Read Q'anjob'al Hch 7 Bible Online

Hch 7 - Q'anjob'al bible

Hch 7

¹Max k'anjab el cham sat sacerdote bay Esteban axca ti': —¿Yel mi masanil juntzan ti'? ẍi bay.

²Axa yalon Esteban tu' axca ti': Ex wet conob, c'al ex ichamtak winak, abek. A Dios miman is mayk'ak'al. Tx'oxnak aj ba bay jichmam Abraham, yet ayic' bay Mesopotamia, yet c'amto chi toj cajan bay conob Harán.

³Yalnak Dios bay axca ti': Bekcan a tx'otx'al ti', c'al jantak eb ecan, cax chach toj bay jun tx'otx' ok in tx'ox ayach, ẍi Dios bay.

⁴Axa yel bay is lugar eb caldeo bay ayta ec' tu', axa bay conob Harán, a tu' max toj cajayok. Axa yet max cam is mam xin, max ilaytek yuj Dios bay jun lugar bay ayon ec' ti'.

⁵Palta c'am jabok is tx'otx' max ak'lay is satakok yuj Dios cayti', cax junelnej c'am jabok. Asan xin, max yak' Dios is ti' bay, max yalon bay axca ti': Ok wak' jun tx'otx' ti' ayach, c'al bay eb enatil, ẍi Dios bay. C'amto junok yuninal yet max yalon Dios jun ti' bay.

⁶Max yalon c'apax can Dios bay axca ti': A eb enatil, ok tok cajan eb bay junokxa tx'ok conobal, cax yin mosejal ok ayjok ec' eb, ok etax eb sic'libil yin 400 abil.

⁷Palta ok waoc yailal yiban jun conobal bay ok oc eb mosejal tu'. Lajwi tu xin, cax ok eltek eb enatil bay tu'. Axa in yak'on serbil eb bay jun lugar ti', ẍi Dios bay.

⁸Yetok c'apaxok, yak'nak c'apax can Dios trato yetok Abraham tu'. Yalnak Dios bay, tol chi oc jun circuncisión yin eb, yechelok is trato yetok eb. Yuj tu xin, a yet max alji jun yuninal Abraham chi yik Isaac, ukubixial yalji, max ak'lay circuncidar yuj Abraham tu'. Yetok c'apax yet max alji nak c'ajol Isaac chi yik Jacob, max ak'lay c'apax circuncidar nak yuj Isaac tu'. Axa Jacob tu', lajcawan c'ajol aljinak, max yak' circuncidar eb lajcawanil. A eb lajcawan tu', a ton eb jichmam ayon israel on ti'.

⁹A eb jichmam tu', ay jun yuẍtak eb chi yik José. A yet junel, max meltzoj oc eb ajc'ulal yin. Yuj tu' xan txonnaktok eb bay conob Egipto. Palta ayc'al oc Dios yetok.

¹⁰A' colnej el José tu' xol yatakilal ec'nak el yiban. Yak'nak Dios tu' is jelanil bay. Ocnak Dios yetok, yet watx' watx'c'al max eloc satak cham faraón, cham reyal Egipto. Yuj tu' xan yanak oc cham yopiso José tu' yin yajawilal bay Egipto, max yaon c'apax oc cham yajawilal bay yatut cham faraón tu'.

¹¹Palta a yet jun tiempoal tu', jaynak jun miman wajil yiban masanil eb aj Egipto tu', c'al yiban eb aj Canaán. Caw wal yabnak eb yail jun wajil tu'. Cay c'apax tu' eb jichmam bay Canaán tu', caw wal c'amxa chi ilchaj tzet chi lo eb.

¹²Axa yet yaben Jacob tol ay trigo bay Egipto, max chektok eb is c'ajol bay tu'. A ton eb c'ajolej tu', jichmam yayji. Babelto wal toj eb junel tu'.

¹³Axa max cheklaytok eb yet cayelal xin, max yak'on ba José yojtaknej el eb tol yuẍtak eb, xan caytu' max yut yojtaknencan el faraón mactxel juntzan yet conob José tu'.

