Read Q'anjob'al 1 Co 9 Bible Online

1 Co 9 - Q'anjob'al bible

1 Co 9

¹Ayin ti', wal yel chekbej in Jesucristo. Ilbil yin Cham Jajawil Jesús wuj. Yuj tu' xan ay walon wet axca eb is chekbej masanil. Ayex ti', max ex oc creyenteal yuj in mulnajil yin yet Cham Jajawil tu'.

²Caxc'al ay juntzanokxa eb chi aloni tol mayin chekbejok Cham, palta e yojtak ayex ti' sic'libil tol is chekbej wayji. Txequel wayji e yuj tol chekbej in, yujtol wuj xan max e yaoc e c'ul yin Cham.

³Ay eb yob chi alon win, palta cac'al ton ti' chi wut in paktzen bay eb axca ti'.

⁴Yuj tu xan ay walon wet in chaon tzet chin lo', c'al tzet chi wuq'uej.

⁵K'inalok ay junok janab chi oc wistzilok tinani', ay walon wet wion bey tzanc'al bay chin eq'ui, yujtol caytu' chi yut ba juntzanxa eb chekbej Cham Jajawil, c'al eb yuẍtak Cham, yetok c'apax Pedro.

⁶¿Xin ta asan in yetok Bernabé c'am jalon jet co bekoncan co mulnajil che na'? ¿Ma asan juntzanokxa eb chekbej ay yalon yet che na'?

⁷Ilab eb soldado tinani'. ¿Ma ay junok eb munilc'al chi yiil gasto yul yet? Yetok c'apax eb chi awon junok tzet yetal, yowalil chi lo eb sat yawoj tu'. Ac'ala' c'apax eb ilom no' tinani', tokwal c'am chi yuc' eb lecheal no'.

⁸A juntzan chi waltok ayex ti', man yinok nabal anima chi tita'. A yul ley Moisés, a tu' albilcan juntzan ti' yuj Dios.

⁹A yul jun ley tu', a tu' tz'ibbil c'apaxcan axca ti': Manchak e yaoc pa yin ti' no no' chi tec'wi trigo, ẍi. Mannejc'alnak yuj no' tu' xan max yalcan Dios juntzan ti',

¹⁰palta juj c'apaxok. Max tz'ibelaycan yul ley tu' yet chi nachaj el juj. Yujtol a eb t'ocom tx'otx' yetok eb tec'om trigo, a yet chi mulnaj eb, chi yaoc eb yipok c'ul, tol ok lo eb tzet ok yak' is mulnajil tu'.

¹¹Axca ton eb chi mulnaj tu', cayon ton tu' ayon chekbej on Cristo ti'. A yet max on ec' e xol, axca tol ay tzet max ec' jawcan e xol. A tzet ec' jawnakcan e xol tu', yet espíritu. Yuj tu', ¿xin ta man mojok co chaon co gasto ayex, is paktzilok co mulnajil tu'?

¹²Ay c'apax juntzanxa eb ay yalon yet chaon yet ayex, palta yelxac'al ay jalon jet ayon ti'. Caxc'al ay jalon jet co chaon co gasto ayex, palta c'am junelok max co k'an ayex. Caw chi jak'c'al techaj masanil tzet yetal, yet watx' mimanokabc'al yelapnok yabixal Cristo tzanc'al bay chi ec' jalilok.

¹³E yojtakxa, tol a eb chi mulnaj bay templo Dios, a tu' chi cha eb tzet chi lo', yujtol a eb ay yopiso yak'on xajanbal, chi je' chion eb chibejal no no' chi yak' yin xajanbalil tu'.

¹⁴Cay c'apax tu' eb chi ec' aloj el k'anejal yet colbanilej. Yujtol yalnakcan Cham Jajawil tol yowalil chi cha eb is gasto yin bay chi mulnaj oc eb tu'.

¹⁵Ayin ti', caxc'al ay walon wet in chaon in gasto, palta c'am mac bay max in k'an junelok. Toc'al ton chi waltok juntzan ti' ayex. Man yujok in k'anon in gasto xan chi waltok, c'amak. A chi wut in naoni, yel mi watx' chin cami, yintak pax tol chin k'an in gasto tu' ayex. Ilab tol yuj, xan ay walon wet in tzaloj satak Dios. C'am mac chi je' yion ec' jun in tzalojc'ulal ti'.

