Read Q'anjob'al Flp 3 Bible Online

Flp 3 - Q'anjob'al bible

Flp 3

¹A tinani' ex wuẍtak, ex wanab, ak'ek tzaloj e c'ul yin Cham Jajawil. Ay juntzanxa tzet ok waltok ayex, tol man yobok chi wabej tol ac'ala' ok waltok ayex junelxa, yujtol yowalil che watx' ojtaknej elok.

²Caw che yilc'al e ba bay juntzan eb caw yob is nabal, axca junok tx'i'. Caw yob chi yut ba eb, yujtol chi yochej eb chi polil jabok tz'umal e mimanil.

³Palta ayon ti', ak'bil onxa circuncidar yin yel yul sat Dios, ayon tol chi jal co ba bay Dios yuj Cham Espíritu. Asan yin Cristo Jesús chon tzaloji, axa tzet chi je' juneni c'am chi jaoc yipok co c'ul.

⁴A max wut in naon ayin ti', tol moj chi waoc juntzan ti' yipok in c'ul, yujtol caw yikem wutnak in ba yin juntzan ti'. Tekan ay eb chi naoni, tol moj chi colchaj eb yuj juntzan chi el yunen eb tu', palta ayin ti', ec'ban yikem wutnak in ba yin juntzan tu'.

⁵Jun semana walji max in ak'lay circuncidar, yujtol israel in. Yinatil into Benjamín, hebreo in, yujtol hebreo in mam c'al in txutx. Caw yikem in yin masanil ley Moisés, yujtol fariseo in.

⁶A yet tu' caw chi waoc in nabal yin in religión, yuj tu' xan etnebil eb yet-xa Cristo wuj. Maxc'al wikej masanil tzet chi yal ley Moisés, c'am jabok tzet bay moj in tzulayi.

⁷Masanil juntzan max wal ti', miman yelapnok in naoni, palta a tinani', a chi wut in naoni, c'am jabok yelapnok juntzan tu', yujtol asan yin Cristo chi waoc in nabal.

⁸Masanil juntzan tzet max walej oc yipok in c'ul tu', c'am jabok yelapnok yul in sat tinani', yujtol ay junxa tzet caw watx' chi el wunen tinani', tol chi wojtaknej el Cristo Jesús Cham Jajawil. Yuj Cristo ti', xan max c'aycan el masanil juntzan walejnak oc yipok in c'ul tu'. Axa tinani', axcaxa k'alem yayji yul in sat, yujtol chi wochej chi wi' can Cristo junelnej,

⁹junxanej chi wuncan el yetok. A tinani', chi yal Dios, tol watx' in yul sat, yujtol chi waoc in c'ul yin Cristo, man yujok tol chi wikej tzet chi yal ley Moisés. Asan yuj chi jaoc co c'ul yin Cristo, xan chon occan watx'il yul sat Dios.

¹⁰Chi wochej chi wojtaknej el Cristo wal sic'libil, yet watx' a ipejal max ak'on ictzoj ajok, a' chi mulnaj oc win. Chi wochej chi wab yail yetok, cax chin ayji axca max yun yayji Cristo yet max cami.

¹¹Yujtol chi wochej tol ay c'apax walon wet wictzonelay aj xol eb camnak.

¹²Man lananok waloni ta mayal wak' ganar juntzan chi wal ti', yujtol manto caw tz'akanok in yin masanil; palta ac'ala' wak'on wip tinani', yet watx' chin tz'aknaj el yin masanil. Yuj tu' xan max in sic'lay el yuj Cristo Jesús.

¹³Ex wuẍtak, ex wanab, manto tz'akanok in yin juntzan ti' chi wut in naon tinani', palta ok waltok ayex, tzet chi el wuneni. A tinani', c'amxa chin natek juntzan tzet mayal yi ba wuj. Asan juntzan c'amto chi yi ba wuj, a' chin na'. Caw chi wak' wip,

¹⁴yet watx' ok in cha' is paktzil bay satcan. Yuj is paktzil tu', xan chon yawtej oc Dios yetok, yujtol junxanej chi juncan el yetok Cristo Jesús.

¹⁵A mac on caw tec'an onxa, yowalil axca tu' chi yun co naon junjun on. Ta ayex man axcaok tu' e naoni, ok oc Dios e yetok, yet watx' ok nachaj el juntzanxa tu' e yuj.

¹⁶Yowalil chi co beybalnejc'al masanil tzet chi ak'lay nachaj el juj yuj Dios.

¹⁷Ex wuẍtak, ex wanab, beybalnejek in beybal ti'. Ayon ti', tx'oxbilxa jun watx' beybalej e yil juj. Yuj tu' ilek c'apax is beybal eb lajan is beybal jetok, yet watx' che beybalnej c'apax axca tu'.

¹⁸Ay jun tzet tx'ial elc'al albilxa ayex wuj. A yet chi walontok ayex tinani', caw chin ok'i, yujtol xiwil eb yob chi yut is beybal, xan txequel tol c'am yelapnok is camichal Cristo yin curus yul sat eb.

¹⁹Palta a eb tu', yowalil ok c'aycan el eb yin junelnej. Asan tzet chi yochej oc mimanil eb, asan yin tu' ayoc nabal eb, axca tol is diosal eb yayji oc juntzan tu'. Ay juntzan tzet chi el yunen eb, caw q'uixwiltak. Asan yin juntzan tu' chi luesnej ba eb. Asan juntzan yet yulyibank'inal ti' chi na eb.

²⁰Palta ayon ti', a bay satcan aytok co nabal, yujtol a tu' ay co conobal. Lanan jechbanen c'apax jay co Colomal bay satcan tu', a ton Cham Jajawil Jesucristo.

²¹A' ok q'uexon co yaynakil mimanil ti', yet watx' lajanxa ok yun axca yet, yujtol a is mimanil tu', caw wal watx' sic'libil. Caytu' ok on yut yetok is yipalil, tol ok can masanil tzetak yetal yalan yuj.