Read Q'anjob'al 1 Co 8 Bible Online

1 Co 8 - Q'anjob'al bible

1 Co 8

¹A tinani', ok waltek yuj tzet chi ak'lay yin xajanbalil bay tzet chi al-lay oc diosal, chi lajwi tu' cax chi chilay paxok. Yel toni, a juntzan ok waltek ti', jojtak co masanil. Palta a yuj tzet jojtak tu' toc'al chi jiaj can co ba. A pax ta ay co camc'ulal, caw wal chi yi yip eb jet creyenteal yuj.

²A mac caw wal yojtak naoni, c'am pax jabok tzet yojtak axca wal chi yochej Dios.

³Palta eb chi camc'ulnen Dios, ojtakbil eb yuj.

⁴Axa tinani xin, ok waltek yuj tzet chi chiji, yet chi lajwi yak'lay yin xajanbalil bay tzet chi al-lay oc diosal. A tzet chi al-lay oc diosal tu', jojtak tol c'am yopiso yulyibank'inal ti', yujtol asan jun Dios ay, c'am cawan oxwanok.

⁵Ay tzet chi al-lay oc diosal chi ec' satcan. Ay c'apax tzet chi al-lay oc diosal yulyibank'inal ti'. Yujtol a eb anima, xiwil tzet chi yaloc is diosalok, c'al yajawilok.

⁶Palta ayon ti', asan jun co Diosal ay, a ton co Mam Dios. A co Mam Dios max watx'nen masanil tzet yetal. A' c'apax max on watx'neni, yuj co tx'oxon el is watx'ilal. Asan c'apax jun Jajawil, a ton Jesucristo. Yuj Cham xan ay masanil tzet yetal. Toltax ayon ti', asan yuj Cham xan ayon ec'ok.

⁷Palta man masanilok creyente chi nachaj el juntzan ti' yuj. Ay eb caw wal k'aynak yetok tzet chi al-lay oc diosal tu'. Yuj tu' xan a tzet chi ak'lay yin xajanbalil, asan tzet chi al-lay oc diosal tu' ay yet naon eb. Manto tec'anok waay is nabal eb. Yuj tu' xan chi etax el nabal eb, yuj chion eb tzet chi ak'lay yin xajanbalil tu'.

⁸Palta c'am chon is beyc'ulnej Dios yuj tzet chi co chi' tu'. C'am chon texac'al watx'ji aj yul sat Dios, ta chi co chi'. Ac'ala' ta c'am chi co chi' c'apaxok, c'am chon etax c'apax el yul sat Cham.

⁹Caxc'al bekan jayji co chion masanil, palta ay is may chi etax el nabal eb manto tec'anok waay juj. Yuj tu' xan yowalil chi co taynej co ba yin tzet chi junej.

¹⁰Ayex e xol ayex ti', e yojtak tol c'am is may tzet chi chilay tu', palta ta ay mac manto tec'anok waay is nabal, man yojtakok eb juntzan tu'. K'inalok chi yil eb tol chotan ex ay e low satak juntzan tzet chi al-lay oc diosal tu'. Ay is may chi monchaj nabal eb e yuj, cax chi chion eb tzet ak'bilxa yin xajanbalil tu'.

¹¹Ta caytu' che yut e ba axca tu', ok etax el nabal eb manto tec'anok waay is nabal tu' yuj tzet e yojtak tu'. Palta yuj c'apax eb xan max cam Cristo.

¹²Yuj tu' xan a eb manto tec'anok waay is nabal tu', ta e yujc'al cax chi etax el nabal eb, a bay Cristo chi oc e mul.

¹³Yuj tu', k'inalok ta ay junok mac chi etax el is nabal yujc'al tzet chin chi', yel mi watx' c'amxa chin chi' chibej, yet watx' c'am junok mac chi etax el nabal wuj.