Read Q'anjob'al Ro 15 Bible Online

Ro 15 - Q'anjob'al bible

Ro 15

¹Ayon ti', tec'an onxa yin yet Dios, yujtol chixa nachaj el juj tol c'am yowalil juntzan tu', palta ay eb manto tec'anok waayi, chi xiw eb yuj. Yuj tu' co cuenta jak'on techaj is c'am tec'anilal eb tu', yet watx' manchak somchaj el eb juj. C'am chi je' comonc'al chi jut tzet chi yochej co nabal.

²Junjun on, junek tzet chi cha c'ul eb jet creyenteal, yet watx' watx' yet eb, cax yuj c'apax yocbalok tec'anil eb.

³Yujtol a Cristo, man munilokc'al max yak' is nabal tx'oklil. Palta jaynak yiban, tzet albilcan yul tx'an Un axca ti': A yet chi buchwaj eb en, ayin jun chi wab c'apax yail, ẍi yul tx'an Un tu'.

⁴Masanil tzet tz'ibbilcan yul tx'an Un payxa, ay yopiso con is cuyoni. Chi yak' co tec'anil, chi yak'on c'apax mimanil co c'ul, yet watx' chi jac'al oc Dios yipok co c'ul.

⁵A Dios chi ak'on co tec'anil, cax chi yak'on c'apax mimanil co c'ul. Chi wochej chi oc Cham e yetok, yet watx' jun lajan e nabal e masanil, axca is nabal Cristo Jesús.

⁶Ta axca tu', junxanej nabalej ok e yunej. Jun lajanxac'al ok yun e yalon e watx' k'anej bay Dios, Cham is Mam Cham Jajawil Jesucristo.

⁷Yuj tu', yowalil chi co cha masanil eb jet creyenteal co nan co xol, yujtol axca tu' max con yut chaon Cristo yuj joc yetok, yuj txecloj elok tol xiwil watx'il c'ul Dios.

⁸Chi wal juntzan ti' ayex, yujtol a Cristo, ul yak'nak ba yak'omal serbil eb jet israelal on. A ul ak'nej yun tzet yalnak Dios bay eb jichmam on, yet max yak'on is ti' bay eb. Xan axca ti' max yut tx'oxk'abnen el Cristo tol chic'al yun tzet chi yal Dios.

⁹Yetok c'apaxok, yuj c'apax eb man israelok xan ulnak ec' Cristo, yet watx' chi yal eb watx' k'anej bay Dios, yujtol max ok' c'ul yin eb. Ilab tol chi yal yul tx'an Un axca ti': Ok wal watx' k'anej en xol mimek conob. Ok in bitnej juntzan bit ayach, ẍi.

¹⁰Chi yalon c'apax junxa ti': Ex nacionlak, tzalojanek yetok is conob Cham Jajawil, ẍi.

¹¹Ay bay chi yal c'apax axca ti': E masanil ex nacionlak c'al ex conoblak, alek watx' k'anej bay Cham Jajawil, ẍi.

¹²Tz'ibbil c'apaxcan yuj Isaías yul tx'an Un tu' axca ti': Ay jun yinatil Isaí ok tx'oxaj ba, axca chi yun yajol junok wolej. A' ok alay oc yajawilok eb man israelok. A jun tu' ok ya wal oc eb yipok is c'ul, ẍi yul tx'an Un tu'.

¹³A Cham Dios yipc'ulal yayji juj. A Cham chi wochej chi ak'on e tzalojc'ulal, yetok e junc'ulal, yujtol che yaoc Cham yin e c'ul. Ta axca tu', a Cham ok e ya wal oc yipok e c'ul, yujtol a Yespíritu Cham chi ak'on is yipalil ayex.

¹⁴Ex wuẍtak, ex wanab, wojtak sic'libil tol watx' e nabal, cax caw jelan ex yin yet Dios. Wojtak tol caw chi je' e yalen oc e nabal e xol bay tu'.

¹⁵Caxc'al caytu' e beybal, palta c'am chin xiw in tz'ibentok juntzan cuybej ti' ayex yuj in jekon e na', yet watx' c'am chi toj c'ayc'ulal e yuj. Chi wun axca ti' yujtol a Dios ak'nej jun wopiso ti' yuj is watx'c'ulal.

