Read Q'anjob'al 1 Co 10 Bible Online

1 Co 10 - Q'anjob'al bible

1 Co 10

¹Ex wuẍtak, ex wanab, chi wochej che yojtaknej elok, tzet yunnak eb jichmam yet payxa, yet tzakan oc eb yintak Moisés. Masanil eb max beytoj yalan jun asun, cax masanil eb ec'naktok eb nan a' mar.

²Axca tol ak'bil bautizar eb yuj jun asun tu', yetok yuj a' mar tu'. Axca tol ocnak eb yetok Moisés yet jun tiempoal tu'.

³Masanil eb, max lo eb jun loj axca tol yin esalil ak'bil bay eb yuj Dios.

⁴Yetok c'apaxok, masanil eb yuc'nak eb jun a' aej, axca tol yin esalil ak'bil bay eb yuj Dios. Sat ch'en elnaktek a' aej tu'. A jun ch'en tu', a Cristo chi tx'oxtek.

⁵Caxc'al axca tu' yunnak eb, palta ac'ala' xiwil eb man watx'ok yul sat Dios. Yuj tu' xan sakleminak max yuncantok is mimanil eb bay takin tx'otx' bay ec'nak eb tu'.

⁶A tzet jaynak yiban eb tu', co tx'oxbanilok yayji, yet watx' manchak jochej oc tzet man watx'ok, axca yutnak ba eb tu'.

⁷Yuj tu', c'am chi je' jalon co ba bay tzet chi al-lay oc diosal, axca yutnak ba juntzan eb xol eb tu'. A tx'an Un Tz'ibbilcanok, a tx'an chi alontek yabixal eb. Chi yal tx'an axca ti': Max ay chotjab eb, max low eb c'al yuq'uen a' eb. Lajwi tu', max aj bulnaj eb canalwi, c'al yunen eb yobtakil satak is diosal tu', ẍi tx'an Un tu'.

⁸Manchak c'apax on toj yin ajmulal, yujtol axca tu' yutnak ba juntzan eb tu'. Yuj tu' xan junnej c'u max yun camay latz'naj 23,000 eb.

⁹Manchak jak' porobal Cham Jajawil axca yutnak ba juntzan eb tu'. Yuj tu' xan lajwinak el eb yuj juntzan no labaj.

¹⁰Man comonok chon alxi aj yin Cham Jajawil, axca yutnak ba juntzan eb tu'. Yuj tu' xan lajwinak el eb yuj jun ángel ay yopiso mak'wi cam anima.

¹¹Masanilc'al tzet jaynak yiban eb jichmam tu', co tx'oxbanilok yayji. Tz'ibbilcan yabixal yul tx'an Un, yet watx' chi jojtaknej elok tol ay is may ta chi oc co yobtakil. Yujtol ayon ti', lajub tiempoalxa bay ayon ec'ok.

¹²Yuj tu', a mac tec'an waay naoni, camokab yak'on cuenta ba, yujtol ay is may chi etax el is nabal.

¹³Tzanc'al porobalil chi jay jiban, lajanc'al yetok porobalil chi jay yiban masanil anima. Palta chic'al yun Dios bay chi yala', man ok on is cha' ak'lay porobal yin junok tzet yetal tol c'am chi techaj juj. A yet chi jay junok porobal tu', a Cham chi colwaji, yin tzetbil chi jut co colon co ba bay, yet watx' chi techaj juj.

¹⁴Yuj tu xin ex in camc'ulnebil, caw che yiel e ba bay junok tzet chi al-lay oc diosal.

¹⁵Chi waltok juntzan ti' ayex tol ayxa e jelanil. Chi cam e naobtanen sic'libil ta yel chi wala'.

¹⁶A jun is vaso Dios chi jal yuj diosalil yuj, a chi tx'oxoni, tol junxanej jayji yetok Cristo yujtol jujc'al, xan max el is chiq'uil. Ac'ala' c'apax ixim pan chi pojlay ec' co xol, chi tx'ox c'apax el ixim, tol junxanej ton jayji yetok Cham, yujtol jujc'al, xan max ak'lay cam is mimanil.

¹⁷Caxc'al xiwil on, junnej ixim pan tu' chi co lo' co masanil. Yuj tu' xan axca ton jun pan tu', jun ch'an, cayon c'apax tu', yujtol axca tol junxanej mimanil Cristo jayji co masanil.