¹⁴Max yak'on José tu' tit is mam, a ton cham Jacob tu'. Max yak'on c'apax tit eb yuẍtak, c'al yistzil eb, yetokc'al yuninal eb masanil, cax 75 bey eb yinatil Jacob tu' masanil.

¹⁵Xan caytu' max yun yapnican oc Jacob tu' bay Egipto. A tu' max cam cham. A c'apax tu' max cam eb is c'ajol tu', a ton eb jichmam,

¹⁶cax max ilay pax is mimanil eb bay conob Siquem, bay max alay octok yul jun ch'en olbil. A jun ch'en ch'en tu', a Abraham mannej bay eb yuninal Hamor bay Siquem tu'.

¹⁷Axa yet lananxa jay tiempoal yunen tzet yalnak Dios bay Abraham xin, caw wal max aj can ch'ib bisil yinatil bay Egipto tu'.

¹⁸C'ojanc'ulal max oc jun rey bay Egipto tol man ojtaknenok yabixal José.

¹⁹A jun rey tu', caw wal max etnelay eb jichmam tu' yuj. Caw wal max yak' yobc'ulalil bay eb. Max yal bay eb, tol yowalil chi k'okil eb jantak is winak unin eb chi alji, yet watx' chi lajwi el yinatil eb.

²⁰A yet jun tiempoal tu', max alji Moisés, unin tol caw wal watx' yili. Oxebnej xajaw max il-lay ch'ib yuj is mam c'al is txutx bay na.

²¹Lajwi tu xin, max yion el eb bay yatut; palta max ilchajtek yuj ix cutz'in cham rey tu', max yiontok ix bay yatut, max yilon ch'ib ix xin, axca tol yune'.

²²Yuj tu xin, xan a Moisés tu' pilan max cuylay yin jantak tzet yojtak eb aj Egipto tu', xan caw jelan k'anjabi, cax jelan watx'nen masanil tzetak yetal.

²³A yet 40 abilxa is k'inal, max jay yin c'ul toj yilon eb yet conob, a ton eb jet israelal.

²⁴Palta axa yet max apni oc xin, max yiloni, tol ay jun nak aj Egipto lanan yetnen jun nak yet conob Moisés tu'. Max col-lay el nak yuj, max ilay ec' pak nak yuj Moisés tu' bay nak aj Egipto tu', max yak'onxac'al camok.

²⁵A naon Moisés tu', tol max nachaj el yuj eb yet conob, tol a' ok k'anabax yuj Dios yet chi coloncan el eb, palta maj nachaj el yuj eb.

²⁶Yewial tu', max yilon yin cawanxa yet conob tol lanan yak'len eb owal. Max yochej Moisés tol max oc eb yin watx'c'ulalil, xan max yal cham bay eb axca ti': Ex wet conob, ¿tzet xan che yak'lej owal? Ilab e yet conob e ba, ẍi bay eb.

²⁷Axa tenlaytok Moisés tu' yuj nak tol yelc'ulal wal chi ak'wi owal tu', max yalon nak bay axca ti': ¿Mac max ach aon oc yajawil, c'al yin juezal co xol on?

²⁸¿Ma tol chi yochej a c'ul chin a mak' cam axca max ot nak aj Egipto ewi? ẍi nak bay.

²⁹Max yabc'al Moisés axca tu', axa yelaj tu'. Max toj cajay xol eb tx'ok conobal aj Madián. A tu' aljinak cawan is c'ajol.

³⁰40 abilxa yapni oc bay tu', cax max toj bay tzalan Sinaí, bay c'am anima. Ay jun ángel max tx'oxaj ba bay bay tu'. Xol xak k'ak' max tx'oxaj ba, bay jopan oc jun k'ak' k'ak' yin te q'uix.

