Read Q'anjob'al 1 Co 13 Bible Online

1 Co 13 - Q'anjob'al bible

1 Co 13

¹K'inalok ta jelan on co k'anjab yin masanil ti' eb anima, c'al yin is ti' eb ángel, palta ta c'am pax co camc'ulal, lajan onc'al mi axca junok tambor toc'al chi tinxi. Ma xin, axca juntzan ch'en patxquiẍtak, toc'al chi tzinxi yetbeyom son, cayon mi tu'.

²Caxc'al ak'bil jopiso jalon el k'anej Dios, caxc'al caw chi nachaj el juj masanil tzet c'amto mac ojtakneni, caxc'al jojtak masanil tzet ay yulyibank'inal ti', caxc'al caw chi jaoc co c'ul yin Dios sic'libil, xan chon tzakay jion el junok tzalan bay is lugar, palta ta c'am pax co camc'ulal, caw c'am jabok jopiso.

³Caxc'al chi co sa' masanil tzet ay ayon bay eb meba', caxc'al inye con chi, chon ak'lay camok, cax chi ak'lay tz'a co mimanil ti', palta ta c'am co camc'ulal, nabac'al chi jetnej co c'ul, c'am jabok q'uex pak ok co cha'.

⁴Ok waltek tzet chi jut co beybal, ta yel wali ay co camc'ulal. Caw ayc'al co mimanc'ulal yin eb jet animail, cax chi co tx'oxon c'apax co watx'c'ulal bay eb. Man comonok chi chichon oc co c'ul yin junok mac xiwil tzet ay. C'am chi co maynej co ba, cax chi jion can co ba.

⁵Ta caw yel ay co camc'ulal, c'am chi jiel q'uixwil junok mactxel. Chi jochej tol man asannejok on ay jalon jet. Manokab c'unok tit jowal. C'am chi co na' jion ec' co pak bay junok mactxel.

⁶C'am chon tzaloj yuj junok tzet man watx'ok chi el yunen junok mactxel. Asan juntzan tzet yetal caw yel chon tzaloj yetok.

⁷Ta yel ay co camc'ulal, okc'al jak' techaj masanil tzet yetal. Chi jaoc yin co c'ul tol watx'c'al tzet chi el yunen eb jet animail. Chi jaoc eb yipok co c'ul. Tzanc'al junok tzet yetal chi jay jiban, tec'anc'al chi jut co ba bay.

⁸A jun camc'ulal ti', c'am bak'in ok lajwok. Ay jun tiempoal ok jayok, yet tol manxa yowalilok tol aytowal mac ok yak' Dios yopiso yalon el is k'anej. A yet jun tiempoal tu', manxa yowalilok tol aytowal mac ok k'anjab yin tx'ok tiejal. Yetok c'apaxok, c'amxa yopiso co jelanil yet tu'.

⁹Yujtol man tz'akanok co jelanil tinani', yetok c'apaxok man tz'akanok chi jut jalon el k'anej Dios tinani'.

¹⁰Palta xin, ay jun tz'akan. A yet ok jay jun tu', ato yet tu' ok lajwok yopiso masanil juntzan man tz'akanok chi jun ti'.

¹¹K'inalok ayin ti' tinani', a yet unin into, axcac'al k'anjab unin in k'anjabi. Max in na juntzan tzet chi na' eb unin, yujtol lajan in nabal yetok eb. A tinani xin, icham winak inxa. Yuj tu' xan mayal in bekcan beybal uninal tu'. Axca in ton yet unin into tu', axca on ton tu' co masanil tinani'.

¹²Yujtol a tinani', c'am wal chi nachaj el yet Dios juj. Axca jilon oc co sat yul junok ch'en ch'en jopopi, k'ektaninak yili co sat, axca tu' jayji. Palta a yet jun tiempoal tu', ok nachaj el masanil tzetak yetal yet Dios juj, axca chon yut yojtaknen el Cham.

¹³A tinani', chi jaoc Dios yin co c'ul, cax chi jaon c'apax oc yipok co c'ul. Chi co camc'ulnen c'apax eb jet animail. A oxeb chi jun ti', ayc'al yopiso masanil tiempo, palta a camc'ulal, ec'ban yelapnok yintak cabxa ti' yul sat Dios.