Read Q'anjob'al Ro 1 Bible Online

Ro 1 - Q'anjob'al bible

Ro 1

¹Ayin ton Pablo in, yak'omal in serbil Jesucristo. Yawtejnak in oc is chekbejok, sic'bil in el yuj, yuj walon el watx' abix yet Dios.

²Payxatax yak'nakcan Dios is ti' yuj jun watx' abix ti'. A eb is chekbej yet payxa tu', tz'ibnejcan yul tx'an Un asan Dios ay yet.

³A jun watx' abix ti', a ton yabixal Cham Jajawil Jesucristo, Cham C'ajol Dios. A Jesucristo, yin yinatil cham rey David titnak is mimanil, xan anima toni.

⁴Palta a yespíritu ayoc yin tol yet Dios yayji, max tx'oxon elok tol yel C'ajol Dios, tol caw ay is mayk'ak'al, yujtol max ictzoj aj xol eb camnak.

⁵A Jesucristo max yak'balnej Dios yin tx'oxon el is watx'c'ulal ayon, yet max on yaon oc chekbejok Jesucristo, yet watx' ayc'al mac chi yaoc c'ul yin bay junjun conob, cax chi yiken c'apax eb tzet chi yal Cham.

⁶Cayex c'apax tu' yetok eb. Awtebil ex oc yuj Dios jetok, yuj e yoccan yetok Jesucristo c'apaxok.

⁷Ti chin tz'ibejtok jun in carta ti' ayex, e masanil ex aj Roma, ex camc'ulnebilxa yuj Dios. A' awtenej ex, yet watx' asan Cham ayex yet. Tx'oxokab co Mam Dios yetok Cham Jajawil Jesucristo is watx'c'ulal ayex, cax chi yak'on c'apax Cham is junc'ulal ayex bay tu'.

⁸Tix jun chi babji walontok ayex ti': A yuj Jesucristo chi walon yuj diosal bay co Dios e yuj. Yujtol chi ali bay junjun conob, tol caw wal che yaoc e c'ul yin Cristo.

⁹Ayin ti', chi wak' serbil Dios yin masanil in c'ul yin walon el yabixal is C'ajol. In testigo yayji Dios, tol a yet chin txajli junjuntak el, chin txajli c'apax e yuj.

¹⁰Lananxa in k'anon bay Cham, ta ok el yin is c'ul, ok je' ex toj wiloni.

¹¹Payxataxc'al chi wochej chex toj wila', yujtol chi wochej chin colwaj jabok ayex tu' yin yet Dios, cax chi texac'al e yion e yip.

¹²Chi wochej tol a yet ok in apnok oc e yetok tu', chi jiptzelej co ba junjun on, yujtol jun lajanc'al chi jut jaon oc Cristo yin co c'ul.

¹³Ex wuẍtak, ex wanab, chi wochej che yojtaknej elok, tol tx'ial elxa chi wochej chin toj ayex tu', palta c'amtoc'al chi je' in toji. Chi wochej chin apni oc e yetok bay tu', yet watx' ay eb chi oc yin creyenteal e xol tu' wuj, axca max yun yoc eb yin creyenteal bay conoblak.

¹⁴Yujtol masanil anima, caxc'al griego, caxc'al c'amak, in cuenta yayji eb. In cuenta yayji eb jelan c'al eb man jelanok.

¹⁵Yuj tu' bekanxa in c'ul in toj walon k'anejal yet colbanilej e xol ayex aj Roma ex tu'.

¹⁶Ayin ti', c'am chin q'uixwi yuj walon el jun evangelio ti', a ton k'anejal yet colbanilej, yujtol yipalil Dios yayji, yet watx' chi colchaj el masanil eb chi yaoc c'ul yin. A eb wet israelal ay yalon yet babelal yin jun colbanilej ti', palta ay c'apax yalon yet eb man israelok yin.

¹⁷A jun k'anejal yet colbanilej ti', a' chi ak'on nachaj el juj, tol watx' on yul sat Dios, yujc'al tol chi jaoc co c'ul yin. Yuj tu', chi ja wal oc yin co c'ul sic'libil. Axca tz'ibelaycan yul tx'an Un: A eb watx' yul in sat, ok ayjokc'al ec' eb, yujtol chin yac'al oc eb yin c'ul, ẍi Dios yul tx'an.