³¹A yet max yilontok jun tu', caw wal max c'ayaj c'ul yuj, xan max toj yil wal cawilal tu'. Axa yalon Cham Jajawil bay axca ti':

³²Ayin ti' is Diosal in eb echmam, is Diosal in Abraham, yetok Isaac, c'al Jacob, ẍi bay. Axa bilaj Moisés tu' yuj xiwilal, cax majxa oc t'anan yin.

³³Max yalon Cham Jajawil tu' junelxa bay axca ti': I el a xanab, yujtol ayin ec' ayin ti' bay jun tx'otx' ti'.

³⁴Caw wal chi wil wali, tol lanan yilon eb in conob ayic' bay Egipto yailal. Chi wabej tol caw wal chi k'akwi eb. Yuj tu' xan max in ayolok cax chi ul in colon el eb xol yailal tu'. Xan, asi'. Ach ok ach in chektok bay Egipto tu', ẍi Dios bay Moisés tu'.

³⁵A yet yalan, yet max apni oc Moisés bay eb yet conob tu', maj chalay yuj eb, xan max yal eb bay axca ti': ¿Mac max ach aon oc yajawilal c'al juezal co xol on? ẍi eb bay. Palta a Dios ak'nej yopiso Moisés tu' yin yak'on cuenta eb, cax max yak'on c'apax yopiso tu' yion eltek eb xol yailal bay ayic' eb yetnen c'ul tu'. A jun yángel max tx'oxaj ba bay Moisés tu' yin te q'uix, a' max oc yetok.

³⁶A Moisés bet inej eltek eb jet conob bay Egipto tu'. 40 abil max el tx'oxon milagro bay Egipto, yin a' Cakyin Mar, c'al bay tz'inan tx'otx'.

³⁷Ac'aloc Moisés tu' alnej bay eb jet israelal axca ti': Ok chektek Dios junok jet conob ti' is chekbejok axca max quin yut ti', ẍi bay eb.

³⁸A cham tu' max ec'lej nan xol anima bay tz'inan tx'otx'. Ay jun ángel ayic' yetok eb, jun k'anjabnak yetok bay tzalan Sinaí, yet ajun eb jichmam yetok. A bay Moisés tu' yak'nakcan Dios juntzan k'anej yet k'inalej. Yuj tu' xan, axa ak'nej pax can ayon.

³⁹Palta a eb jichmam tu', maj yal c'ul eb max yikej tzet max yal Moisés tu'. Yuj tu' xan max yintaknej el eb, cax max yochen eb max meltzoj yintak junelxa bay Egipto.

⁴⁰Max yalon eb bay Aarón axca ti': Chi jochej tol cha watx'nej juntzanok co diosal chon ikbani, yujtol a Moisés max on ion eltek bay Egipto tu', man jojtakok tzet max oni, ẍi eb.

⁴¹Axa watx'nen eb yechel jun ach'ej wacax tu', cax max yalon oc eb is diosalok. Max yak'on cam eb juntzan no no', cax max yak'on eb xajanbalil bay. Max c'oli chaon eb k'inal.

⁴²Yuj tu xin, max yi el ba Dios xol eb, cax max beklaycan eb tx'oklil yuj, yet watx' chi yi ay ba eb bay waycanlak ay satcan. Axcata' max yut tz'ibencan jun chekbej Dios, bay chi yal axca ti': Ex israel, yin cawinak abil max ex ec' bay tx'otx' takin tx'otx'. Tokwal a ayin max e yak' tz'a xajanbal c'al ofrenda bay tu'.

⁴³C'amak. Palta max e yik beyic' jun e diosal chi yik Moloc,*fn* c'al jun yechel waycan e diosal chi yik Refán. A bay juntzan yechelej max e watx'nej tu', a tu' max e yiay e ba. Yuj tu' xan ok ex wiil sat e tx'otx'al, cax ok ex waoncantok sataktok Babilonia, ẍi Dios yul tx'an Un Tz'ibbilcanok.

