Read Q'anjob'al Hch 9 Bible Online

Hch 9 - Q'anjob'al bible

Hch 9

¹Axa Saulo xin, tol chi texac'al aj can xibten eb chi yaoc c'ul yin Cham Jajawil. Chi yala' tol ok mak' camok. Max jayoc bay cham sat sacerdote,

²yuj ul k'anon juntzan carta bay chi ak'lay yikbej yoc yulak nail culto eb israel bay conob Damasco, cax chi mitx'ontek masanil eb chi yaoc c'ul yin Jesús, caxc'al winak ma ix, tojolc'al yilaytek eb preso yuj bay Jerusalén.

³Lajwi tu' max toji, palta lanan wal yapni oc cawilal conob Damasco tu', ay jun sakk'inal max tit jopnaj satcan, max low yin.

⁴Cax max ayc'ay telnaj sat tx'otx', axa yaben yoc jay belan k'anej, max yal bay axca ti': Saulo, Saulo, ¿tzet xan chin oktej ec'ok? ẍi bay.

⁵Mamin, ¿mac ach txel? ẍi aj bay. Ayin ton Jesús in. Ayin lanan in okten ec'ok.*fn*

⁶Ajan wan, cax chach toj yul conob. A tu' ok al-lay ayach, tzet yowalil ok onej, ẍi Jesús bay.

⁷A pax eb ajun yetok Saulo tu xin, caw wal max c'aycan el c'ul eb. Max yab eb yoc jun nuk'ej tu', palta c'am mac max yil eb yin.

⁸Lajwi tu xin, max aj wan Saulo tu' sat tx'otx'. Axa max yun ajok, tol a wal jakon sat yaloni, c'amxa chi je' yilwi. Axa eb ajun yetok tu', max oc quetzan yin k'ab, max quetzontok eb yul conob Damasco tu'.

⁹A yet max apni oc yul conob tu xin, oxeb c'u maj ilwok jabok, cax maj lowok, tamwal yuq'uen a'.

¹⁰Axa bay Damasco tu xin, ay jun creyente chi yik Ananías. Max yalon cham Jajawil yin axca wayichejal bay: ¡Ananías! ẍi bay. Tix in ti' Mamin, ẍi.

¹¹Ajan wanok, cax chach tojc'al yul jun calle chi yik Jichan. A yet ok ach apnok bay yatut Judas, cax cha k'anlen bay ayic' Saulo aj Tarso, yujtol lanan txajli.

¹²Ay jun tzet max in tx'ox bay. Max wak' yila' tol ach ok ach apnok oc bay, cax ok aon ajtok a k'ab yiban jolom, axa jakchajcan sat tu', ẍi Cham Jajawil bay Ananías tu'.

¹³Palta max yal Ananías bay axca ti': Mamin, xiwil mac chi alon ayin yuj Saulo tu'. A ab bay Jerusalén, caw wal ab xiwil yobc'ulalil chi yak' yin eb chi yaoc c'ul en.

¹⁴A tinani xin, mayal jay cayti'. Max ak'lay yikbej yuj eb yajawil eb sacerdote yet chi mitx'on masanil eb chi yal ba ayach, ẍi.

¹⁵Axa yalon Cham Jajawil tu' bay axca ti': Asi', yujtol a Saulo tu', sic'bilxa el wuj. A' ok alon el wabixal nan xol eb man israelok, c'al bay eb rey, yetok nan xol eb et israelal.

¹⁶Ok wak' yojtaknej elok tol wujc'al, xan yowalil ok yil xiwil yailal, ẍi Cham Jajawil tu'.

¹⁷Catatu' bian max toj Ananías bay na tu'. A yet max apni oc xin, cax max oc yul na. Axa batxban ajtok k'ab yiban jolom Saulo tu', cax max yalon axca ti': —Wuẍtak Saulo, a Cham Jajawil Jesús, Cham max tx'oxaj ba ayach yul be bay max ca a jayi, a' max in chekontek ayach ti', yet watx' chach ilwican ajok, cax chach can yalan yikbej Cham Espíritu Santo, ẍi bay.

¹⁸Yet wal jun bek tu', max el tiẍnaj juntzan axca sol txay yin sat, axa yilwi pax aj tu'. Max aj wan, axa yak'laycan bautizar tu'.

¹⁹Lajwi tu xin, axa low tu', cax max oc yip. Tx'ialtoc'al c'ual max ayji ec' yetok eb creyente bay Damasco tu'.

²⁰Max ec' Saulo tu' yalon el k'anej Dios yulak nail culto eb yet israelal. Chi yaloni, tol a Jesús C'ajol ton Dios.

²¹A jantak eb chi aben yaloni, toxac'al chi c'ayaj c'ul eb yuj, cax chi yalon eb: —Palta a jun winak ti' max ec' etnen jantak eb chi yal ba bay Jesús bay Jerusalén. A co naoni, tol mitx'ojtok creyente chi ulic' cayti', cax chi yiontok eb satak eb yajawil eb sacerdote, ẍi eb.

²²Palta a Saulo tu xin, tol max yiajtek c'ulok yalon elok, yet watx' chi txecloj elok, tol a Jesús, a ton Cristo, palta eb yet israelal bay Damasco tu', c'am chi nachaj yuj eb, tzet chi yut paktzen bay.