¹⁶A' ak'nej wopiso wak'on serbil Jesucristo nan xol eb man israelok. A wopiso ak'bil yuj, a ton walon el k'anejal yet colbanilej max yak' Dios, yet watx' ayokab eb man israelok ok waoc yul is k'ab, axca junok xajanbal caw watx' yul sat, yujtol a Cham Espíritu Santo chi ion oc eb yetok.

¹⁷Yujtol ayxa oc Cristo Jesús yin in c'ul, yuj tu' xan chi je' waloni tol miman yelapnok jun mulnajil max wun bay Dios ti'.

¹⁸C'am chi je' in maynen in ba yin tzet max el yunen juntzanxa eb chi ak'on serbil Dios c'apaxok. Palta c'am chin xiw walon tzet chi el yunen Cristo yin quin is k'anbalneni yet max yak'on yikej eb man israelok. Max in ec' waloncan yabix eb, cax ay c'apax juntzan tzet yetal max in tx'ox xol eb.

¹⁹Ay juntzan milagro tx'oxbil wuj nan xol eb, c'al juntzanxa tzet chi tx'oxon el yikbej Dios, yujtol max yak' Cham Espíritu Santo is yipalil ayin. Axcac'al tu' max ec' wut walon el is watx' abix Cristo bay junjun conob. A bay Jerusalén, a tu' max babji walon elok. Max ec' walil bay junjun conob, masantac'al max yal wapni bay yul yet Ilírico.

²⁰Axcac'al ti' max wut wak'on wip walon el k'anejal yet colbanilej bay junjun lugar bay c'amto chi ablay yabixal Cristo. C'am chi wochej tol a bay albilxa el yuj juntzanokxa chi ec' walilok.

²¹Axca ta' yaloncan yul tx'an Un axca ti': Ok yil eb, c'al nachaj el yuj eb, tzet yetal tol c'amc'alta' bay max yab eb k'umal, ẍi.

²²Xiwil el chi wochej chex toj wila'. Ayxa yabilalc'al c'oli in naobtaneni, palta yuj wopiso ti', xan c'am chi je' ex toj wiloni. Xal tinani xin, c'amxa in mulnajil bay juntzan lugarlak ti'.

²⁴Yuj tu' xan chin na', tol a yet ok in tok bay España, cax ok ex ec' wiloni, yuj ec' wak'on tzalojbok in c'ul e yetok. Ok lajwok wec' jayebok c'u e yetok xin, cax chi wochej chex colwaj wetok, yet watx' chin toj bay España tu'.

²⁵Palta tinani', a bay Jerusalén ok babjok weq'ui, yuj ec' wak'on jun ofrenda bay eb yet-xa Dios bay tu'.

²⁶Yujtol max el yin c'ul eb aj Macedonia, yetok eb aj Acaya yion aj jun ofrenda, cax chi toj bay eb creyente meba' bay Jerusalén tu'.

²⁷Max el yin c'ul eb yaontok jun ofrenda tu'. Watx' ton axca tu', yujtol axca tol ay is jec eb bay eb aj Jerusalén. A eb aj Jerusalén tu', a eb colwajnak bay eb man israelok yin yet espíritual. Yuj tu', a eb man israelok, cuenta ton eb colwaj yetok yofrenda bay eb wet israelal tu'.

²⁸Yuj tu' xan yowalil chi ec' wak' jun ofrenda tu' bay eb aj Jerusalén. Chi lajwi tu xin, cax chex ec' wilon yet lanan in toj bay España.

²⁹Wojtak tol a yet ok in apnok oc ayex tu', xiwil watx'c'ulal Cristo ok yak' ayon.

³⁰Ex wuẍtak, ex wanab, a Cham Yespíritu Dios chi ak'on co camc'ulnelej co ba. Yuj jun camc'ulal tu', xan chin tewi ayex, caw che yak' e yip e yoc yin txaj wetok. Caw chex txajli bay Dios wuj, yujtol axca ti' chi yochej c'ul Cham Jajawil Jesucristo.

³¹Che k'an bay Dios tol ok in is colil yul k'ab eb man creyenteok cajan bay Judea. Chex txajli c'apax yuj jun ofrenda ok witok bay eb creyente aj Jerusalén tu', yet watx' ok tzaloj eb chaoni.

³²Chex txajli c'apax wuj, yet watx' tzalojc'ulal chi yun wapni oc ayex tu', ta axca tu' chi el yin c'ul Dios, cax chin xew jayebok c'u ayex tu'.

³³Ocokab Dios, Cham ak'om junc'ulal, e yetok e masanil bay tu'. Yunokabi.