¹⁶Ayin ti', caxc'al chi ec' walil k'anejal yet colbanilej, man yujok tu' xan chi je' in maynen in ba, yujtol yowalil chi ec' walilok. Ok'bal in c'ul ta c'am chi ec' wal jun k'anejal yet colbanilej ti'.

¹⁷K'inalok ta yul wet chi ec' walilok, moj tol chin cha' in tojol. Ta man yulok wet chi walon elok, palta toc'alta' ok walilok, yujtol a Dios ak'nejcan jun wopiso ti'.

¹⁸Yuj tu' xan a in tojol lanan in chaon ti' tinani', a ton in tzalojc'ulal, yuj chi ec' walil k'anejal yet colbanilej ti', yin tol c'am in tojol chin cha'. Yujtol caxc'al ay walon wet in k'anon in gasto yin wopiso ti', palta c'am chin k'ana'.

¹⁹Caxc'al c'am mac ay yalon yet win, palta chi wak' in ba yak'omalok serbil masanil anima, yuj yoc jaywanok yin creyenteal yin Cristo wuj.

²⁰A yet ayin ec' xol eb wet israelal, axca beybal eb tu', caytu' chi wut in beybal c'apaxok, yuj in monten jaywanok eb. A eb wet israelal tu', caw wal ayoc nabal eb yin ley Moisés. Yuj tu' xan a yet ayin ec' nan xol eb, caxc'al c'am oc in nabal yin jun ley tu' yetok eb, palta chi wikej jun ley tu', yuj in monten jaywanok eb.

²¹Ac'ala' c'apax yet ayin ec' xol eb man israelok, eb c'am oc nabal yin jun ley tu', lajan chi wut in nabal yetok eb, yuj in monten jaywanok eb. Palta masanil tiempo, yowalilc'alta' chi wikej ley Dios, yujtol ayoc in nabal yin ley Cristo tinani'.

²²Ac'ala' yet ayin ec' yetok eb man tec'anok waay is nabal, lajan chi wut in ba yetok eb. Axca tol man tec'anok waay in nabal, caytu' chi wut in ba, yuj in monten jaywanok eb. Xan tzanc'al bay chin eq'ui, axcac'al chi yut ba eb bay chin ec' tu', caytu' chi wut in ba yetok eb, yet watx' ta c'uxan ay eb chi cha' is colbanil wuj.

²³Masanilc'al tzet chi el wuten in ba tu', yuj k'anejal yet colbanilej, xan caytu' chi wut in ba, yet watx' ayin jun chi wi' watx'ilal ibil oc yuj c'apaxok.

²⁴K'inalok eb chi sakchi yin yuktelen ba tinani', chi yak' eb yanej. E yojtakxa, tol masanil eb chi yak' yanej, palta asannej mac chi babji yapni bay t'inan chi apni eb tu', asan chi chaon paktzil. Yuj tu' xan axca ton eb chi yak' yanej tu', yowalil caytu' chi jut co ba yin yet Cristo, yet watx' ok co cha' paktzil jet junjun on.

²⁵Masanilc'al mac chi oc yin sakach tu', chi taynej ba eb yin masanil tzet chi on yetax el mimanil eb. Chi taynej ba eb, yujtol chi yochej eb chi cha' paktzil. A paktzil chi cha eb tu', jun ch'an bek chi etaxtok.*fn* A pax paktzil ok co cha' ayon ti xin, c'am bak'in chi etaxtok. Yuj tu', yowalil chi co taynej co ba yin tzet man watx'ok.

²⁶Axca wal lajon oc eb chi yak' yanej yin sakach tu', caytu' chi wut in lajon oc ayin ti' yin yet Dios. Man cabtakok in c'ul chi wak'on wanej. Axca eb ayoc yin sakach chi mak'lej ba, yalc'al mac chi ak'on ganar, caytu' chi wut c'apax in ba. Yujtol yin masanil in c'ul chin mulnaj yin yet Dios.

²⁷Caw chin mitx'oc wanaj in mimanil ti', cax chi wak'on wal cuenta sic'libil, talaj a yet chi lajwi wawten xiwil mactxel yin yak'on yip yin yet Dios, axa talaj chi yunajok, c'amxa walon wet wion tzet uktebil wuj tu'.