²³Tutun tx'ialc'al c'ual max ec' Saulo bay tu xin, xan axa lajtinen el ba eb yet israelal yin tu'. Max wajan alnen eb, tol ok yak' cam eb.

²⁴Chi mak eb c'ualil c'al ak'balil yulak be ti' conob, cax chi yak'on cam eb yaloni, palta max yab Saulo k'umal tzet chi yal eb yin.

²⁵Yuj tu xin, axa eb is cuywom max ion el yet ak'balil. Max yaon aytok eb Saulo yul jun miman motx. Max yion eltek eb yul wentenail is murallail jun conob tu', axa bekon aytok t'ununok eb sat jun muralla tu', cax caytu' max yun colchaji.

²⁶Axa yet max apni oc Saulo tu' bay Jerusalén, max yochej max junanej ba yetok eb creyente bay tu', palta tol max xiwaj eb masanil bay. Maj cha eb yabej, ta yel creyentexa.

²⁷Axa Bernabé max iontok Saulo tu' bay eb chekbej Jesús, cax max yalon bay eb axca ti': —A Saulo ti', max yil yin Cham Jajawil yul be. Max k'anjab yetok. Yuj tu', caw wal max tec'baj ba yalon el yabixal Jesús bay conob Damasco tu', ẍi Bernabé bay eb.

²⁸Yuj tu', max ayji ec' Saulo tu' bay Jerusalén, cax max ayji ec' yetok eb creyente bay tu'.

²⁹Caw wal max tec'baj ba yalon el yabixal Cham Jajawil. Max teyelej ba yetok eb yet israelal tol griego is ti', palta max lajtinej ba eb yin tzet chi yut yak'on camok.

³⁰Axa yet max yaben eb creyente axca tu xin, max yiontok eb Saulo tu' bay conob Cesarea. Max apnic'al eb yetok bay tu', max chekoncantok eb bay conob Tarso.

³¹Cata wal tu' bian, junc'ulalxac'al ay eb creyente masanil bay Judea, c'al bay Galilea, yetokc'al bay Samaria. Caw wal tec'anxac'al waay eb. Ay xiwc'ulalil eb bay Cham Jajawil. Yuj colwal Cham Espíritu Santo yetok eb, xan yelc'ulal wal tol max aj can bisil eb.

³²Axa yet junel, yet chi ec' Pedro yilon eb creyente, max apni oc bay eb cajan bay conob Lida.

³³Ay jun winak chi yik Eneas yil-lejnak el ba Pedro yetok bay tu'. Waxakebxa abil toj telan jun winak tu', yujtol sicbinak el is mimanil.

³⁴Axa yalon Pedro bay nak axca ti': —Eneas, a Jesucristo chi ak'on jaycan a c'ul. Yuj tu xin, ajan wanok, iaj a wayub, ẍi bay nak. Cax max aj wan nak yet wal jun bek tu'.

³⁵Max yil masanil anima aj Lida yetok eb aj Sarón, tol max watx'jican nak. Yuj tu xin, max q'uexponej eb is beybal, cax max yaon oc eb is nabal yin Cham Jajawil.

³⁶A bay conob Jope ay jun xal creyente chi yik Tabita. A yin griego, Dorcas bi xal. Xiwil tzet watx' max el yunen xal, max colwaj bay eb meba'.

³⁷Axa max yunaj xin, max michchaj aj xal yuj jun ilya', axa cam tu'. Max achinelaycan xal, max ilay ajtok is mimanil tu' bay jun cuarto can.

³⁸A conob Jope tu', cawilal conob Lida ay, bay ayic' Pedro. A yet max yaben eb creyente tol a tu' ayic' cham, max chekontok eb cawan winak bay, yuj bet yalon eb bay axca ti': Ton jetok bay Jope yin ayman tinani', ẍi eb bay.

³⁹Axa tojxac'al yetok eb tu'. Max apnic'al xin, max yion ajtok eb bay jun cuarto can bay ayic' is mimanil xal Dorcas tu'. Ay juntzan eb ix ix camnakxa yichamil ayic' yiloni. Xiwil chi ok' eb yuj. Ay is pichil eb c'al is camiẍ eb max watx'nej Dorcas tu' yet ayic' yetok eb, cax chi c'oli tx'oxon eb bay Pedro tu'.

⁴⁰Max lajwi tu xin, axa cheklay aytek eb masanil yuj Pedro tu'. Max ay jajanok, cax max txajli. Max oc t'anan yin xal Dorcas tu', axa yalon bay axca ti': —Tabita, ajan wanok, ẍi bay xal. Catatu' max jakchaj sat. Axa yet max yilon oc xal yin Pedro, axa yaj chotan tu'.

⁴¹Yet wal jun bek tu', max oc mitx'an yin k'ab xal. Axa tok'on aj wan tu'. Lajwi tu xin, max yawten ajtok eb ix camnakxa yichamil tu', c'al juntzanxa eb creyente. Max tx'oxlay eltek xal yuj Pedro tu' bay eb, tol mayal ictzoj aj xal.

⁴²Pilan max yab eb aj Jope tu' k'umal jun ti', yuj tu' xan xiwil eb max yaoc c'ul yin Cham Jajawil.

⁴³A Pedro tu xin, max can jayebxa c'u bay Jope tu'. A tu' max ayji ec' bay yatut jun winak chi yik Simón, watx'nem tz'um.