Read Q'anjob'al 2 Co 1 Bible Online

2 Co 1 - Q'anjob'al bible

2 Co 1

¹Ayin Pablo in ti', chekbej in Jesucristo, yujtol axca tu' max el yin c'ul Dios. Ajun Timoteo wetok cax chin tz'ibentok jun in carta ti' ayex ex yiglesiaxa Dios bay Corinto. Chin tz'ibej c'apaxtok ayex e masanil ex yet-xa Dios bay yul yet Acaya.

²Yak'okabc'al co Mam Dios, c'al Cham Jajawil Jesucristo is watx'c'ulal, c'al is junc'ulal ayex.

³Jalek watx' k'anej bay Dios, is Mam Cham Jajawil Jesucristo, a ton Cham Mamej tol caw chi ok' c'ul jin.

⁴A yet chi jay yailal jiban, a' chi ak'on mimanil co c'ul, yet watx' chi je' jak'on mimanil c'ul eb chi jayoc yailal yiban. Axca chi yut yak'on Cham mimanil co c'ul, cayokab tu' chi jut c'apax jak'on mimanil c'ul eb.

⁵A tinani', caw chi jab yail yetok Cristo, palta ac'al oc chi ak'on pax mimanil co c'ul. Axca chi jut jaben yail tu', caytu' chi yun yak'lay c'apax mimanil co c'ul.

⁶Yuj tu' chi jab yail yet watx' chi je' ex co mimanc'ulneni, c'al yuj e colchaji. Yetok c'apaxok, chi yak' Dios mimanil co c'ul, yet watx' jojtak tzet ok ex jut co mimanc'ulneni, yet watx' che tec'baj e ba e yak'on techaj tzet ok jay e yiban, axca tzet chi jay jiban.

⁷Chic'al jaoc Dios yipok co c'ul, yet chi jiloni tol ayex jun che yab yail jetok. Jojtak, tol axca chi yun e yaben yail ti', caytu' ok yun e mimanc'ulnelay yuj Dios.

⁸Ex wuẍtak, ex wanab, chi jochej che yojtaknej elok, jantak yailal ec' jilnak bay yul yet Asia, yujtol xiwil yailal ec' jilnak bay tu', xan ijan wal maj techaj juj. A co naoni tol maj onxa colchaj el yul k'ab camich.

⁹A co naoni, tol ok on camxac'al bay tu'. Max eq'uel juntzan tu' jiban, yet watx' asan Dios chi jaoc yipok co c'ul, yujtol a' chi ak'on ictzoj aj eb camnak. Axa on xin, c'am chi jaoc yipok co c'ul tol chi je' co colon co ba yul jet.

¹⁰Jabxanej man camnakok on yuj mimek yailal tu'; palta axa Dios max on colon elok. Lananc'al co col-lay el yuj tinani'. Ayoc Cham yipok co c'ul sic'libil, tol ok on is colc'al bay juntzan yailal tu'.

¹¹Ta chex colwaj yin txaj jetok, cax xiwil ex ok ex txajlok juj, ac'ala' xiwil ex ok e yal yuj diosalil bay Dios yuj is watx'c'ulal ok yak' ayon, chi yal tu'.

¹²Caw chon tzaloji, yujtol yojtak wal co c'ul, tol tojolc'al chi jut co beybal on bay masanil anima, c'al ayex. C'am tzet yob yin co beybal, yujtol max yak' Dios is yipalil ayon yuj is watx'c'ulal. Man yujok co jelanil xan watx' co beybal tu', c'amak.

¹³A yet chi co tz'ibentok co carta ayex, asan juntzan tzet chi je' e yilon ajok, cax chi je' nachaj el e yuj, asan chi co tz'ibejtok ayex. Yelc'ulalokab chi nachaj el e yuj sic'libil xin.

¹⁴Chi waoc yipok in c'ul, tol ok nachaj el e yuj sic'libil, tol a yet ok jay Cham Jajawil Jesús, ok ex tzaloj aj juj, cax chon tzaloj c'apax aj e yuj.

¹⁵Ayoc jun ti' yipok in c'ul, yuj tu' max in nabalnej el ex ec' wilon yin babelal, yet watx' cayel chin ec' ayman ayex, cax chi cam wal e chaoncan is watx'c'ulalil Dios.

¹⁶Max in nabalnej el ex ec' wiloni, catatu bian, chin jayoc bay Macedonia ti'. Axa yet chin meltzoj paxtok cayti', cax chex ec' wilon pax junelxa in naoni. Ta axca tu', ok je' e colwaj ayin yin in viaje yet ok in tok bay Judea.

¹⁷A yet max in nabalnen el axca ti', ¿comonc'al mi max in na', e naoni? ¿Chi mi e na' tol toc'al chin na' juntzan ti' axca chi yun nabalnen el eb comon anima junok is tzet yetal? ¿Chi mi e na' tol Ja' quin chi junok bek, C'amak quin chixanaj pax yet junokxa bek?

¹⁸Yojtak Dios, tol c'am junelok chi jal ayex axca ti': Ja' con chinaji, palta tekan chi yal elapnok, C'amak.

¹⁹A Cristo Jesús C'ajol Dios, a' ec' jalnak on yabixal e nan e xol. Ec' yalnak c'apax Silvano yetok Timoteo. A Cristo, c'am junelok max yal axca ti': Ja' ẍi junok bek, axa junokxa bek xin, chi q'uexon is ti' cax chi yaloni: C'amakxa, ẍi paxok. Yujtol asan tzet yetal yel max el yaloni.

²⁰A' chi ak'on yun masanil yalben Dios. Yuj tu' xan a yet chi jalon co watx' k'anej bay Dios, Yunokabi con chi, yujtol jojtak, tol ok yun yuj Cristo Jesús.

²¹A Dios chi ak'on tec'anil e nabal jetok, yujtol ayon oc yul k'ab Cristo. A Dios max con ion oc yetok.

²²A Cham max aon oc co selloal, a ton Cham is Yespíritu max cajbaj oc jin junjun on. A Cham Yespíritu chi tx'oxon el ayon, tol yel ok co cha' masanil juntzan tzet max yak' ti' yak'on ayon.

²³Chi wochej tol c'am chex wak' cusok; yuj tu', c'amto chin toj bay Corinto tu'. Wal yel chi wala', in testigo Dios, yujtol yojtak Cham sic'libil tzet ay yin in nabal.

²⁴C'am chi jochej tol ayonxac'al chi jal tzet che yut e yaon oc e c'ul yin Dios, yujtol tec'an exxa yin e creyenteal. Palta chi jochej tol chex co colo' yin co jekon e na', yet watx' chi texac'al aj can e tzalojc'ulal.