¹⁸Naek jabok wetok tzet chi yut ba eb wet israelal. A eb chi chion tzet chi yak' yin xajanbalil, junxanej yayji oc eb yetok Dios, Cham chi chaon xajanbalej tu'.

¹⁹Man lananok waloni tol ay yelapnok tzet chi al-lay oc diosal tu', ac'ala' c'apax tzet chi ak'lay yin xajanbalil tu', man lananok waloni tol ay yelapnok.

²⁰Palta tix tzet chi yochej in c'ul chi wal ti'. A yet chi yak'on eb man israelok is xajanbal, manak bay Dios chi yak' eb, palta tol a bay eb espíritu yob chi yak' eb is xajanbal tu'. Chi wochej c'am junok ex che yaoc e ba yetok eb espíritu yob tu'.

²¹C'am chi je' comonc'al chi juc'balnej is vaso Cham Jajawil, ta chi juc'balnej pax is vaso eb espíritu yob tu'. Yetok c'apaxok, c'am chi je' comonc'al chi co lo' ixim pan chi eltek ayon yiban meẍa Cham Jajawil, ta chi co chi' pax tzet chi batxbalay ajtok yiban meẍa yet k'in eb espíritu yob tu'.

²²¿Ma chi jochej chi jitek yowal c'ul Cham Jajawil jiban? ¿Xin ta yel chi lajoc jipal yintak Cham?

²³Tekan ayex che yal axca ti' tinani': Bekan jayji junen masanil tzet yetal, tekan quex chi. Yel toni, palta man mojok junen masanil tzet yetal. Yel ton xin, chi je' junen masanil tzetak yetal, palta man masanilok tzetak yetal tu' chi ak'on tec'anil co nabal.

²⁴Man mojok tol asan co watx'il yul jet chi co saya'. Yowalil chi co saya' tzetbil chi jut jak'on tec'anil juntzanokxa eb.

²⁵A tinani', tzanc'al tzet chibejal chi txonlay txonbal, chi je' e manon e chi'. Manchak e k'anlej bay chi ca tita, yet watx' manchak etax el nabal eb chi abeni.

²⁶Yujtol a Cham Jajawil ay yet tx'otx' tx'otx' ti', c'al masanil tzet yetal ibil aj yuj tx'otx', c'al eb cajyom bay.

²⁷K'inalok ay junok man creyenteok chex awten low yetok bay yatut. Ta chi yochej e c'ul chex toji, chic'al je' e loon tzet chi yak' ayex. Man e k'anlej bay, bay chi ca tit tzet chi yetxbaj eltek e satak tu', yet watx' manchak etax el nabal eb chi abeni.

²⁸Palta ta ay junok mac chi alon ayex axca ti xin: A no chibej chi yak' nak ti' e chi', max ak'lay no' yin xajanbalil, ta ẍi ayex, manchak e chi', yujtol a mac chi alon ayex tu', ay is may chi etax el is nabal e yuj ta che chi'.

²⁹Chi waltok juntzan ti' ayex, yet watx' man e yujok chi somchaj eb c'amto tec'anil is nabal. Palta tekan ayex ok e yal axca ti' tinani': Ayon ti', chic'al je' co chion masanil tzet yetal. Yuj tu', ¿tzet yuj xan chon is beyc'ulnej eb chi xiw chion chibej tu'?

³⁰Ta chi jal yuj diosalil bay Dios yuj no chibej tu', cax chi co chion no', c'am mac ay yalon yet yalon tzet yob jin, quex chi mi.

³¹Palta chi waltok ayex, caxc'al chon lowi, ma chi juc'a', ma tzanc'al tzet yetal junokxa chi el juneni, junokabi yet watx' chi txecloj el is watx'ilal Dios.

³²Caxc'al israel junok mactxel, ma caxc'al man israelok, caw c'am chi je' jak'on etax el nabal eb. Yetok c'apax eb jet creyenteal, maj je' jak'on etax el nabal eb.

³³Ayin ti', chi wak'lej wak'on tzaloj c'ul eb wet animail yin masanil tzet chi el wuneni. Manak tzet chi oc in watx'ilok chin saya', palta a tzet chi oc watx'ilok juntzanokxa anima chin saya', yet watx' talaj ay eb chi colchajcan elok.