Read Q'anjob'al Ro 2 Bible Online

Ro 2 - Q'anjob'al bible

Ro 2

¹Tzanc'al junok on chi co beyc'ulnej junokxa mactxel, maj je' jaloni, tol c'am co mul. Yujtol a yet chi co beyc'ulnen junokxa mactxel, lanan jiontek yailal jiban. Yujtol lanan co beyc'ulnen junok mactxel lajan tzet chi el junen yetok.

²Jojtak, ta ayon axca tu' chi jut co ba, a Dios ok on beyc'ulnen yin bayc'al ijanilal, cax ok yak'on low jin.

³Xan a ayex che beyc'ulnej eb chi unen tzet man watx'ok tu', ¿tom ok je' e colon el e ba yalan yowal c'ul Dios ok jay e yiban e naoni? Palta cay tu' che yut c'apax e ba axca eb tu'.

⁴A Dios caw wal miman is watx'c'ulal. Caw wal ay is mimanc'ulal. Man comonok chi tit yowal. Palta tekan ayex c'am yelapnok juntzan ti' yul e sat. ¿Tom man e yojtakok, tol chi tx'ox is watx'c'ulal ayon yet watx' chi yak' na ba co c'ul?

⁵Palta ayex ti' pit ex. C'am che na e ba jabok. Yuj tu', lanan e wajbanc'al yowal c'ul Dios e yiban. Axa yet ok jayoc jun c'ual yailal, e yetc'al ocok. A yet jun c'ual tu', ok txecloj el beyc'ulal Dios yin bayc'al ijanil.

⁶A yet tu' junjun on ok co cha paktzil, atac'ala' tzet max el juneni.

⁷Ok yak' Dios k'inalej tol ayc'al yin tojbalk'inal ayon, tatol tec'an chi jut co ba junen watx'ilal, yujtol chi jochej ay jalon jet yin is watx'ilal Dios. Chi jochej tol ay jelapnok yul sat Cham. Chi jochej tol chi co cha co k'inal tol ayc'al yin tojbalk'inal.

⁸Palta ay eb, a yowal c'ul Dios ok yak' bay, cax ok yak'on yailal eb. A ton bay eb chi yochej tol asannej oc miman yelapnok. C'am chi yikej cuybanilej caw yel. Asan yin tzet c'am watx'il ayoc is nabal eb.

⁹Masanilc'al eb chi unen tzet man watx'ok, caw ok yab eb yail sic'libil. Caw cusc'ulal ok yun yeloc eb. Babel ok yab eb wet israelal yailal, palta ok yab c'apax yailal eb man israelok.

¹⁰A masanil eb watx' max yut ba, a watx'ilal Dios ok yak' bay eb, cax miman yelapnok eb yul sat. Junc'ulalxac'al ok yun yayji ec' eb yetok. A eb wet israelal watx' max yut ba, babel ok yun juntzan ti' bay eb, cax ok yunen c'apax bay eb man israelok.

¹¹Yujtol a yul sat Dios, lajanc'al jelapnok co masanil.

¹²Masanil eb man ojtaknenok ley Moisés, tatol c'am watx'il beybal eb, ok alaycantok eb bay camich yin junelnej; caxc'al man yujok jun ley tu', xan ok alaycantok eb. Palta masanil eb ojtaknen jun ley tu', cax max oc pax yobtakil eb, ac'al oc jun ley tu' ok ak'balnelayok, cax ok beyc'ulnelay eb.

¹³Yujtol a eb toc'al chi aben ec' tzet chi yal jun ley tu', man watx'ok eb yul sat Dios. A eb chi iken tzet chi yala', a ton eb tu' watx' yul sat Cham.

¹⁴A eb man israelok, man yojtakok eb is ley Moisés, palta ay bay munilc'al chi beybalnej eb axca wal yalon jun ley tu'. Caxc'al man yojtakok eb jun ley tu', munilc'al ayoc yin is nabal eb.

