Read Q'anjob'al Ro 6 Bible Online

Ro 6 - Q'anjob'al bible

Ro 6

¹¿Tzet con chi che na' xin? ¿Tom mi watx', ta ac'ala' junen yobtakil, yet watx' chi yak'c'al Dios mimanc'ulal jin, cax chi texac'al txecloj el is watx'c'ulalil axca tu'?

²C'amak, caw wal maj je'. A yul sat Dios, camnak onxa, c'amxa yalon yet yobtakil jin. Yuj tu', ¿tom ac'ala' chi je' co beybalnen yobtakil?

³E yojtakxa, tol a yet max on ak'lay bautizar junjun on, max txecloj elok, tol junxanej max juncan el yetok Cristo Jesús. A tu' max txecloj elok, tol a yet max cam Cham, max on cam c'apax yetok.

⁴A yuj co bautismo tu' max txecloj elok, tol max on cami, cax junxanej max yun co mukay yetok Cristo. Yuj tu' xan axca c'apax max yun yictzoj aj Cristo xol eb camnak yuj is miman mayk'ak'al co Mam Dios, axca c'apax tu' max yun jictzoj aj c'apaxok. Chi yal elapnok, a wal junok ac' beybalej chi co beybalnej tinani'.

⁵Junnej max yun co cam yetok Cristo yet max cami. Yuj tu' xan axca max yun yictzoji, axca tu' ok yun jictzoj c'apaxok, yujtol junxanej jayji yetok.

⁶Jojtak, tol a tzet jayji yet yalan, a yul sat Dios, max curusnelay yetok Cristo yet watx' chi ilaycan el yikbej co yob nabal. Axca tu' max juncan elok, yet watx' manchakxa jak' serbil yobtakil tinani'.

⁷Yujtol a mac camnakxa, c'amxa oc yul k'ab yobtakil.

⁸Ayon ti', camnak onxa yetok Cristo yul sat Dios. Yuj tu', chi jaoc yin co c'ul, tol ok on iquisbok yetok yin junelnej.

⁹Yujtol jojtak, tol yecheltaxc'al max ictzonelay aj Cristo xol eb camnak, c'amxa bak'in ok cam junelxa, yujtol c'amxa yalon yet camich yin.

¹⁰Yujtol a yet max cami, max cam yuj tojolok yobtakilal yin junelnej. Axa tinani', iquis yin junelnej, yuj yak'on serbil Dios.

¹¹Cayokab on tu', nachajokab el juj, tol camnak onxa, c'amxa yalon yet yobtakil jin. Co naek c'apaxok, tol iquis on, yuj jak'on serbil Dios, yujtol junxanej jayji yetok Cristo Jesús.

¹²Yuj tu', manchakxa co cha' yajawbok yobtakil yin co mimanil tol cambejal yayji. Caw manchakxa jikejek junen juntzan yobtakil chi jochej ocok.

¹³Manchakxa co bek co mimanil yul k'ab tzet man watx'ok, cax chi junen yobtakil. Yowalil asan yul k'ab Dios chi jaoc co ba, yujtol camnak onxa yul sat, cax max on ictzonelay pax ajok. Yuj tu', jak'ek co mimanil bay Dios, yet watx' asan tzet watx' chi el junen yetok.

¹⁴A yobtakil c'amxaokab yalon yet jin, yujtol c'am onxa oc yalan yikbej ley Moisés. A yalan yikbej watx'c'ulalil Dios ayon oc tinani'.

¹⁵A tinani', ayon oc yalan watx'c'ulalil Dios, manxanak yalan ley Moisés ayon ocok. Palta, ¿tzet ẍi e c'ul? ¿Tom yuj tu', xan chi je' tol ac'ala' junen yobtakil? C'amak, caw wal c'amxa chi je'.

¹⁶Jojtak, tatol ay junok mactxel chi yak' ba yak'omalok serbil junokxa mactxel, asan jun tu' ay yalon yet yin yin junelnej. Yowalil chi yikej tzet chi yal is patrón tu'. Cayon ton tu xin. Tatol chi jak' serbil yobtakil, chi jikej tzet chi yochej, tutun tol asannej ayon yet. Axa co cam yuj tu' yin junelnej. Palta tatol a Dios chi jak' serbil, chi jikej tzet chi yochej; tatol axca tu', asannej ayon yet. Axa watx'ji oc co nabal yuj tu'.

¹⁷Palta chi wal yuj diosalil bay Dios e yuj. Yujtol caxc'al max e yak' serbil yobtakil yet yalan, palta axa tinani', lanan e yiken yin masanil e c'ul juntzan cuybanilej bay max ex alaycan ocok.

¹⁸Max ex colchaj el yul k'ab yobtakil, manxa yak'omalok serbil e yayji tinani', palta tol yak'omalxa serbil watx'ilal e yayji.

¹⁹A juntzan chi waltok ayex ti', axca tol comon abixc'al chi wut walontok, yujtol c'am wal chi nachaj el juntzan cuybanilej ti' e yuj. A yet yalan, max jak' co mimanil yak'omalok serbil tzet man watx'ok, c'al jaj can yin yobtakil. Axa tinani', yowalil axcaokab tu' chi jut jak'on co mimanil ti' yak'omalok serbil watx'il, yet watx' asan yin Dios chi jaoc co nabal.

²⁰A yet max jak' serbil tzet man watx'ok yet yalan, c'am yalon yet watx'il jin yet tu'.

²¹Palta, ¿ay mi jabok tzet max ji' yin juntzan max jun tu'? Caw chon q'uixwi yuj juntzan tu' tinani'. Yujc'al juntzan tu', xan chi tojcan eb anima bay camich yin junelnej.

²²Axa tinani', colbil onxa el yul k'ab juntzan tzet man watx'ok tu'. C'amxa yalon yet jin. Max on oc yak'omalok serbil Dios. Yuj tu' caw wal ay tzet chi ji' tinani', yujtol a' chi ak'on jaoc co nabal yin. Cax ok co chaon pax co k'inal tol ayc'al yin tojbalk'inal.

²³Tatol a yobtakil chi junej, ok co cha is tojol, a ton camich yin junelnej. Palta a jun is sabal Dios chi yak' ayon, a ton co k'inal tol ayc'al yin tojbalk'inal, yujtol junxanej jayji yetok Cristo Jesús, Cham Jajawil.