Moisés, c'al tzetak tz'ibbilcan yuj eb chekbej Dios payxa. Caw wal max yak' nabal eb sic'libil, yet watx' chi yaoc eb c'ul yin Jesús.

²⁴Ay eb max yaoc yin c'ul. Ay eb xin, maj cha' eb yab tzet chi yala'.

²⁵Yujtol maj chalej ba nabal eb xin, xan axa c'oli pax eb bay yatut tu'. Max yalon Pablo bay eb axca ti': —A Cham Espíritu Santo ak'nej yal cham Isaías is chekbej bay eb jichmam payxa. Caw wal yel tzet yalnakcan tu', yet max yalon axca ti':

²⁶Asi' xin cax chalon bay jun conob ti': Wal yel, ok e yabc'al, palta man ok nachaj el e yuj. Wal yel ok e yilc'al, palta man ok nachaj el e yuj tzet ok e yil tu', cachi bay eb.

²⁷Yujtol a juntzan conob ti', toxa mayal pitbi el eb. Axca wal tol makan is txiquin eb, yet watx' c'am chi yab eb. Yetok c'apaxok, axca wal tol chi mutz' eb sat, yet watx' c'am chi yil eb. Tamwal chi nachaj el yuj eb, yet watx' c'am chi meltzojtek eb ayin, cax chin colon eb, ẍi Cham yul tx'an Un tu'.

²⁸Yuj tu xin, nachajokab el e yuj, tol lanan yak'on Dios jun colbanilej ti' bay eb man israelok. Yujtol chi yacbaj eb tu' txiquin bay, ẍi Pablo bay eb.*fn*

³⁰Cab abil max ayji ec' Pablo yul jun na max majanej bay tu'. Chic'al cha' masanil eb chi bet k'anjab yetok.

³¹Caw tec'an chi yut ba yalon el tzet chi yun yoc eb anima yul k'ab Dios, c'al yalon el juntzan cuybej Cham Jajawil Jesucristo. C'am mac chi tenon oc wanaj jabok.