¹⁸Jojtak, tol chi bektek Dios yowal c'ul bay satcan, yiban masanil eb c'am chi yaoc nabal yin, a ton eb yob tzet chi el beybalneni. Yuj yob tzet chi yun eb tu', xan c'am chi cha eb al-lay el jun cuybanilej caw yel.

¹⁹Ayxa yabixal Dios yojtakxa eb sic'libil, yujtol a Cham max ak'on yojtaknej el eb.

²⁰Caxc'al c'am chi je' yil-lay oc yin Cham, palta axca wal tol a' chi il-lay oc yin yet chi il-lay oc juntzan tzet watx'nebil yuj. Yujtol atax yet max yesnen aj yulyibank'inal ti', max txeclonen elok tol Dios toni, tol ay is mayk'ak'al masanil tiempo. Yuj tu', maj je' colon ba eb bay.

²¹Yujtol caxc'al yojtak eb tol ay Dios, palta c'am chi yaloc eb is Diosalok, c'am yelapnok yul sat eb. C'am chi yal eb yuj diosalil bay. A ti yet eb, asanc'al tzet c'am yelapnok chi na eb. Caw wal c'am nabal eb, yujtol k'ekk'inal yayji is nabal eb.

²²Caxc'al chi yal ba eb jelanil, palta max oc pax eb yin c'am nabalil.

²³Yuj tu' xan max bekcan eb Dios, a ton Cham miman yelapnok, tol c'am bak'in chi cami, axa yechel anima tol cambejal yayji, axa chi yaloc eb is diosalok. Yetok yechel tz'iquin, c'al yechel labaj, c'al yechel no no' caneb yakan, a' chi yaloc eb is diosalok.

²⁴Yuj tu', max beklaycan eb yuj Dios tx'oklil, yuj tojcan eb yin juntzan tzet man watx'ok chi yochej oc eb tu'. Yuj tu' xan a wal juntzan tzet caw wal q'uixwiltak chi el yunen eb yetok is mimanil.

²⁵Yujtol maj yaoc eb is c'ul yin k'anej Dios tol yel. A tinani', axa lek'tial chi yaoc eb yin c'ul. A bay tzet watx'nebil yuj Dios chi yal ba eb, cax a tu' chi yiay ba eb. Axa bay Dios c'am chi yal ba eb. Palta masanil tiempo moj wal tol a bay Cham chi jal watx' k'anej. Yunokabi.

²⁶Yuj is beybal eb tu', xan max beklaycan eb yuj Dios, yuj yunenxac'al eb juntzan tzet caw q'uixwiltak chi yochej oc eb tu'. Ay eb ix chi bekoncan winak, axa yetok yet ixal chi yetnelej ba. Palta caw man mojok caytu' chi yut ba eb.

²⁷Cay c'apax tu' xol eb winak, ay eb chi bekcan ix, axa yetok yet winakil chi yetnelej ba. Winak yetok yet winakil chi mitx'lej oc ba, yin yunen tzet yetal caw wal q'uixwiltak. Yuj tu' ac'al oc yin is mimanil eb chi cha' pak juntzan tzet man mojok yunen eb tu'.

²⁸C'am chi yochej eb ay yelapnok Dios bay. Yuj tu xan chi beklaycan eb yuj Cham yet watx' chi texac'al etax el nabal eb, cax chi tojcan eb yin juntzan tzet man mojok tu'.

²⁹K'aynak eb yetok masanil is yob nabal yetok ajmulal, xan ac'ala' naon eb tzet man watx'ok. Pek' eb yin tzet man watx'ok. Caw yob eb. Chi yochej oc eb tzet ay bay junokxa mactxel. Mak'om cam anima c'apax eb. Ak'om owal eb. Etnem anima eb. Caw wal yob is beybal eb. Alom k'umal eb.

³⁰Chi yal eb yobtakil yin yet animail. Chi chichon oc c'ul eb yin Dios. Buchwajwom eb. Chi yiaj can ba eb, chi mimannej ba eb chi ec' eb. Caw wal jelan eb tz'unon yich junok yobtakil. Pit eb bay is mam c'al bay is txutx.

³¹Succ'al chi yut ba eb. C'am chi yun is trato eb chi yak' yetok junok mactxel. C'am chi ok' c'ul eb yin junokxa.

³²Yojtak eb jun ley Dios chi aloni, tol a eb chi unen juntzan max in txoltek ti', moj ok tokcan eb bay camich yin junelnej, palta ac'ala' yunen eb. Chi tzaloj eb yetok eb anima chi unen juntzan yobtakil tu'.