Read Q'anjob'al Ef 3 Bible Online

Ef 3 - Q'anjob'al bible

Ef 3

¹Yuj juntzan chi wal ti', xan chin txajli e yuj. Ayin Pablo in ti', preso wayji, yujc'al tol chi wak' serbil Cristo Jesús e nan e xol ex mayex israelok.

²E yojtakxa, tzetbil tol asan yuj watx'c'ulalil Dios xan max yaoc evangelio yul in k'ab, a ton k'anejal yet colbanilej, yuj walon el e nan e xol.

³A jun tzet manto ojtakbilok yet yalan, max tx'oxk'abnej el Dios ayin. Max yak' wojtaknej elok, axca ta' walontok jabok ayex yul jun in carta ti'.

⁴A yet ok e yilon aj tzet chin tz'ibejtok ti', ok nachaj el e yuj, tol wojtak is cuybej Cristo, yujtol ak'bilxa ayin yuj.

⁵A yet payxa, maj ak'lay ojtaknelay el jun ti' axca yayji tinani'. A tinani' a Yespíritu Cham max ak'on wal jojtaknej el juntzan ti', ayon is chekbej on ti', c'al eb yalomal el is k'anej, tol yet onxa Cham.

⁶Tix ton juntzan max ak'lay jojtaknej el ti', tol ayex mayex israelok ti', a yet che yaon oc e c'ul yin is k'anejal yet colbanilej ti', cax chex oc yuninalok Dios jetok ayon israel on chi jaoc co c'ul yin ti'. Yuj Cham, xan ok e cha' e k'inal jetok. Axca tol junxanej animail jayji yul sat. Max yak' Dios is ti' yuj tzet t'inan yak'on ayon yin Cristo Jesús. Jun lajanxa e chaon jun tu' jetok.

⁷Ayin ti', caxc'al man in mojok, palta yak'nak Dios wopiso walon el k'anejal yet colbanilej ti' e nan e xol yuj is yipalil.

⁸Masanil eb yet-xa Dios wetok, ec'ban yelapnok eb wintak. Caxc'al c'am junok eb miman welapnok yintak, palta yuj is watx'c'ulal Dios, xan yak'nak wopiso. Yuj tu' xan chi ec' walcan el e nan e xol, ayex mayex israelok, tol c'am yalbanil jantak is watx'il Cristo.

⁹A Dios watx'nejnak masanil tzetak yetal. Palta a yet c'amto chi watx'nej, cax max naon canok, tzet ok yut yak'on co colbanil. C'amto jun ti' chi ak'lay ojtaknelay el payxa, palta tinani', yak'nakxa wopiso wak'on ojtaknelay elok.

¹⁰Yuj tu', masanilc'al eb yajaw yayji satcan, c'al jantak eb chi ak'on cuenta bay tu', yet ok yilon eb tzetbil jayji ayon yiglesia onxa ti', ok nachaj wal el yuj eb, tol xiwil ton is jelanil Dios.

¹¹Yettax manto watx'jok yulyibank'inal ti', max naoncanok tzet ok on yutej. Yuj Cham Jajawil Jesucristo xan max yuncan el jun is nabal tu'.

¹²Yujtol chi jaoc Cristo yin co c'ul xan ayxa jalon jet jalon co ba bay Dios. C'amxa chon xiw co txajli bay, yujtol junxanej jayji yetok Cristo.

¹³Yuj tu', chin tewitok ayex, tol manchak e yak' somchaj e nabal yuj juntzan yailal ayoc wiban e yujc'al ti', yujtol ok oc e watx'ilok.

¹⁴Yuj tu', chin ay jajan satak Dios, a ton co Mam yayji ocok.

¹⁵A' ayoc yin tx'oxbanilejal masanil makanil eb mamej bay yulyibank'inal ti', c'al bay satcan.

¹⁶Xiwil watx'il co Mam Dios. Yuj tu', chin k'an bay, tol chi yak' wal tec'anil e nabal c'al is yipalil ayex yuj Cham is Yespíritu.

¹⁷Chin k'an c'apax bay, tol chi ayjic'al ec' Cristo e yin, yujtol che yaoc Cham yin e c'ul. Ta axca tu xin, ok ch'ib wal e camc'ulal. Axca junok te te' caw mimek yin xe', caytu' ok e yuncan elok.

¹⁸Axa nachaj wal el e yuj tu', c'al yuj masanil eb jet creyenteal, tol a is camc'ulal Cristo jin, caw wal miman, cax manxa wal jantakok.

¹⁹Caxc'al c'am bak'in ok nachaj el juj, jantak jun is camc'ulal tu', palta chi wochej che yojtaknej elok. Yetok c'apaxok, chi wochej chi ayjic'al oc Dios e yin sic'libil.

²⁰A tinani', jalek watx' k'anej bay Dios, yujtol ec'ban tzet chi je' yunen Cham, yintak tzet yetal chi co k'an bay, ma yintak tzet chi co na', yujtol ay ton is yipalil jeon yuj yunen masanil tzetak yetal jin.

²¹Mimanbilokab Dios juj yin tojbalk'inal, mac on ayon oc tz'akok yiglesia ti', c'al yuj Cristo Jesús c'apaxok. Yunokabi.