Read Q'anjob'al Gl 1 Bible Online

Gl 1 - Q'anjob'al bible

Gl 1

¹Ayin Pablo in ti', chekbej in Jesucristo, man animaok ayin is chekbej. Yetok c'apaxok, man animaok ak'nej wopiso ti', palta a wal caw Jesucristo max ak'oni, yetok co Mam Dios, Cham max ictzonen aj Jesucristo xol eb camnak.

²Masanil eb juẍtak ajun wetok, cax chin tz'ibentok jun carta ti' bay juntzan iglesia yul yet Galacia.

³Yak'okab co Mam Dios, c'al Cham Jajawil Jesucristo is watx'c'ulal, c'al is junc'ulal ayex bay tu'.

⁴A Jesucristo ul yak'nak ba camok, yujc'al yioncan el co yobtakil. Axca ton ti' max con yut colon el yul k'ab tzet man watx'ok bay yulyibank'inal ti', yujtol axca ti' max yun yel yin c'ul co Diosal, co Mam c'apaxok.

⁵Yuj tu', jalekc'al watx' k'anej bay Dios yin tojbalk'inal. Yunokabi.

⁶A Dios awtenej on yuj is watx'c'ulal Cristo jin, palta caw wal chi c'ayaj in c'ul e yuj, yujtol yin aymanil che bekcan Dios. Axa tinani', lanan e tz'ak e yaon oc e nabal yin junokxa yabixal colbanilej tol tx'ok chi yun yal-lay ayex.

⁷Palta c'am junokxa yabixal colbanilej caw yel. Ay eb chi ochen chi q'uexontok yabixal Cristo; palta toc'al chi somchaj el e nabal yuj eb.

⁸Palta mayal ec' jalcan el yabixal colbanilej ayex. A tinani', ta ay junokxa mac chi ec' alon el junokxa tx'ok abixal ayex, caxc'al mi ayin, ma junok ángel chi tit satcan ul yaloni, titokab yowal c'ul Dios yiban.

⁹Axca ta' wutnak walon ayex junel, caytu' chi wut walontok ayex tinani': Ta ay junok mac chi ec' alon el junokxa yabixal colbanilej man lajanok yetok jun chabilxa e yuj, titokab yowal c'ul Dios yiban jun tu'.

¹⁰A yet chi walontok juntzan ti' ayex, ¿xin tatol chi wochej chi tzaloj anima wetok che na'? ¡C'amak! Asan Dios chi wochej chi tzaloj wetok. C'am jabok chin na' ta chi tzaloj anima wetok. K'inalok ta chi wochej chi tzaloj eb anima wetok, may in yak'omalok serbil Cristo chi yal tu'.

¹¹Ex wuẍtak, ex wanab, chi wochej che yojtaknej el junxa ok waltok ti'. A jun k'anejal yet colbanilej chi ec' walilok, man yetok anima.

¹²Man animaok junok bay chabil jun abix ti' wuj. Man animaok bay cuybil wuj, yujtol asan Jesucristo ak'nej wojtaknej elok.

¹³E yabnakxa, tzet max el wuten in ba yet yalan, yet ayoc in nabal yin is religión eb wet israelal. Caw ok'bal c'ul max wut wetnen yiglesia Dios. Max wak'lej wak'on lajwok el eb masanil.

¹⁴A yin is religión eb wet conob, yelxac'al jelan in yintak eb wet ch'ibomal, yujtol yelc'ulal wal tol max waoc in c'ul yin beybal eb jichmam on.

¹⁵Palta yettaxc'al manto in aljok, max in sic'lay el yuj Dios. Yujc'al is camc'ulal, xan max in is yawtej oc yetok. Axa yet max jay tiempoal axca chi yochej,

¹⁶max yak'on wojtaknej el is C'ajol, yet watx' chi ec' walil yabixal colbanilej e nan e xol, ayex man israelok ex ti'. A yet max xew in chaon Cristo, c'am junok anima max quin cuyoni.

¹⁷Maj in bet k'anjab yetok eb babel ocnak chekbejok Cristo in satak ayic' bay Jerusalén, palta tol ayman max in bet bay yul yet Arabia. Lajwi tu', max in meltzoj bay Damasco.

¹⁸Maj in bet yin aymanil bay Jerusalén. Oxebxa abil tu', catatu' max in toji. Ato yet tu' max babji in k'anjab yetok Pedro. Asan 15 c'ual max in ayji ec' yetok.

¹⁹C'am junokxa eb chekbej Cristo max in k'anjab yetok, ti asan Jacobo, yuẍtak Cham Jajawil max in k'anjab yetok.

²⁰Satak Dios chi waltok ayex, caw wal yel jun chi wal ti'.

²¹Lajwi wec' bay Jerusalén tu', max in ec' c'apax bay Siria yetok bay Cilicia.

²²A eb bay juntzan yiglesia Cristo bay yul yet Judea, mayinto yojtakok eb yet tu'.

²³Ac'al wabixal chixa yab eb, yujtol ay eb max yal wuj axca ti': A jun winak max con etnen yet yalan, yujtol max yochej tol c'am chi jaoc co c'ul yin Cristo, axa tinani xin, axa jun chi ec' alon el yabixal, ẍi eb wuj.

²⁴Yuj tu', max yal eb watx' k'anej bay Dios wuj.