Read Q'anjob'al 2 Co 13 Bible Online

2 Co 13 - Q'anjob'al bible

2 Co 13

¹Yinxa yoxelal ok ex tok wila'. Junjunc'al tzet ok watx'jok yayji, palta yowalil ay cawanok ma oxwanok testigo ok alon is mul junok mactxel.

²A yet max quex ec' wilon yin is cayelal, ay jun tzet albilcan ayex wuj. Ti chi waltok ayex junelxa tinani'. Caxc'al c'am in ec' e yetok bay tu', palta chi waltok ayex, mac ex ocnak e yobtakil yet yalan, e yet c'apax e masanil yayji jun k'anej ti'. A yet ok in tok ayex tu' yet junelxa ti' xin, c'amxac'al in mimanc'ulal e yin bian. A ton jun ti' ec' walnakcan ayex.

³Lanan e yochen che yila' ta yel a Cristo chin k'anbalnen yet chin k'anjab ayex. A ton yet ok in apnok ocok, cax ok e yiloni, catatu' ok nachaj el e yuj, yujtol a Cristo, mantok tol c'am tzet chi je' yuj tx'oxk'abnen el ayex, palta tol masanilc'al chi je' yuj Cham tx'oxon el e nan e xol.

⁴Yel toni, a yet max curusnelay Cham, axca wal tol c'am yip Cham, palta yuj yipal Dios, xan iquis Cham tinani'. Ilab on c'apaxok, axca wal tol c'am jabok jelapnok on c'apax yetok, palta yuj yipal Dios, xan iquis on yetok Cristo, yet watx' ac'ala' ex jak'on serbil.

⁵Caw chi cam e beyc'ulnen e ba yul e yet junjun ex, yet watx' chi txecloj elok, ta yel wali ayex oc yin Cristo. Caw che beyc'ulnej e ba yul e yet junjun ex. ¿Tom man e yojtakok tol ayoc Jesucristo e yin junjun ex? Asan bian, ta mayex acaw creyenteok sic'libil, c'am oc e yin chi yal tu'.

⁶Palta chi wochej tol caw che yojtaknej elok, tol ayon ti', acaw creyente on sic'libil.

⁷Chon txajli on bay Dios e yuj, yet watx' c'am junok tzet man watx'ok chi el e yuneni. Man toc'alok chon txajli on e yuj, yet watx' chi txecloj elok tol watx' co mulnajil; caxc'al chi txecloj elok tol man watx'ok co mulnajil, palta ac'ala' yochen co c'ul tol watx' che yut e beybal.

⁸Yujtol c'am chi je' jajc'ulnen co ba yetok cuybanilej caw yel. A ti' jet, tol chi jak' jip co mulnaj oc yin.

⁹Yuj tu', caxc'al c'am wal jelapnok, palta chon tzalojc'alta'a, ta ay e yelapnok. Yetok c'apaxok, ok on txajlok e yuj, yet watx' chi aj can watx'ji oc e nabal.

¹⁰Yak'ban c'amto chin apni ayex tu', ti chi wak' babjok jun in carta ti' in satak, yujtol chi wochej tol man yowalilok ow chi toj wut in ba ayex tu' yuj wopiso ti'. A Cham Jajawil ak'nej jun wopiso ti', yuj waon oc e tec'anil, man yujok ex wetnen elok, xan max ak'layi.

¹¹Axa tinani xin, ex wuẍtak, ex wanab, ayexokab oc yin tzalojc'ulal bay tu'. Caw che watx'nej oc e nabal. Ayxaokab e mimanc'ulal. Junxanejokab che yut e nabal, junc'ulalokab ayex bay tu'. A Dios ak'om junc'ulal, c'al ak'om camc'ulal, a' ok oc e yetok.

¹²Ak'lejek cawil e c'ul yin e tx'oxoni tol ay e camc'ulal.

¹³Chi yatok masanil eb creyente cayti' cawil e c'ul.

¹⁴Yak'okab Cham Jajawil Jesucristo watx'c'ulal ayex, cax yak'okab Dios is camc'ulal ayex. Ayokab oc Cham Espíritu Santo e yetok e masanil.