¹⁵A is beybal eb chi tx'oxon elok, tol ayoc jun ley tu' yin is nabal eb. A yikbomal is nabal eb chi tenchaneni. Axca tu' chi yut tx'oxon el ba eb, tol ayoc jun ley tu' yin is nabal eb. Munilc'al chi ak'lay yojtaknej el eb yuj yikbomal is nabal, ta watx' tzet chi el yunen eb, ma yob.

¹⁶A yet ok jay jun c'ual, ok on beyc'ulnej Dios co masanil yuj tzetak ewanc'uan yayji juj, a Jesucristo ok on beyc'ulnenok axca yalon jun k'anejal yet colbanilej chi wal ti'.

¹⁷Palta ayex che maynej e ba yujtol israel ex, cax asan ley Moisés che yaoc yipok e c'ul, caw wal che yi' aj can e ba yujtol conob ex Dios.

¹⁸E yojtakxa, tzet chi yochej Dios. E yojtak c'apaxok baytet ay watx' tzet chi el juneni, yujtol cuywinak ex yin ley Moisés.

¹⁹Ay eb man ojtakbilok Dios yuj, axca tol c'am chi je' yilwi eb. Cax ay exxa chi je' e tx'oxon Dios bay eb e naoni. Yetok bay eb axca tol k'ekk'inalto ay yanimail, chi je' e yak'on sakk'inal bay eb e naoni.

²⁰A e naoni tol chi je' e cuyon eb c'am tzet yojtak, cax chi je' e yak'on nachaj el yuj eb c'am chi nachaj el yuj, e naoni. Yuj ley Moisés, xan caw chi nachaj el juntzan cuybej tu' e yuj. E yojtakxa baytet ay cuybanilej yel.

²¹Caw cuywajwom ex bay juntzanok mactxel, palta ¿tzet xan c'am che cuy pax wal e ba? Che yala' tol c'am chi je' jelk'ani, palta elk'om ex paxok.

²²Che yala' tol c'am chi je' co beybalnen ajmulal, palta che beybalnej pax ajmulal. Caw wal che yajil juntzan tzet chi al-lay oc diosal, palta elk'om ex pax bay templo.

²³Yujtol e yojtak ley Moisés, xan caw che maynej e ba. Palta c'am che yikej pax tzet chi yal jun ley tu'. Yuj tu' caw wal chi buchlay el Dios e yuj.

²⁴A yul tx'an Un chi yalcan axca ti': Yuj e beybal xan chi buchwaj eb man israelok yin Dios, ẍi tx'an.

²⁵Yel toni, ay yopiso jun yechel trato chi yik circuncisión ta che yikej masanil tzet chi yal ley Moisés. Palta ta c'am che yikej jun ley tu', axca wal tol c'amoc circuncisión tu' e yin yul sat Dios.

²⁶A pax eb c'amoc yechel yin xin, ta caw chi yikej eb tzet chi yal jun ley tu', axca wal tol ocnak jun yechel eb tu' yin yul sat Dios.

²⁷Ay ton eb axca tu'. C'am jun yechelej tu' ocnak yin, palta caw chi yikej eb jun ley tu'. A eb ok ex beyc'ulnenok. Caxc'al ocnak e yechel, caxc'al ay jun ley tu' tz'ibbilcan ayex, palta tutun c'am che yikej.

²⁸Manak eb chi yik judío yujc'al yinatil, manak eb tu' yel wali judío[1] yul sat Dios. Manak eb ayoc jun circuncisión tu' yin, manak eb tu' yel wali ayoc yechel yul sat Dios.

²⁹Palta a eb caw yel ayoc nabal yin Dios, a ton eb tu' caw wal yel judío yul sat. Yujtol a jun acaw circuncisión yul sat Dios, a ton jun ayoc yin co nabal. Man leyok tz'ibbilcan chi aloni, xan chi oc jin, palta a Cham Espíritu chi ak'on ayon. Yuj tu', man animaok chon alon watx'il, palta a Dios chon alon watx'il.