Read Q'anjob'al Ef 2 Bible Online

Ef 2 - Q'anjob'al bible

Ef 2

¹A yet yalantok, axca tol camnak ex el yul sat Dios yuj e yec'nakilal c'al yuj e yobtakil.

²Yujtol asannej beybal yulyibank'inal ti' max e beybalnej. Max e beybalnej axca yochwan nak ay yopiso yajawbi xol cak'ek' ti'. Ac'al oc jun espíritu tu' chi ak'wi c'ulej bay eb man yikemok bay Dios tinani'.

³Axca ton ti' max jut co ba co masanil yet yalan. Max jun axca chi yochej co nabal. Asannej yin juntzan tzet man watx'ok chi yochej oc co mimanil ti', max jaoc co nabal, yujtol comonc'al chon yikbaj co nabal tu'. Yuj tu', t'inan tit jun miman yailal jiban, axca ok yun jay yiban juntzanxa anima.

⁴Palta a Dios, caw miman is watx'c'ulal jin. Xiwil is camc'ulal jin.

⁵Yuj tu', caxc'al axca tol camnak on yul sat yuj co yobtakil, palta max yak' co k'inal yuj Cristo, xan yuj is watx'c'ulal Dios chex colchaj jetok.

⁶A' max con ictzonen aj yetok Cristo Jesús. Chotan onxa ay satcan yetok Cristo yul sat tinani'.

⁷Max yun Dios axca ti', yet watx' a yet ok jay jun tiempoal yet yajtok tu', cax ok tx'oxk'abnen elok tol xiwil is watx'c'ulal jin, cax ok tx'oxk'abnen c'apax el is camc'ulal ayon, yujtol junxanej jayji yetok Cristo Jesús.

⁸Yuj is watx'c'ulal Dios xan max on colchaji, yuj chi jaoc co c'ul yin. A jun ti', mayonnak max co watx'nej, asan Dios chi ak'on ayon.

⁹Man yujok junok tzet watx' chi el juneni, xan chon colchaji, yuj tu' xan c'am junok on chi je' co maynen co ba.

¹⁰A Dios max on watx'nen oc yin Cristo Jesús, yet watx' chi jun juntzan watx' unbenal. Payxatax nabil yuj, tzet watx' unbenal ok yak' co beybalnej.

¹¹Yuj tu', naektek, tzet e yayji ayex mayex israelok. A eb wet israelal tol ak'bil circuncidar, yalnak eb e yin tol mayex yetok Dios, yujtol man ak'bilok ex circuncidar.

¹²Naek c'apaxtek tol a yet yalan, c'amto oc Cristo e yetok, c'am e yalon e yet yetok eb wet israelal. C'am c'apax e yalon e yet yin juntzan trato Dios max yak' jetok, yet max yak'on is ti' ayon israel on ti'. Ayex ton ec' yulyibank'inal ti', palta c'am junok tzet watx' e yaon oc yipok e c'ul, yujtol c'amto oc Dios e yetok.

¹³Caxc'al najatil max e yintaknej el Dios yet yalan, palta tinani', ayexxa ec' c'atan, yujtol jujc'al max cam Cristo yet max el is chiq'uil.

¹⁴Asan Cristo ak'om junc'ulal ayon. Ayex ti', caw wal e yajc'ul e ba yetok eb wet israelal yet yalan, palta a Cristo max ak'on tan jun caklejbail tu' co xol. Yuj tu', a yul sat Dios, junxanej conobal e yayji jetok tinani'.

¹⁵A yet max cam Cristo, max yak'oncan lajwok ley, a ton juntzan chekbanilej tz'ib yayjicanok. Yetok c'apaxok, junxanej max ex yutcan yetok eb wet israelal. Yuj tu', junxanej conobal jayji yul sat Cham tinani', yujtol junnej jayji yetok, xan axca ti' max yut yak'on junc'ulal ayon.

¹⁶Yujtol a yet max cam Cristo yin te curus, max yak'on lajwok caklejbail e nan e xol yetok eb wet conob. Yuj tu', junxanej jayji co masanil tinani'. Yetok c'apaxok, yujtol max cami, xan junc'ulalxa ayon yetok Dios tinani'.

¹⁷Max ul yalil Cristo is watx' yabixal junc'ulal ayon co masanil. A ayon israel on ti', yettaxc'al yalan, axca tol cawilalxa Dios ayon ec'ok. Yak'ban ex pax xin, axca tol najattoc'al ayex elok, palta max yak' Cristo jojtaknej elok, cax max tx'oxk'abnen c'apax el ayex, tzetbil chi yun joccan yin junc'ulalil yetok Dios.

¹⁸Yuj tu', caxc'al israel on, caxc'al c'amak, palta yuj Cristo, xan ayxa jalon jet jalon co ba bay Dios tinani', yujtol junnej Cham Espíritu max yaoc jin.

¹⁹A yet yalan, tx'ok conobal e yayji yul sat Dios. Axa tinani xin, manxa axcaok tu' e yayji, yujtol is conob exxa yetok masanil eb yet-xa tinani', cax yuninal exxa c'apax yetok eb.

²⁰Axca junok na mayal watx'ji, cayex tu'. Ayon chekbej on Jesús ti', c'al yetok eb yalomal el is k'anej Dios, axca tol ayon anejcan ay yich. Ayex xa xin, axca tol ch'en latz'bil ajtok yiban jun yichej tu'. Axa Jesucristo xin, axca junok ch'en ayoc bay txiquin na, axca tu' yayji ayon.

²¹Yuj Cham xan watx' chi yun mitx'len ba jun na tu' yaji, yet watx' chi oc temploal tol asan Cham Yajaw ay yet.

²²A tinani', junxanej e yayji yetok Cristo, xan max ex oc yatutok co Mam Dios jetok, yujtol max oc cajan jin co masanil yujtol cajan oc Cham Yespíritu jin.