Read Q'anjob'al 1 Co 5 Bible Online

1 Co 5 - Q'anjob'al bible

1 Co 5

¹Max wabej tol ay jun winak ay is mul e xol. Tolab max montej el nak is cab txutx yi'. A jun tu bian, junelnej man watx'ok. Toltax xol eb man creyenteok, c'am bay caytu' chi yut ba eb axca tu'.

²E yojtak tol caytu' chi yut ba nak, palta ac'ala' e yion paxcan e ba. Moj wal tol chi tac e c'ul yuj sic'libil. A nak chi unen jun yobtakil tu', yowalil che yiel nak e xol.

³Ayin ti', caxc'al c'am in ec' yin mimanilejal e yetok bay tu', palta axca wal ayin ec' e yetok. Yuj tu xan mayal in beyc'ulnej tzet ok yun nak max unen jun yobtakil tu', yujtol axca wal tol ayin ec' e yetok bay tu'.

⁴Xan yowalil wal che wajbaj oc e ba yin yikbej Cham Jajawil Jesucristo. Ayinxa xin, axca tol ok in apnok oc e yetok. Yetok c'apaxok, ok oc Cham Jajawil Jesucristo e yetok, cax ok yak'on yikbej ayex.

⁵A nak winak max oc is mul tu', aekcan oc nak yul k'ab Satanás, yuj c'aycan el is mimanil nak, cax ok colchajcan el yanimail nak yet ok jay Cham Jajawil.

⁶Yuj jun yobtakil max uj e xol tu', xan man mojok che yi' can e ba. ¿Tom man e yojtakok, tol jabnej yich pan chi ak'on pajboktok junok miman xilan harina?

⁷Yuj tu xin, bekekcan juntzan e beybal yet yalantok tu'. Yujtol a juntzan tu', lajan axca yich pan. Xan ta che bekcan axca walon tu', ok ex occan axca wal ixim pan chi lolay yet k'in Pascua, tol c'am jabok paltail. Yujtol wal yel cayex ton tu' yul sat Cristo, yujtol a Cham max cam co q'uexelok. Axcata' no calnel chi ak'lay cam yin xajanbalil yet is Pascua eb wet israelal, axca tu' max yun cam Cristo juj.

⁸Yuj tu xin, xan yowalil chi co naektek is camichal tu' yin masanil co c'ul. Ta axca tu' chi jutej, axca junok ixim pan c'am yich, c'am jabok paltail, caytu' co beybal.*fn* Ta chi co naektek is camichal Cham tu', c'amxa chon toj yin yobtakil, c'al yin tzet man watx'ok max jun yet yalan. Yujtol a juntzan tu', lajan axca yich pan, cax chi pajbi el ixim pan tu' masanil.

⁹Max waltok yul jun in carta ayex, tol c'am chi je' junnej chon ec' yetok eb ayoc yin ajmulal,

¹⁰ma eb chi yochej oc tzet ay bay junokxa mactxel, ma eb elk'om, ma eb chi yal ba bay tzet chi al-lay oc diosal. Palta manak eb manto creyenteok axca tu' beybal chi wala'. K'inalok ta a eb tu' chi wala', yowalil mi chon el yulyibank'inal ti'. Akxa tinani xin, manak eb man creyenteok tu' chi wala'. Yak'ban ayon ec' xol eb, yowalil chon k'anjab yetok eb.

¹¹A tzet max waltok ayex tu', a eb chi yaloc ba creyenteal tol ac'ala' yob is beybal, a eb chi wala', c'am chi je' tol junej chon ec' yetok eb tu'. Mawal axca eb ajmul, ma eb pek' yin tzet man watx'ok, ma eb chi yal ba bay tzet chi al-lay oc diosal, ma eb bajwajwom, ma eb uq'uem an, c'al eb elk'om. A eb axca tu' is beybal, cax chi yalon pax eb tol creyente eb, tamwal co low yetok eb, c'am chi je'.

¹²A eb man creyenteok c'am jalon jet co beyc'ulnen eb, yujtol a Dios ok beyc'ulnen eb. Palta eb jet creyenteal, yowalil chi co beyc'ulnej eb. Yuj tu' xan, a nak yob max el yunen tu', iek el nak e xol.