Read Q'anjob'al Flp 1 Bible Online

Flp 1 - Q'anjob'al bible

Flp 1

¹Ayin Pablo in ti', yetok Timoteo, yak'omal serbil Jesucristo jayji. Ti chi jatok jun co carta ti' ayex e masanil ex yet-xa Dios aj Filipos, ex junxanej e yayji yetok Cristo Jesús. E yet c'apax yayji jun carta ti', ex anciano c'al ex diácono aj Filipos tu'.

²Tx'oxokabc'al co Mam Dios c'al Cham Jajawil Jesucristo is watx'c'ulal c'al is junc'ulal ayex.

³A yet chex in naontek junjuntak el, chi wal yuj diosalil bay co Diosal e yuj.

⁴A yet chin txajli junjuntak el, chin txajli yin tzalojc'ulal e yuj e masanil.

⁵Yujtol yecheltaxc'al max e chaon Cristo, masantac'al tinani', junxanej mulnajilal chi jun yin is k'anejal yet colbanilej tinani'.

⁶Mayal chail Dios yich mulnaj oc e yin. A tinani', wojtak sic'libil, tol ok mulnajc'al oc e yin, masantac'al yet jun c'ual yet ok jay Jesucristo.

⁷Caw wal chex in camc'ulnej; watx' ton tzet chin na ti', yujtol ayex ti' ayoc e colwal wetok yin wopiso max yak' Dios. Max ex colwajc'al wetok yet bekan wayji yin walon elok tol yel jun k'anejal yet colbanilej; lanantoc'al e colwaj wetok caxc'al ayin oc yul preso ti'.

⁸Yojtak Dios tol caw chex in camc'ulnej e masanil yetok is camc'ulal Jesucristo ak'bil ayin.

⁹Chin k'an bay Dios e yuj, tol chi aj can e camc'ulal, cax chi yak'on is jelanil ayex. Chin k'an c'apax bay, tol chex aj can yin nachaj el masanil is tzetak yetal,

¹⁰yet watx' che yojtaknej wal elok baytet ay juntzan tzetak yetal watx' yul sat Dios, cax chi tojolbi wal oc e nabal, yet watx' a yet ok jay Cristo, c'amokab jabok e paltail yul sat.

¹¹Ok oc Jesucristo e yetok, yet watx' tojolc'al ok e yut e beybal. Ta axca tu', ok txecloj el e yin, tzetbil tol caw xiwil watx'il c'ul Dios, cax ok al-lay watx' k'anej bay Cham.

¹²Ex wuẍtak, ex wanab, chi wochej c'apax chi nachaj el junxa ti' e yuj, tol a tzet max jay wiban ti', man yobok wet yuj, palta tol yuj, xan chi aj can pukax el k'anejal yet colbanilej tinani'.

¹³Ilab tol masanil eb soldado c'al eb yajaw, c'al juntzanxa eb anima cayti', maxc'al yab eb masanil, tol asannej yujtol chi waoc in c'ul yin Cristo xan ayin oc preso.

¹⁴A yet max yilon eb creyente, tol tec'an chi wut in ba yul preso ti', xan xiwil eb chi yi' wal tec'anil wuj. C'amxa chi xiw eb yalon el k'anej Dios cayti'. Caw chi tec'baj ba eb yin Cham Jajawil.

¹⁵Yel toni, ay juntzan eb chi chichon oc c'ul win. Yujc'al tu' chi yalon el eb yabixal Cristo. Man yinok masanil c'ul eb chi yalon el eb, palta toc'al chi yi' can ba eb. A chi yochej eb tol chi aj can in cusc'ulal yul preso ti'. Palta ay pax juntzanxa eb xin, yin masanil c'ul eb chi yalon el eb, yujtol chin is camc'ulnej eb. Yojtak eb, tol ayin ec' cayti' yuj walon elok tol caw yel jun k'anejal yet colbanilej ti'.

¹⁸Palta ayin ti', c'am tzet chin na' yuj juntzan ti'. Caxc'al yin masanil c'ul eb chi yalon el eb, caxc'al c'amak, palta chin tzaloji, yujtol a yabixal Cristo lanan yalon el eb. Ok jay wal in tzalojc'ulal,

¹⁹yujtol wojtak, tol caxc'al chi wab yail tinani', palta watx' ok in elocok, yujtol lanan e txajli wuj. Watx' ok in elocok yujtol ayoc Cham Yespíritu Jesucristo wetok.

²⁰Yin masanil in c'ul, chi wochej tol c'am chi wak' in q'uixwilok. Chi wochej, caw tec'anc'al chi wut walon elok, axca tonc'al chi wut in ba ti'. Ta axca tu', caxc'al iquis in, ma chin cami, palta ok txeclojcan el win, tol caw miman yelapnok Cristo.

²¹Yujtol ayin ti', a yet iquis in ec'ok, asan Cristo naan wuj. Axa yet ok in camok, ec'ban watx'il ok in elocok.

²²Ta iquis into ec' yulyibank'inal ti' jabokxa, chi je' in mulnaj jabokxa yin yet Cham Jajawil, palta ¿ma txequel baytal mi ay junok ec'ban watx'il?

²³C'am chi nachaj el wuj, baytet ay junok watx'. Chi wochej chin cami, yet watx' chi je' wapni ayman bay ayic' Cristo, yujtol ta axca tu' yelxac'al watx' wet.

²⁴Palta yuj e watx'ilok ayex ti', xan yowalil iquis into jabokxa bay yulyibank'inal ti'.

²⁵Yuj tu', wojtak sic'libil, tol ok into can janic'okxa e yetok. Ok ex in col jabokxa, yet watx' che yi wal e yip, cax chi jay wal e tzalojc'ulal, yujtol che yaoc Cristo yin e c'ul.

²⁶Yuj tu', ok in tok ayex junelxa, yet watx', tol wujc'al che yal e watx' k'anej bay Cristo Jesús.

²⁷Palta caxc'al ok in tok ayex, ma c'amak, watx'okabc'al che yut e beybal tol chi cha ba axca yalon Cristo yin is k'anejal yet colbanilej. Ta axca tu', ok wab e k'umal, tol ac'ala' tec'an e waayi, cax tol ac'ala' junnej nabalejal e yayji bay tu'. Ok wab c'apaxok, tol jun lajanc'al e yaon oc e c'ul yin jun k'anejal yet colbanilej tu', cax caw tec'an e waay yin.

²⁸Manchak ex xiw bay eb chi chichon oc c'ul jin. Caytu' ok e yut e tx'oxk'abnen elok, tol ok c'aycan el eb yin junelnej. Yetok c'apaxok, caytu' ok yun txecloj elok, tol ayxa co colbanil, yujtol caytu' ok yut Dios tx'oxk'abnen elok.

²⁹Yuj is watx'c'ulal Cristo max yak' ayon, tol man asannejok tol ay jalon jet jaon oc co c'ul yin, palta tol ay c'apax jalon jet jaben yailal yetok.

³⁰Ayex ti', jun lajan e yak'on e yip e tec'ban e ba wetok. E yilnak in, tol caw tec'an wutnak in ba e nan e xol. Axa tinani', lanan e yabeni, tol ac'ala' tec'anc'al chi wut in ba.