Read Q'anjob'al Ef 1 Bible Online

Ef 1 - Q'anjob'al bible

Ef 1

¹Ayin Pablo in ti', chekbej in Jesucristo, yujtol axca ti' max el yin c'ul Dios. Ti chin tz'ibejtok jun in carta ti' ayex ex yet-xa Dios bay conob Efeso. Caw yikem ex bay Cristo Jesús.

²Yak'okab co Mam Dios, yetok Cham Jajawil Jesucristo is watx'c'ulal, c'al is junc'ulal ayex bay tu'.

³Jalek watx' k'anej bay co Mam Dios Cham is Mam Cham Jajawil Jesucristo. Max yak' Cham masanil juntzan watx'ilal yet Cham Espíritu ayon, juntzan tzet yetal ay bay satcan, yujtol junxanej jayji yetok Cristo tinani'.

⁴Sic'bilonxa el yuj Dios yin Cristo, yettaxc'al manto tz'unchaj yulyibank'inal ti', yet watx' asannej Cham ay yalon yet jin, c'amxa jabok co paltail yul sat.

⁵Xiwil is camc'ulal Cham jin. Yuj tu', payxatax max na', tol ok on yaoc yuninalok yuj Jesucristo, yujtol axca tu' max el yin c'ul.

⁶Yuj tu', chi jal watx' k'anej bay Cham, yujtol caw wal miman yelapnok is watx'c'ulal. Max yak' Cham is watx'c'ulal ti' ayon, yujtol junxanej jayji yetok is C'ajol, Cham caw wal camc'ulnebil yuj.

⁷Max on is colil Cham yetok chiq'uil is C'ajol tu', yet max cam Cham juj. Max tan co yobtakil yuj, yujtol miman is watx'c'ulal Cham.

⁸Max yak' is watx'c'ulal tu' ayon yin c'amxa yalbanil, atac'ala' is jelanil, c'al jantak yojtak Cham.

⁹Ay jun tzet nabilxa yuj Dios, tol t'inan yion ba yuj Cristo axca chi yochej. C'am junok mac ojtaknen jun ti' payxa. Palta tinani', a' chi ak'on jojtaknej elok.

¹⁰A yet ok jay tiempoal, cax ok yunen el jun is yochwan tu', yujtol a yet tu' ok watx'nej oc masanil mactxel yetok masanil tzetak yetal, a ton tzetak yetal ay bay satcan, c'al tzetak yetal ay yulyibank'inal ti'. Junxanej ok yut yaoncan oc masanil yalan yikbej.

¹¹Sic'bil onxac'alta' el yuj Dios yettax payxa, yuj co chaon co satak ok yak' ayon, yujtol junxanej jayji yetok Cristo. Ok yunc'alta' jun ti' axca yochen Dios, yujtol a' chi ak'on yun masanil tzet axca chi yochej.

¹²Ayon ti', babel max jaoc Cristo yipok co c'ul. Yuj tu', max el yin c'ul Dios, tol juj, xan chi al-lay watx' k'anej bay, tol xiwil is watx'il.

¹³Axa pax ex ayex ti' xin, yet max e yaben jun abix caw yel, jun yabixal co colbanil, max e yaon oc e c'ul yin Cristo jetok. Yuj tu', junxanej max e yuncan yetok. Max oc Cham Espíritu Santo e yin axca chi yun yoc selloal junok tzet yetal. Yuj tu', miman txequel, tol yet exxa Dios. Yak'nakcan Dios is ti', tol t'inan yaontek Yespíritu tu' ayon.

¹⁴Yuj Cham Yespíritu ayxa oc jin tu', xan jojtak tol yel ok co cha' jun co satak ok yak' Dios ayon. A yet tu' ok tz'aknaj co colbanil, xan ok al-lay watx' k'anej bay Dios, tol xiwil is watx'il.

¹⁵Max wabej, tol caw che yaoc e c'ul yin Cham Jajawil Jesús. Ay ab c'apax e camc'ulal yin jantak eb yet-xa Dios jetok.

¹⁶Yuj tu', junjuntak el chin txajli e yuj, chi wal yuj diosalil bay Dios e yuj.

¹⁷A Cham is Diosal Cham Jajawil Jesucristo, a ton co Mam tol caw wal miman yelapnok, chin k'an bay, tol chi yak' is jelanil ayex yuj is Yespíritu, yet watx' chi te'xac'al nachaj el e yuj tzet ak'bil jojtaknej elok. Catatu' bian, ok e yojtaknej wal el co Mam Dios.

¹⁸Chin k'an bay tol chi jak e nabal, yet watx' chi nachaj el e yuj, tzet ayoc yipok co c'ul, jun bay awtebil on yuj Dios. Axa nachaj el e yuj tu', tol xiwil watx'il jun co satak ok yak'a', yujtol yetonxa.

¹⁹Chin k'an c'apax bay, tol che yojtaknej elok tol caw wal miman is yipalil, cax chi je' yuj masanil. Ayoc jun is yipalil tu' jin, yujtol chi jaoc co c'ul yin. Tx'oxbilxa is yipalil tu' sic'libil

²⁰yet max yak'on ictzoj aj Cristo xol eb camnak, cax max chotban ay bay is watx' k'ab bay satcan.

²¹Yuj tu' xan caw miman yelapnok Cristo yintak masanil eb yajaw, c'al yintak juntzanxa eb ayoc yajawilal yetok, yintak eb ay is yipalil tol man txequelok, c'al yintak eb ay yopiso yin yajawilal. Miman yelapnok yintak masanil eb chi binaj yet jun tiempoal ti', c'al yet yajtok tu'.

²²Maxc'al yaoc Dios masanil tzetak yetal yul k'ab Cristo. Max yak'on c'apax yopiso yoc Yajawilok is yiglesia, axca tol is jolom iglesia tu' yayji.

²³A yiglesia tu', axca tol is mimanil yayji. A' chi ak'on tz'aknaj el Cristo, cax axa Cham chi ak'on tz'aknaj el masanil tzetak yetal.