⁴⁴Palta a yet max ec' eb jichmam bay jun tz'inan tx'otx' tu', yetbi oc eb jun mantiado bay ay is ley Dios. A jun mantiado tu' watx'nebilcan yuj Moisés axca max yut yalon Dios bay, yet max tx'oxon jun yechelej bay.

⁴⁵A jun mantiado tu', max can yul k'ab juntzanxa eb jichmam. Axa Josué max iontok jun tu' yetok eb, yet max yioncan eb is tx'otx' eb tx'ok conobal. A Dios max ion el juntzan tx'ok conobal tu' sat tx'otx'. Axa eb jichmam max ioncan tx'otx' eb tu'. A jun mantiado tu' yetbic'al oc eb, masantac'al max oc David reyalok eb.

⁴⁶A David tu', caw wal max tzaloj Dios yetok, a' max yochej max watx'nej jun is templo is Diosal Jacob, tol co Diosal c'apaxok.

⁴⁷Palta ata wal Salomón watx'nejnak jun templo Dios tu'.

⁴⁸A Dios axac'al oc tu', c'am chi ayji ec' yulak na chi watx'nej anima. Axca tu' max yun yaloncan jun is chekbej payxa:

⁴⁹A satcan, in trono yayji. Axa sat tx'otx' tx'otx', axca tol batxlubal wakan yayji. Yuj tu' xan a ayex ti', ¿tzetto wal nail ok e watx'nej aj ayin? ¿Tzetto wal lugaril ok e watx'nej aj bay ok in xewok?

⁵⁰Yujtol ayin ti', max in watx'nej masanil juntzan tzet yetal ti', ẍi Dios yul tx'an Un.

⁵¹Palta ayex ti', caw wal pit ex. Lajan e nabal axca eb man ojtaknenok Dios jabok. Caw wal c'am che yacbaj jabok e txiquin bay is k'anej. A ti' e yet tol che tenc'al yochwan Cham Espíritu Santo, xan lajan ex wal axca eb jichmam.

⁵²A eb chekbej Dios yet payxa, pilan max yab eb yail yuj eb jichmam tu', a ton eb chekbej Dios max aloni tol ok jay jun mactxel tojol is nabal, palta max ak'lay cam eb yuj eb jichmam. Axa yet max jay jun mactxel tu xin, ayexxa max e yaoc yul k'ab eb yajaw cax max e yak'on camok.

⁵³Caxc'al max yak' eb ángel juntzan chekbanil Dios ayon, palta majc'al e yikej, ẍi Esteban tu' bay eb.

⁵⁴A yet max yaben eb wajan ec' bay tu' juntzan ti', caw wal chi c'uxay eb ye yuj tit yowal eb yin Esteban tu'.

⁵⁵Palta a Esteban tu xin, ayoc yalan yikbej Cham Espíritu Santo, yuj tu' xan max aj t'anan satcan, max yilon ajtok is tzekekial Dios. Max yiloni, waan oc Jesús bay watx' k'ab Cham,

⁵⁶xan max yal axca ti': —Ilabi, jakan puertail satcan chi wila'. Ayic' Cham Chekbiltek yuj Dios co xol bay is watx' k'ab, ẍi.

⁵⁷Axa yaj yaw jantak eb bulan ec' tu' yin ipejal. Max makchen eb is txiquin. Axa tit jucnaj eb yin tu', max tzicontek eb.

⁵⁸Axa yiontok eb tiel conob tu'. A eb max oc testigoal yin Esteban tu', max yiel eb an jokan pichilej chi yaoc yin is pichil, max yak'oncan eb taynej jun nak chi yik Saulo, max michchaj oc Esteban tu' k'okch'ennen eb.

⁵⁹A yet lanan wal k'okch'ennelay yuj eb tu', max txajli axca ti': Mamin Jesús, cha'can wanimail ti', ẍi.

⁶⁰Lajwi tu xin, max ay jajanok, max aj yaw txajli yin ipejal axca ti': Mamin, manchak atok jun is yobtakil eb ti' yiban, ẍi. Lajwic'al yalon axca tu xin, axa yel c'ul tu'.