Read Q'anjob'al Hch 5 Bible Online

Hch 5 - Q'anjob'al bible

Hch 5

¹Ay jun winak chi yik Ananías. Safira bi yistzil. Ay jun is tx'otx' eb max txonilok.

²A yet max chaon eb tojol is tx'otx' tu', max yioncan el nan yet yin, xan manxa tz'akanok max yi jay ch'en bay eb chekbej Jesús xin. Axa max yut yalon bay eb chekbej Jesús tu' tol tz'akan max yi jay ch'en masanil. Yojtak ix istzilej tol man yelok jun ti'.

³Axa yalon Pedro bay Ananías tu': —Ananías, ¿tzet xan max a chaoc nak diablo yin a c'ul xan chak' lek'tial bay Cham Espíritu Santo, cax max a mitx'on oc tojol a tx'otx' tu'?

⁴A yet c'amto cha txon tx'otx', yel et tx'otx'. Ac'ala' yet mayal a txon tx'otx', et c'apax tojol tx'otx' tu'. Yuj tu' xan, ¿tzet xan max a na' jun tzet man watx'ok ti' axca ti'? Man animaok bay chak' a lek'tial ti', palta a bay Dios chak' lek'tial, ẍi Pedro bay.

⁵Lajwic'al yaben Ananías tu' juntzan ti', axa yec' poc'naj tu', cax max cami. A masanil eb max aben k'umal jun tzet max uj tu', caw wal max xiwaj eb sic'libil.

⁶Max lajwi tu', max jay jun cawan eb nak ach'ej. Axa xoton oc eb jun k'ap yin is mimanil Ananías tu', max bet mukoncan eb.

⁷Oxebxam wal hora cami, max jayoc ix yistzil nak tu', cax max oc ix yul na. Man yojtakok ix ta mayal cam yichamil ix tu'.

⁸Max k'anlen Pedro bay ix: —¿Yel mi, tol axca ti' max oc yin tx'otx' e tx'otx' max e txono'? ẍi bay ix. —Ja', cayton tu', ẍi ix bay.

⁹Yuj tu xin, xan max yal bay ix axca ti': —¿Tzet yuj xan max e lajtinej e ba, cax che yak'on porobal Cham Yespíritu Cham Jajawil? Ab jay eb nak ti na tu', a ton eb max bet mukoncan echamil. Axa ach ok ach yi c'apaxtok eb nak ti', ẍi bay ix.

¹⁰Lajwi tu', max ec' poc'naj ix satak Pedro tu', max cam c'apax ix. Axa max ocapnok eb nak ach'ej tu xin, camnakxa ix max yilon eb. Axa yiontok eb nak is mimanil ix tu', max bet mukoncan eb nak ix is cawilal yichamil.

¹¹Yuj tu xin, max jay jun miman xiwilal yiban eb creyente masanil, c'al yiban masanil eb max aben k'umal tzet max uj tu'.

¹²A eb chekbej Jesús, xiwil milagro max tx'ox eb. Yelc'ulal wal tol max tx'oxil eb yipalil Dios nan xol anima. A bay jun tentail templo Dios chi yik tol yet Salomón, a tu' chi wajbaj ba eb creyente tu' masanil.

¹³C'am junok man creyenteok chi tec'baj ba toj xol eb yet chi wajban ba eb tu', palta yojtak eb tol caw wal watx' eb creyente tu'.

¹⁴Xiwil eb winak, c'al eb ix chi yaoc c'ul yin Cham Jajawil.

¹⁵Cax chi yion eltek eb anima is ya'ay yulak calle. Aylaj mac satlak tx'at, aylaj mac xin, asan satlak wayubej, cax chi yechbanen eb yec' Pedro is cawilal tu', yet watx' caxc'al ac'al yenel chi eq'uel yiban eb.

¹⁶Xiwil anima max tit bay conoblak bay is cawilal Jerusalén tu'. Ay eb ay is ya'ay ibil ocok, c'al eb ayoc espíritu yob yin c'apaxok, palta maxc'al jaycan c'ul eb masanil.

¹⁷Axa tit yowal cham sat sacerdote yuj sawenal tu', yetok jantak eb yetbeyom, a ton eb saduceo.

¹⁸Yuj tu xin, xan max yak' eb mitx'lay eb chekbej Jesús tu', max alay oc eb preso yuj eb.

¹⁹Palta axa yet ak'balil xin, ay jun yángel Cham Jajawil max ul jakon te preso tu'. Max ilay eltek eb yuj, max yalon bay eb axca ti':

²⁰Asek, ocanek lecan bay yamak'il templo Dios, cax che yalon el yabixal jun k'inalej max ak'lay ayex ti' bay masanil anima, ẍi jun ángel tu' bay eb.

²¹Xan axa yet lananxa sakbi xin, max toj eb bay yamak'il templo Dios tu', axa c'oli cuywaj eb yul tu'. Axa yawtelay eb yajawil eb israel tu' yuj cham sat sacerdote c'al yuj jantak eb yetbeyom. Yuj tu xin, xan max chektok eb yajaw tu' jaywan eb policía, yuj toj yilay eltek eb yul preso tu'.

