Read Q'anjob'al 1 Co 3 Bible Online

1 Co 3 - Q'anjob'al bible

1 Co 3

¹Ex wuẍtak, ex wanab, a yet max in ec' e nan e xol tu', maj je' axca in k'anjab bay eb yikem bay Cham Yespíritu Dios, caytu' max wut k'anjab in ba ayex. Yujtol a e nabal chex ikbani, axca tol unin extoc'al yin yet Cristo.

²Axca wal junok aq'uiẍ unin c'amto chi je' loon tzet yetal caw, cayex tu'. Yuj tu' xan axca wal chi yun yak'lay txutxwok junok aq'uiẍ unin tu', caytu' max wut walon juntzan cuybanilej ayex. A cuybej man ya'ok nachaj elok, a' ec' walnak ayex, yujtol a cuybej ya' nachaj elok, tokwal max nachaj el e yuj. Palta ac'ala' exc'al tinani'.

³Yujtol atoc'al e nabal chex ikbani. Ilab tol ay chichonc'ulal e xol. Ac'ala'c'al e yochen chex pojchaji. Chi yal elapnok tol ac'ala' e nabal chex ikbani. Lajan wal che yut e ba axca eb man creyenteok.

⁴Yujtol ay ex che yal axca ti': Ayin ti', yet in Pablo, quex chi. Ay ex xin: Ayin ti' yet in Apolos, quex chi. A yet che yalon axca tu', caw lajantoc'al e nabal axca nabal eb manto ojtaknenok Dios.

⁵¿Tzet welapnok ayin Pablo in ti'? ¿Tzet yelapnok Apolos tu'? Ayon ti', toc'al ch'an yak'omal serbil Dios c'al jayji. Ayon max on yak'balnej ayex, xan max e yaoc e c'ul yin Cham Jajawil. Junjun onc'al chi jil jopiso atac'ala' tzet max ak'lay jun on yuj Cham.

⁶A yet max in ec' e xol ayin ti', axca tol ec' wawnakcan inat. Axa Apolos, axca tol a' ec' anej oc yal tzet ec' awbil wuj tu'. Palta a Dios max ak'on e ch'ibomal.

⁷Yuj tu', a junok awalwom, c'al nak chi awi oc yal awoj tu', c'am jabok yelapnok eb. Asan Dios ay yelapnok, yujtol a' chi ak'on ch'ibomal awoj.

⁸A eb awwom, c'al eb chi awi oc yal awoj tu', lajanc'al yelapnok is mulnajil eb tu'. Ok cha' eb paktzil mulnajil tu' bay Dios, palta atac'ala' jantak is mulnajil junjun.

⁹Yuj tu', ayon ti' jet mulnajwomal co ba on yin jak'on serbil Dios. Axa pax ex ayex ti xin, axca tol yawoj Dios e yayji. Ac'ala' axca junok na lanan watx'nen Dios, caytu' e yayji.

¹⁰Axa in xin, lajan in axca junok mac jelan yin watx'nen na, cay in tu' yuj is watx'c'ulal Dios. A yet max quin ec' e xol tu', axca tol ec' wanak ay yich junok na. Cax tx'okxa mac chi mulnaj e xol tinani'. A mac chi mulnaj tu' tinani', axca tol lanan latz'ontok xan yiban yich ec' wanakcan ay tu'. A junjun mactxel lanan mulnaj oc yin tu', yowalil chi cam yiloni, tzetbil chi yut latz'on juntzan axca xan tu'.

¹¹C'am junokxa mactxel chi je' yaon ay junokxa yich, yujtol a jun yich ayxa ayok, acaw Jesucristo.

¹²A mac chi mulnaj oc yin jun mulnajil tu', ay mac caw wal watx' is mulnajil. Axca wal tol a ch'en oro, ch'en plata, c'al juntzanokxa ch'en can is tojol, axca tol a' chi tz'akajtok eb yiban jun yich ayxa ay tu', yujtol caw wal watx' is mulnajil eb. Palta ay eb man watx'ok is mulnajil. Axca tol te' chi k'anbalnej eb. Ma xin, axca c'un ch'im, c'al yakan trigo, axca tu' tzet chi yaajtok eb.

¹³Palta a co mulnajil junjun on, ok txecloj el yet ok jay jun c'ual beyc'ulal. Axca k'ak' k'ak' ok yun jay jun c'ual beyc'ulal tu'. Cax ok il-lay co mulnajil junjun on yet tu', ta watx', ma c'am yelapnok.

¹⁴A mac man ok tz'aay is mulnajil tu', ok cha' paktzil.

¹⁵Palta a mac ok tz'aay is mulnajil xin, c'am jabok paktzil ok cha'. Ok colchaj elok palta axcac'al colchaj junok mactxel xol k'ak', caytu' ok yun colchaji.

¹⁶¿Tom man e yojtakok tol templo ex Dios, cax tol cajanxa ec' Cham Espíritu e xol?

¹⁷Ta ay mac chi ak'on c'ayil jun templo Dios tu', a Dios ok ak'on c'ayil jun anima tu'. Yujtol a jun templo Dios tu', asan Dios ay yet. A jun templo chi wal tu', ayex toni.

¹⁸C'amokab che yetnej e ba yul e yet. Ta ayex che na' tol jelan ex yin yet yulyibank'inal ti', yowalil che yiay e ba cax che yuten e ba axca tol c'am tzet ujnak ex, yet watx' ok yak' Dios e jelanil.

¹⁹Yujtol a is jelanil yulyibank'inal ti', c'am jabok yelapnok yul sat Dios. Yujtol caytu' tz'ibelaycan yul tx'an Un axca ti': A Cham chi ak'on ayc'ay eb jelan yin yob nabalej nabil yuj eb, ẍi.

²⁰Chi yalon c'apax axca ti': Yojtak Cham Jajawil, tol a tzet chi na eb jelan, tutun wal c'am jabok yelapnok, ẍi yul tx'an Un tu'.

²¹Yuj tu' maj je' e yaon oc e nabal yin junok anima, cax che yion can e ba yuj. Yujtol mayal yak' Dios masanil tzet yetal e sataknej jetok.

²²A xan e yak'omalok serbil wayji yetok Apolos, c'al Pedro, xan axca tol e yet on. Ilab c'apax yulyibank'inal ti', c'al co k'inal, c'al camich, c'al tzetak yetal ay tinani', c'al tzetak yetal tolto ok jayok, max yak' Dios masanil ayon.

²³Yujtol ayex ti', yet exxa Cristo jetok. Axa Cristo, yet Dios.