Read Q'anjob'al Gl 2 Bible Online

Gl 2 - Q'anjob'al bible

Gl 2

¹14 abilxa wec'can bay Jerusalén, cax max in toj yetok Bernabé junelxa. Max jitok Tito jetok.

²Max on toj bay tu', yujtol yalnak Dios ayin tol yowalil chin tojic'ok. A yet max in apni ocok, a eb tol ojtakbiltac'a tol ikbajwom, max in wajbaj oc eb wetok. Max walcan bay eb tzet yayji oc jun k'anejal yet colbanilej chi walil nan xol eb man israelok. Max wut in ba axca tu', yujtol chi wochej tol manokab toc'alok chi wetnej in ba in mulnaji.

³Ac'ala', ajun Tito wetok. Caxc'al griego nak, palta maj ak'lay pural nak yak'on circuncidar ba.

⁴Yel toni, ay juntzan eb chi yaloc ba creyenteal, max yochej eb tol max ak'lay circuncidar Tito tu'. Palta a eb tu', titol ewantakil max oc eb co xol, yuj yilon eb tzet chi yun co colchaj el yul k'ab ley Moisés yuj Cristo Jesús, yujtol chi yochej eb tol chon meltzoj yul k'ab jun ley tu' junelxa.

⁵Palta maj jikej jabok bay chi yal eb, yujtol chi jochej tol asan yin jun acaw k'anejal yet colbanilej che yaoc e nabal.

⁶Palta c'am junokxa chekbanil max yak' eb ayin, a ton eb txequel yayji tol ikbajwom xol eb tu', (c'am chin na' tatol ay yopiso eb, yujtol a yul sat Dios, lajan onc'al el co masanil.)

⁷C'amxa tzet max yal eb, yujtol max yojtaknej el eb, tol a Dios ak'nej wopiso walon el k'anejal yet colbanilej nan xol eb man israelok, axca max yun yak'on yopiso Pedro yalon el k'anejal yet colbanilej nan xol eb israel.

⁸A Dios ak'nej yopiso Pedro tu' yoc chekbejok Cristo nan xol eb israel. Ac'ala' in c'apaxok, a Dios ak'nej wopiso woc chekbejok Cristo nan xol eb man israelok.

⁹A Jacobo yetok Pedro c'al Juan, miman yelapnok eb yul sat eb creyente bay tu'. Max nachaj el yuj eb, tol a Dios ak'nej jun wopiso ti' yuj is watx'c'ulal. Yuj tu' xan max co mitx'lej co k'ab yetok eb yetok Bernabé, yujtol lajan chaon ba nabal eb jetok. Max tx'oxk'abnej el eb yin mitx'lejk'abejal tu', tol chi cha c'ul eb co toj xol eb man israelok, cax chi je' c'apax mulnaj eb xol eb jet israelal on.

¹⁰Asan jun ti' yalnak eb ayon, tol chi co na'c'altek eb meba'. A jun ti' ayxa c'apax oc yin in c'ul wuneni.

¹¹Palta a yet ayic' Pedro bay Antioquía, caw max in teyelej in ba yetok, yujtol man watx'ok max yut ba bay tu'.

¹²Yujtol a yet max apni ocok, aymanc'al max low yetok eb creyente man israelok. Palta axa yet max apni oc juntzan eb chekbej Jacobo bay Antioquía tu', max yion el ba, majxa low yetok eb, yujtol max xiw bay juntzan eb ayc'al oc nabal yin ley Moisés.

¹³Axa juntzanxa eb israel tol creyentexa xin, max beybalnej eb beybal Pedro. Cabsat yutnak ba eb yetok. Ac'ala' c'apax Bernabé, cabsat max yut ba yetok eb.

¹⁴A yet max wilon ayin ti', tol man tojolok chi yut ba eb axca yalon k'anejal colbanilej caw yel, cax max walon bay Pedro satak masanil eb creyente axca ti': Ach ti', israel ach, palta lajan a beybal axca eb man israelok. Man lananok a beybalnen beybal eb jet israelal. Yuj tu', ¿tzet xan chochej chak' pural eb man israelok yet watx' chi beybalnej eb beybal eb jet israelal?

¹⁵Ayon ti', yinatil on israel, yuj tu', may on lajanok axca eb man israelok, yujtol c'am yelapnok leyal Moisés yul sat eb.

¹⁶Palta jojtak, tol c'am junok mac chi oc watx'il yul sat Dios yujc'al chi yikej ley Moisés. Asan mac chi yaoc c'ul yin Jesucristo, asannej eb watx' satak Dios. Ilab on c'apax ayon ti', chi ja c'apax oc co c'ul yin Jesucristo, yet watx' watx' on yul sat Dios. Asan yuj chi jaoc co c'ul yin Jesucristo, xan watx' on yul sat Cham, man yujok jiken ley Moisés, xan watx' on. Yujtol c'am junok mac watx' yul sat Dios, yujc'al tol chi yikej jun ley tu'.

¹⁷Chi jochej tol yuj Cristo, xan chon yal Dios watx'il. Yuj tu', chi txecloj elok, tol co masanil ayon israel on ti', yobtakwom on c'apaxok. Palta ¿a mi Cristo chon aontok yin yobtakil? ¡C'amak!

¹⁸Mayal wala' tol c'amxa yopiso juntzan icham cuybanilej. K'inalok ta chi wala' tol chitoc'al k'anabax pax junelxa, chi txecloj elok tol yobtakwom in bay ley chi yal tu'.

¹⁹A tinani', axca tol camnak on bay ley Moisés. Yuj jun ley tu', axca tol camnak on, yet watx' iquis on yul sat Dios.

²⁰A tinani', a yul sat Dios curusnebil on yetok Cristo; yuj tu' mayonxanak on iquis on tinani'. Axa Cristo iquis oc jin. A tzet chi jun yetok co mimanil tinani', chi jun yuj jaon oc co c'ul yin Cham C'ajol Dios, Cham max camc'ul jin, xan max yak' cam ba juj.

²¹C'am chi je' jaloni, tol nabac'al max tx'ox Dios is watx'c'ulal ayon. K'inalok ta yujc'al jiken ley Moisés, xan chi yal Dios tol watx' on yul sat, nabac'al mi max cam Cristo juj, chi yal tu', quin chi bay Pedro.