Read Q'anjob'al Ef 4 Bible Online

Ef 4 - Q'anjob'al bible

Ef 4

¹Ayin ti', preso wayji, yujtol chi wak' serbil Cham Jajawil. Chin tewitok ayex, tol caw wal watx'okab c'al che yut e beybal. Moj tol watx' che yut e ba, yujtol awtebil ex yuj Dios yuj e yoc yetok.

²Yaynakilokab che yut e ba, cax manso che yut e ba. Ak'ek techaj eb yob chi yut ba ayex. Miman che yut e c'ul junjun ex. Yetok c'apaxok, camc'ulnejek e ba.

³A Cham Espíritu Santo chi ak'on chalej ba co nabal. Yuj tu', ak'ek e yip yet watx' junc'ulalokabc'al ayex. Ta axca tu', junxanej ok e yuncanok.

⁴Yujtol ayon ti', axca tol junnej animail jayji. Junnej Cham Espíritu ayoc jin. Junnej tzet chi jaoc yipok co c'ul, a ton jun bay awtebil on ocok.

⁵Junnej Cham Jajawil. Junnej mac chi jaoc co c'ul yin. Junnej mac yin ak'bil on bautizar.

⁶Yetok c'apaxok, junnej Dios, Cham co Mam co masanil. A ton Cham Yajaw yin masanil. A Cham chon k'anbalnen junjun on. A c'apax Cham ayoc jin co masanil.

⁷Palta tx'ok tx'ok jopiso chi ak'layi, atac'ala' tzet chi yak' Cristo ayon junjun on.

⁸Yuj tu', a yabixal Cristo tz'ib yayjican yul tx'an Un, chi yal axca ti': A yet max ajtok, max yiajtok yetok eb preso yayji. Yetok c'apaxok, max yak' sabal bay eb anima, ẍi.

⁹Chi waltok ayex, tzet chi yal elapnok jun tol max ajtok. Chi yal axca tu', yujtol a yet c'amto chi paxaj Cristo, max bet aytok bay jun lugar najat yich yul tx'otx'.

¹⁰A Cham betnak aytok tu', a' max paxaj bay satcan, yet watx' tz'akan makbil yuj Cham masanil.

¹¹A juntzan sabalej chi yala', a ton juntzan opiso chi yak' ayon junjun on. Ay on is chekbej jayji. Ay on chi je' jalon el is k'anej. Ay on chi jalil k'anejal yet colbanilej. Ay on chi ak'lay jak' cuenta eb jet creyenteal, cax chi co cuyon c'apax eb.

¹²Axca ti' max yut yak'on juntzan opiso ti', yet chon cuylay ayon yet onxa Dios ti', yin jak'on serbil Cham, c'al yin jak'len tec'anil co nabal junjun on, yujtol ayon ti', axca tol is mimanil Cristo jayji.

¹³Chi yak' juntzan opiso ti' ayon, yet watx' jun lajan jaon oc co c'ul yin, cax ok jojtaknen wal el Cham C'ajol Dios. Ta axca tu', ok yi' wal yip co nabal. Lajanxa ok yun co nabal axca Cristo, tol c'am jabok is paltail.

¹⁴Yujtol chi yochej tol manxaokab lajanok on axca eb unin c'un somchaj el is nabal. A tinani', ay eb chi somchaj el nabal yuj juntzanokxa tx'ok cuybanilej chi al-lay bay eb. Lajan eb axca junok barco toc'al chi tz'eytz'on ec' yuj cak'ek'. Chi ilay aytek sat eb yuj juntzan eb jelan yin lek'tial. A eb tu', chi yochej eb chon yitok yin junokxa comon beybalej.

¹⁵Palta ayon ti', yowalil asan tzet yetal yel chi jala', co tx'oxek el camc'ulal. Yowalil chi jic'al jip, yet watx' lajan chi junel axca Cristo, yujtol axca co jolom, caytu' yayji ayon.

¹⁶Ayonxa xin, axca tol is mimanil jayji. Axca co mimanil ti', mitx'bomba c'al yayji is tx'anil, caw watx' yayji junjun tzet ayoc yin, axca tu' jayji yuj Cristo, yujtol a' chi ak'on jip co masanil. Lanan co mulnaj junjun on, yet watx' chi te'xac'al yi yip co nabal, cax chi jay wal co camc'ulal.

¹⁷A juntzan ok waltok ayex ti', chekbanil Cham Jajawil. Manxaokab lajanok che yut e beybal axca eb manto ojtaknenok Dios, yujtol ikbabil is beybal eb yuj is nabal c'am yelapnok.

¹⁸Caw k'ekk'inal ay is nabal eb. C'am chi yak' Dios jabok is k'inal eb tol ayc'al yin tojbalk'inal, yujtol c'am jabok chi nachaj el yuj eb yuj is pitalil eb.

¹⁹C'am jabok chi q'uixwi eb. Tol chi yaxac'altok ba eb xol ajmulal. Tol chi ajc'al can eb yunen jantak tzet man watx'ok.

²⁰Palta ayex ti', man axcaok tu' max e yut e cuyon yet Cristo,

²¹tatol a yabixal Cham max e yabej, cax max e cuyon is beybal tol chi chalej ba yetok jun k'anej yel.

²²Yowalil che bekcan e yicham beybal yin junelnej, yujtol a e yicham beybal tu', etaxnak el yuj juntzan tzet che yochej ocok.

²³Yuj tu' yowalil chi watx'jic'al oc e nabal junjun c'u.

²⁴Yowalil che cha' q'uexchaj e nabal, che chaon junok ac' nabalej chi watx'nej Dios axca chi yochej. Ta axca tu xin, tutun wal yel, watx' tzet ok e beybalnej, cax watx'c'al ok e yut e ba.

²⁵Yuj tu', manchakxa e yak' lek'tial. Asannejokab tzet yetal yel che yal-lej ayex junjun ex, yujtol axca tol junnej animail jayji co masanil.

²⁶Ta ay bay chi tit jowal, manchak jun junok tzet yetal man watx'ok yuj jowal tu'. Maj je' tol ayc'al ec' jowal yin co c'ul tu', cax chi aycan aj c'u.

²⁷Manchak jak' yochwan diablo yetnen el co nabal yin yayjic'al ec' yowal co c'ul.

²⁸Ta ayon elk'om on yet yalantok, manchakxa on elk'an tinani'. Palta watx' chon mulnaj yin junok mulnajil watx', yet watx' ayonxa ok je' co colwaj bay juntzanokxa mac c'am tzet ay.

²⁹Manchak jal juntzan yobal k'anej. Asanokab k'anej watx' chi jala', yet watx' chi watx'ji oc nabal eb chi abeni, cax chi yion wal eb yip juj.

³⁰Manchak co tx'em cus Cham Espíritu Santo yet Dios ayoc jin junjun on, yujtol a Cham max alay oc jin junjun on, axca chi yun yalay oc selloal junok tzet yetal. Yuj Cham, xan jojtak tol yet onxa Dios, yak'ban chi jechbanej jay c'ual yet ok tz'aknaj el co colbanil.

³¹Co bekekcan masanil chichonc'ulal, c'al k'ak'alc'ulal. Manokab comonok chi tit jowal. Yetok c'apaxok, manokab comonok chi aj jaw co tzuwaji. Co bekekcan junen masanil tzet man watx'ok.

³²Watx' chi jut co nabal ayon junjun on. Ok'okab co c'ul jin junjun on. Yetok c'apaxok, co joek c'ay co yobtakil ayon junjun on, axca max yut joon c'ay Dios co yobtakil yuj Cristo.