Read Q'anjob'al Ro 10 Bible Online

Ro 10 - Q'anjob'al bible

Ro 10

¹Ex wuẍtak, ex wanab, caw chi wochej tol chi colchaj eb wet israelal. Chin k'an jun ti' bay Dios.

²Yel toni caw chi yiajtek eb c'ulok yak'on serbil Dios, palta man yojtakok eb tzetbil chi yun yak'lay serbil Cham axca chi yochej tu'.

³Man yojtakok eb tzetbil chi yun yoc eb watx'il yul sat Cham. Chi yochej eb tol munil chi yaoc ba eb watx'il yul sat Dios yul yet. Yuj tu' c'am chi oc eb watx'il yul sat Cham, axcata' wal chi yochej Cham.

⁴Yuj Cristo xan c'amxa yalon yet ley Moisés yin yak'on watx'jok anima satak Dios, yujtol tzanc'al mac chi yaoc c'ul yin Cristo chi watx'ji eb satak Dios.

⁵Albilcan yuj Moisés tzetbil chi jut co ba, ta chi jochej chon oc watx'il yul sat Dios yuj jun ley tu'. Chi yal axca ti': A mactxel ok iken tzet chi yal ley, ok iquisbokc'al yuj, ẍi.

⁶Palta ay pax junxa chi aloni, tol asan chi jaoc co c'ul yin Dios, cax chi yalon Dios tol watx' onxa yul sat. Chi yala': C'am che yal axca ti': ¿mactxel chi je' yajtok bay satcan? man quex chiok. Chi yal elapnok tol manchak e na' mac chi toj ion aytek Cristo.

⁷Chi yalon c'apax axca ti': Tamwal che yala': ¿mac wal junok ok aytok yul tx'otx'? man quex chiok. Chi yal elapnok tol manchak e na' mac chi aytok toj yion ajtek Cristo xol eb camnak.

⁸Chi yal c'apax axca ti': A jun k'anej ti', ayic' co xol, ayxa oc yin co nabal, chi je' e yaloni, ẍi. A jun k'anej chi binaj ti', a ton jun abix chi jalilok. Jun chi aloni tol yowalil chi jaoc co c'ul yin Cristo.

⁹Ta chi jala' tol a Jesús Jajawil, cax chi jaon oc yin co c'ul tol a Dios max ictzonen aj Cham xol eb camnak, ok on colchajok.

¹⁰Watx' on yul sat Dios asan yuj chi jaoc co c'ul yin Jesús. Chon colchaji, yujtol chi jala' tol a Cham Jesucristo Jajawil.

¹¹Chi yal yul tx'an Un axca ti': A mactxel ok yaoc Cham yipok c'ul, man ok somchaj el c'ul yuj, ẍi.

¹²Caxc'al israel on, caxc'al mayon israelok, lajan on yul sat Dios co masanil. Yujtol a Cham Jajawil, Yajaw yayji jiban co masanil. Tzanc'al mac on txel chi jal co ba bay, xiwil is watx'c'ulal chi yak' ayon.

¹³Axcata' chi yal yul tx'an Un: Masanil mac chi yal ba bay Cham Jajawil xin, ok colchaj el eb, ẍi.

¹⁴Palta a eb manchak yaoc c'ul yin Cham Jajawil, ¿tzet ok yut yalon ba eb bay? ¿tzet ok yut yaon oc eb c'ul yin, ta manchak yab eb yabixal? Yetok c'apaxok, ¿tzet ok yut yaben eb yabixal, ta c'am mac chi alon yabixal bay eb?

¹⁵Palta, ¿tzet ok yun toj eb aloj abix, ta c'am mac chi chekontok eb? Yuj tu' xan chi yal c'apax tx'an Un tu' axca ti': Xiwil watx'il yili yet chi jayoc eb chi alon watx' abix, ẍi.

¹⁶Palta man masanilok eb chi iken jun k'anejal yet colbanilej ti'. Axcata' yaloncan Isaías: Mamin, ¿mactxel max yaoc c'ul yin k'anej max al-lay can elok? ẍi.

¹⁷Asan tzet chi jabej chi jaoc yin co c'ul. A jun abix tol yowalil chi al-laycan elok, a ton yabixal Cristo.

¹⁸Palta, ¿tzet quex chi? A eb israel, ¿xin ta maj yab eb jun k'anejal yet colbanilej ti' che na'? C'amak, max yab eb masanil, yujtol caytu' yalaycan yul tx'an Un axca ti': Chi beytok yabixal yiban tx'otx' masanil, cax chi apni oc masantac'al bay lajub yulyibank'inal ti', ẍi.

¹⁹Palta majc'alta' yaoc eb yin c'ul. ¿Tzet quex chi yin eb? ¿Xin ta maj nachaj el jun abix tu' yuj eb israel che na'? Max nachaji. Ilab a Moisés alnejcan tzet max yal Dios bay eb: Ok in tx'emtek e yowal yuj jun conob che yala' tol man conobok yayji. Ok wak' pax tit e yowal yuj jun conob c'am is nabal, ẍi Dios yul tx'an Un tu'.

²⁰Ilab c'apax Isaías, max tec'baj ba yalon tzet max yal Dios yin eb man israelok. A eb c'am chin k'anlen ec'ok, max quin ilchaj yuj eb. Yetok c'apax bay eb c'am chi yal ba ayin, max in tx'ox in ba bay eb, ẍi Dios.

²¹A Isaías tu', max yal c'apaxcanok, tzet max yal Dios yin eb yet israelal: Masanil tiempo batxanc'altok in k'ab yin wawten jun conob c'am jabok chi yikej, yelxac'al pit, ẍi Dios.