Read Q'anjob'al 2 Co 9 Bible Online

2 Co 9 - Q'anjob'al bible

2 Co 9

¹A yuj e yofrenda ok e yak' bay eb jet creyenteal, man yowalilok chin tz'ibejtok ayex yuj.

²Yujtol wojtakxa, tol caw wal che yochej chex colwaj bay eb. Lanan ex walon watx'il bay eb aj Macedonia ti'. Tix chi wut k'anjab in ba e yin bay eb axca ti': A eb creyente yul yet Acaya, junxa abilc'al c'oli eb yak'on yofrenda, quin chi. Axa yet max yaben eb aj Macedonia ti', tol yelc'ulal wal lanan e yak'oni, cax xiwil eb max bulchaj yak'on yet.

³Palta ok in chektok eb juẍtak ti' ayex, yet watx' manokabc'al nabaok tzet watx' max el walon e yin tu'. Ok in chektok eb, yet watx' wajanxaokab yayji e yofrenda tu', axca max wut walon e yin tu'.

⁴Ta ay eb aj Macedonia ti' chi toj wetok, cax axa chi yilon eb tol c'amto e yofrenda tu', ti wal q'uixwil ok on can yul sat eb, yujtol toxa mayal ex jaoc yipok co c'ul. Man lananok waloni ta e q'uixwil ok el ayex ti'.

⁵Yuj tu', max in na', tol yowalil chin k'an bay eb juẍtak ti', yet watx' a ayex tu' chi babji toj eb. Ok tok eb colwaj e yetok yin chaon e yofrenda tu', axca max e yut e yak'on e ti'. Ta caytu', watx'xaokab yayji e yofrenda tu', cax ok e yak'on yuj e watx'c'ulal, yet watx' mayonnak ok ex tok jak' pural e yak'oni.

⁶Naektek junxa ok wal ti'. A eb txennej tzet chi yawa', txennej tzet chi waj eb. Axa mac miman tzet chi yawa', miman tzet chi waj eb.

⁷Junjunokab on chi co na yul jet jantak chi el yin co c'ul chi jak'a'. Manokab yinok cusc'ulalil chi jak'a'. Mantok tol chon ak'lay pural chi jabej, xan chi jak'a', yujtol a Dios chi cam c'ul yin eb chi tzaloj yak'oni.

⁸A Dios chi je' yuj yak'on masanil tzet yetal ayex yuj is watx'c'ulal. Chi yak' masanil tzet caw chi oc yopiso e yuj yin masanil tiempo. Toltax chi yak'xac'al sobra ayex. Yuj tu', xiwil bay chi je' e colwaj ocok.

⁹Ilab tol chi yal tx'an Un axca ti': Yin c'am basil max colwaj xol eb meba'. A is watx'c'ulal tu' ayc'al yin tojbalk'inal, ẍi.

¹⁰A Dios chi ak'on masanil inat chi awlayi, cax chi yak'on c'apax masanil tzet chi loji. A' ok ak'on masanil tzetak yetal ay ayex ok e yak' e yofrendaok. Axca tol ok e yawcanok. A is q'uexel ok e cha' yuj e nabal watx' tu', ok ch'ib yuj Dios, cax ok e jatx'oni.

¹¹Yuj tu' xiwil watx'il ok e cha', yet watx' ok je' e yak'on janic'okxa. Xiwil eb jet creyenteal ok alon yuj diosalil bay Dios yet ok chaon eb jun e yofrenda ok jitok bay eb tu'.

¹²Yujtol a jun colwal ok ak'lay bay eb tu', a yopiso man asannejok yuj col-lay eltek eb yalan cawxinakil yuj, palta ok yal eb yuj diosalil bay Dios e yuj.

¹³Ok yal eb watx' k'anej bay Dios, yujtol a jun e yofrenda tu' ok tx'oxk'abnen elok, tol lanan e yiken watx' abix yet Cristo. Yetok c'apaxok, ok yal eb watx' k'anej bay Dios yuj jun e miman colwal che yak' bay eb tu', yujtol ok colwaj oc bay masanil eb jet creyenteal.

¹⁴Axa eb ok chaon tu', ok txajlok eb e yuj. Caw wal ok ex camc'ulnej eb, yujtol ayex chex yak'balnej Dios yin e tx'oxon el xiwil is watx'c'ulalil bay eb.

¹⁵Jalek yuj diosalil bay Dios, yujtol a jun Colwajwom max yak' ayon, c'amxa chi alchaj elok, jantak watx'il.