²²Palta axa yet max apni oc eb bay preso tu', max yilon eb tol c'amxa mac ayoctok, axa toj yalon eb tu' axca ti':

²³—Ayon ti', max jil sic'libil, caw wal c'anani yayji te preso tu'. Lecan oc eb nak taynem preso bay ti' puerta tu', palta axa yet max co jakon te', cax max jiloni, c'amxa mac ayoctok, ẍi eb policía tu'.

²⁴A yet max yaben aj cham sat sacerdote, c'al eb yetbeyom, c'al cham sat taynemal templo Dios, caw wal max c'ayaj c'ul eb sic'libil. Maj nachaj el yuj eb tzet yayji ocok.

²⁵Lanantoc'al wal tu', cax max jayoc jun winak bay eb, tol max yal axca ti': —A eb max e yaoc preso, ayic' eb yul yamak'il templo Dios wal tinani'. Lanan cuywaj eb nan xol anima, ẍi nak tu'.

²⁶Axa toj yilay eb yuj cham sat taynemal is templo Dios tu', yetok eb yet taynemal. Palta man yinok yaxc'aynakil max yun yilaytek eb yuj eb, yujtol chi xiw eb k'okch'ennelay yuj eb anima.

²⁷Max jayc'al oc eb chekbej Jesús tu' yuj eb xin, cax max ilay jay eb satak eb yajaw tu'. Max al-lay bay eb yuj cham sat sacerdote axca ti':

²⁸—Max cam jalon ayex tol c'amxa che yalil cuybej Jesús tu'. Palta ilab tinani', pilan mayal saklem jun e cuybej ti' bay Jerusalén ti'. Toltax che yochej che yatok camichal Jesús tu' jiban, ẍi bay eb.

²⁹Axa tak'wi Pedro tu' yetok juntzanxa eb is chekbej Jesús axca ti': —Yowalil tol a tzet chi yal Dios chi jikej. A pax tzet chi yal anima xin, ta c'am chi chalej ba yetok tzet chi yal Dios, c'am chi jikej.

³⁰Ayex ti', max e yak' mak'lay cam Jesús yet max e yak'on curusnelayok, palta a Dios, Cham bay yalnak ba eb jichmam, a' max ak'on ictzoj aj xol eb camnak.

³¹A' max ak'on yopiso, cax max yion paxaj bay is watx' k'ab. Max yaoc co Yajawilok, c'al co Colomalok. Xan a Jesús chi ak'on co na co ba ayon israel on ti', yet watx' chi elcan co yobtakil yuj.

³²Ayon ti', chi jak' co ba testigoal yin juntzan chi jal ayex ti'. Ilab c'apax Cham Espíritu Santo, chi yak' ba Cham testigoal yin jetok. Chi yak' Dios Yespíritu ti' bay masanil mac chi iken tzet chi yala', ẍi eb.

³³A yet max yaben eb yajaw tu' juntzan ti', max aj jucnaj eb yuj tit yowal. Yochejxac'al eb tzet max yut yak'on cam eb ayman.

³⁴Palta a xol eb yajaw tu', ay jun cham fariseo chi yik Gamaliel.*fn* Cuywom yin ley Dios sic'libil. Caw wal watx' cham yul sat anima. Max aj wan cham nan xol eb, cax max yak'on cheklay eltok eb chekbej Jesús yina junok bek.

³⁵Lajwi yeltok eb, cax max yalon axca ti': —Ex wet israelal, chi cam co naon sic'libil, tzet ok jut juntzan winak ti'.

³⁶Jaektok co nabal yin nak chi yik Teudas yet payxa. Tz'ak yalnak oc ba yajawilal xol anima. Tz'aknak yala' tol aynaj yopiso. Ay mi 400 anima max cuywi yintak. Axa yet max mak'lay cam nak, max saklemcantok eb max cuywi yintak tu', max lajwi ay jun yet eb tu'.

³⁷Ayxata' wal tu', ay junxa nak chi yik Judas aj Galilea. Max tz'ak yaloc ba nak yajawilal, yet max ilay aj bisil eb anima yuj yajaw. Xiwil c'apax anima max cuywi yintak junxa nak tu'. A yet max mak'lay cam nak, max saklemcantok masanil eb max cuywi yintak.*fn*

³⁸Yuj tu xin, xan chi wal e yabej: Co bekek jetnen eb nak ti', yilxa eb nak. Ta yet anima jun bay ayoc eb ti', munilc'al ok yak' lajwok ay ba.

³⁹Palta ta yet Dios xin, maj je' jak'on lajwok. Ay is may, axa talaj chi yunajok, axa yetok Dios lanan jak'len owal, ẍi cham bay eb.

⁴⁰Max cha c'ul eb yajaw tu' tzet max yal cham Gamaliel tu', axa yawtelay octok eb chekbej Jesús tu' yuj eb, cax max yikon eb tz'um. Max al-lay c'apax bay eb, tol manchakxa yalil eb yabixal Jesús. Lajwi tu xin, max beklay el eb.

⁴¹Axa yeltek eb satak eb sat yajaw tu', caw wal chi tzaloj eb, yujtol max yal c'ul Dios tol yujc'al Jesús, xan chi yil eb yailal.

⁴²Maj bek eb yalon el yabixal Jesucristo junjun c'u. Pilan max ec' yal eb bay yamak'il templo Dios, c'al bay xolak na.